ଦିଗପହଣ୍ଡି,୧୭ା୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ସହଦେବ ଟିକରପଡ଼ା ପଞ୍ଚାୟତ ଫାସିବନ୍ଧ ଗ୍ରାମରେ ଗତ ୨୦୧୯-୨୦ ଆର୍ଥିକ ବର୍ଷରେ ବସୁଧା ଯୋଜନାରେ ପ୍ରାୟ ୮୦ ଲକ୍ଷ ଟଙ୍କା ବ୍ୟୟରେ ନିର୍ମିତ ପାନୀୟଜଳ ପ୍ରକଳ୍ପ ଅଚଳ ହୋଇପଡିଛି । ଏନେଇ ସୋମବାର ବ୍ରହ୍ମପୁର ଧରିତ୍ରୀ ସଂସ୍କରଣରେ ‘ ପାନୀୟ ଜଳ ପ୍ରକଳ୍ପ ଅଚଳ, ଗାଁ ଲୋକଙ୍କ ପକ୍ଷରୁ ଆନ୍ଦୋଳନ ଚେତାବନୀ ‘ ଶୀର୍ଷକ ବିସ୍ତୃତ ଖବର ପ୍ରକାଶନ ପରେ ବ୍ରହ୍ମପୁର ଗ୍ରାମ୍ୟ ପାନୀୟଜଳ ଓ ପରିମଳ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଇଂ.ଧନୁର୍ଜୟ ବେହେରା, ଦିଗପହଣ୍ଡି ବ୍ଲକ ବିଭାଗୀୟ ସହକାରୀ ଯନ୍ତ୍ରୀ ଇଂ. ଭୀମା ରାଓ ସମ୍ପୃକ୍ତ ଗ୍ରାମରେ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରିବା ପରେ ଅଚଳ ଅବସ୍ଥାରେ ପଡିରହିଥିବା ପ୍ରକଳ୍ପର ସ୍ଥିତି ଅନୁଧ୍ୟାନ କରିଥିଲେ ।
ଭୂତଳ ଜଳସ୍ତର କ୍ରମଶଃ ହ୍ରାସ ପାଇବା କାରଣରୁ ମୋଟର ଯୋଗେ ଟାଙ୍କିକୁ ଆବଶ୍ୟକ ପାଣି ଉଠୁନାହିଁ । ଫଳରେ ଲୋକଙ୍କୁ ପାଇପ ଯୋଗେ ପାଣି ଦିଆଯାଇ ପାରୁନାହିଁ । ଗ୍ରାମବାସୀଙ୍କ ସହ ଆଲୋଚନା କରାଯିବା ପରେ ଗାଁ ଠାରୁ ପ୍ରାୟ ୫ ଶହ ମିଟର ଦୂରରେ ଥିବା ଦୁଲବର ଆମ୍ବ ବଳଧିଆ ନାଳ ନିକଟରେ ବୋର୍ ଖୋଳାଯାଇ ସେଠାରୁ ପାଇପ ଯୋଗେ ପ୍ରକଳ୍ପ ଟାଙ୍କିକୁ ପାଣି ଅଣାଯିବା ପାଇଁ କାର୍ଯ୍ୟଖସଡ଼ା ପ୍ରସ୍ତୁତ କରାଯିବ ବୋଲି ନିଷ୍ପତ୍ତି ନିଆଯାଇଥିବା ଜଣାପଡ଼ିଛି ।
ଏନେଇ ସହକାରୀ ଯନ୍ତ୍ରୀଙ୍କୁ ପଚାରିବାରୁ ପାନୀୟ ଜଳ ପ୍ରକଳ୍ପ ପରିଚାଳନା ନିମନ୍ତେ ଗ୍ରାମ୍ୟ କମିଟି ଗଠନ କରାଯାଉନାହିଁ । ପମ୍ପ ଡ୍ରାଇଭରଙ୍କୁ ଗତ ୧୦ ମାସ ହେଲା ପଞ୍ଚାୟତରୁ ମାସିକ ପାରିତୋଷିକ ଦିଆଯାଇନାହିଁ । ପାନୀୟ ଜଳ ଉପଭୋକ୍ତା ମାନେ ମାସିକ ୬୦ ଟଙ୍କା ପ୍ରଦାନ କରିବା ପାଇଁ ରାଜ୍ୟ ସରକାରଙ୍କ ନିର୍ଦ୍ଦେଶାନାମା ରହିଥିଲେ ମଧ୍ୟ କୌଣସି ଉପଭୋକ୍ତା ପାଣି ଟିକସ ପୈଠ କରୁନାହାନ୍ତି । ତେଣୁ ପାନୀୟଜଳ ପ୍ରକଳ୍ପ ଗୁଡ଼ିକ ଠିକ୍ ରୂପେ ପରିଚାଳନା ହୋଇପାରୁନଥିବା କହିଛନ୍ତି ।
