ଧର୍ମଶାଳା,୨୪।୫ (ଶିବ ପ୍ରସାଦ ମହାନ୍ତି): ଯାଜପୁର ଜିଲାର ଧର୍ମଶାଳା ବ୍ଲକ ପରିସର ମଧ୍ୟରେ ଥିବା ଯାତ୍ରୀ ବିଶ୍ରାମାଗାର ଓ ଶୌଚାଳୟ ଅବସ୍ଥା ଅତି ଶୋଚନୀୟ ହୋଇପଡ଼ିଛି। ଏହାସତ୍ତ୍ୱେ ବ୍ଲକ ପ୍ରଶାସନ ପକ୍ଷରୁ ଦୃଷ୍ଟି ଦିଆ ଯାଉନାହିଁ। ଏହି ବ୍ଲକ ଅଧୀନରେ ୪୫ଗୋଟି ପଞ୍ଚାୟତ ରହିଛି। ତେଣୁ ଦୈନିକ ବହୁସଂଖ୍ୟକ ଲୋକ ନିଜର ଆପତ୍ତି ଅଭିଯୋଗ ସହିତ ଅନ୍ୟାନ୍ୟ କାର୍ଯ୍ୟ ପାଇଁ ବ୍ଲକକୁ ଆସିଥାନ୍ତି । ଭତ୍ତା, ଆବାସ ଭଳି ସମସ୍ୟା ପାଇଁ ଅନଗ୍ରସର ବ୍ୟକ୍ତି ବିଶେଷ ମାନଙ୍କଠାରୁ ଆରମ୍ଭ କରି ବୃଦ୍ଧ ଓ ବୃଦ୍ଧା ମାନଙ୍କ ଭିଡ଼ ଦେଖିବାକୁ ମିଳିଥାଏ। ହେଲେ କାର୍ଯ୍ୟରେ ବିଳମ୍ବ ହେବା ଯୋଗୁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡ଼ିଥାଏ। ସେହିପରି ଏସ୍ଏଚ୍ଜି ଗ୍ରୁପର ମହିଳା ମାନେ ବ୍ଲକ କାର୍ଯ୍ୟାଳୟକୁ ବିଭିନ୍ନ କାର୍ଯ୍ୟ ନେଇ ଆସିଥାନ୍ତି । ଏହି ସବୁକୁ ଦୃଷ୍ଟିରେ ରଖି ବ୍ଲକ ପ୍ରଶାସନ ପକ୍ଷରୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଇ ଯାତ୍ରୀ ବିଶ୍ରାମାଗାର କରାଯାଇଛି। ଉକ୍ତ ଘରର ତଳେ ବସିବା ପାଇଁ ଟାଇଲର ବ୍ୟବସ୍ଥା କରାଯାଇଛି। କିନ୍ତୁ ଏହା ପାନ ଛେପ ଯୋଗୁ ସମ୍ପୂର୍ଣ୍ଣ ଭାବେ ଅପରିଷ୍କାର ହୋଇ ରହିଛି।
ସେହିପରି ଶୌଚାଳୟ ରହିଥିଲେ ହେଁ କାହାର କବାଟ ନାହିଁ ତ କାହାର ଟ୍ୟାପ ନାହିଁ କି ବେଶିନ ନାହିଁ।
ସେହିପରି ପାନୀୟ ଜଳ ର ବ୍ୟବସ୍ଥା କରାଯାଇଛି ସତ ହେଲେ ସବୁ ସମୟରେ ପାଣି ମିଳିବା ସମ୍ଭବ ହୋଇ ନ ଥାଏ। ଅନେକ ସମୟରେ ବ୍ଲକ ପରିସର ମଧ୍ୟରେ ଅଭିଯୋଗ ଶୁଣାଣୀ ଶିବିର ହୋଇଥାଏ। ଏହି ଶିବିରରେ ଜିଲାପାଳ, ଜିଲା ଏସ୍ପି ଓ ଅନେକ ପ୍ରଶାସନିକ ଅଧିକାରୀ ମାନେ ମଧ୍ୟ ଆସିଥାନ୍ତି। ଲୋକଙ୍କ ସମସ୍ୟା ବୁଝି ସମାଧାନ କରିଥାନ୍ତି। କିନ୍ତୁ ଖୋଦ ବ୍ଲକ ପ୍ରଶାସନ ଅପରିଷ୍କାର ଓ ଅବହେଳାରେ ରହିଥିବା ଘଟଣା ଚର୍ଚ୍ଚାର ବିଷୟ ପାଲଟିଛି। ଏହା ଉପରେ ଜିଲା ପ୍ରଶାସନ ଦୃଷ୍ଟି ଦେବାକୁ ଦାବି କରାଯାଉଛି ।
