ଧାମନଗର, ୩୦।୬ (ସନ୍ତୋଷ କୁମାର ମହାପାତ୍ର): ଭଦ୍ରକ ଜିଲା ଧାମନଗର ଅଞ୍ଚଳରେ ଏକ ବଡ଼ ସଡ଼କ ଦୁର୍ଘଟଣା ଘଟିଯାଇଛି। ଧାମନଗର ଥାନା ଅଧୀନ ୧୬ ନମ୍ବର ଜାତୀୟ ରାଜପଥ ଦେଇ ଭଦ୍ରକ ସଦର ମହକୁମା ପର୍ଯ୍ୟନ୍ତ ଯାଇଥିବା ପୂର୍ତ୍ତ ବିଭାଗ ମୁଖ୍ୟ ରାସ୍ତାର ବରଗଡ଼ିଆ ଛକ ନିକଟ ଏନ୍.ଏ.ସି (NAC) ଗେଟ୍ ସମ୍ମୁଖରେ ମଙ୍ଗଳବାର ଅପରାହ୍ନରେ ଏକ ଫରେଷ୍ଟ ଗାଡ଼ି ଏବଂ ବୋଲେରୋ ପିକଅପ୍ ଭ୍ୟାନ୍ ମଧ୍ୟରେ ଜୋରଦାର ଧକ୍କା ହୋଇଛି। ତେବେ ସୌଭାଗ୍ୟବଶତଃ ଏହି ଭୟଙ୍କର ଦୁର୍ଘଟଣାରୁ ଧାମନଗର ବନ୍ୟପ୍ରାଣୀ ଓ ବନଖଣ୍ଡ ଅଧିକାରୀ (ରେଞ୍ଜର) ବବୁଲ ମଲ୍ଲିକ ଅଳ୍ପକେ ବର୍ତ୍ତି ଯାଇଛନ୍ତି।
ସୂଚନା ଅନୁଯାୟୀ, ବନବିଭାଗ ଅଧିକାରୀ ବବୁଲ ମଲ୍ଲିକ ନିଜର ଅଫିସ କାମ ସାରି ସରକାରୀ ଗାଡ଼ି (ନଂ – OD 22 AC 7745) ଯୋଗେ ଭଦ୍ରକରୁ ଫେରୁଥିଲେ। ଏହି ସମୟରେ ବରଗଡ଼ିଆ ଛକ ଏନ୍.ଏସି ଗେଟ୍ ନିକଟରେ ବିପରୀତ ଦିଗ ଅର୍ଥାତ ଧାମନଗର ବଜାର ପଟରୁ ଦ୍ରୁତ ଗତିରେ ଆସୁଥିବା ଏକ ବୋଲେରୋ ପିକଅପ୍ (ନଂ – OD 04 W 1480) ସହ ସରକାରୀ ଗାଡ଼ିର ମୁହାଁମୁହିଁ ଧକ୍କା ହୋଇଥିଲା। ଘଟଣାସ୍ଥଳରେ ଉପସ୍ଥିତ ଥିବା ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଉଭୟ ଗାଡ଼ିର ଡ୍ରାଇଭର ଅନ୍ୟମନସ୍କ ଥିବା ହେତୁ ଏହି ଦୁର୍ଘଟଣା ଘଟିଛି।
ଦୁର୍ଘଟଣାଟି ଏତେ ଜୋରଦାର ଥିଲା ଯେ ବନ ବିଭାଗର ସରକାରୀ ଗାଡ଼ିର ଡାହାଣ ପଟ ପଛ ଚକଟି ଚେପା ହୋଇ ସମ୍ପୂର୍ଣ୍ଣ ନଷ୍ଟ ହୋଇଯାଇଛି ଏବଂ ଗାଡ଼ିର ଅନ୍ୟ ଅଂଶ ମଧ୍ୟ ବ୍ୟାପକ କ୍ଷତିଗ୍ରସ୍ତ ହୋଇଛି। ସେହିପରି ପିକଅପ୍ ଭ୍ୟାନର ସାମ୍ନା ପଟ ମଧ୍ୟ ଭାଙ୍ଗି ଚୂରମାର ହୋଇଯାଇଛି। ତେବେ ଆଶ୍ଚର୍ଯ୍ୟର କଥା ଏହି କି ଯେ, ଗାଡ଼ିଗୁଡ଼ିକ ଏତେ କ୍ଷତିଗ୍ରସ୍ତ ହୋଇଥିଲେ ମଧ୍ୟ ବସିଥିବା ଅଧିକାରୀ ମଲ୍ଲିକ କିମ୍ବା ଉଭୟ ଗାଡ଼ିର ଡ୍ରାଇଭରଙ୍କର କୌଣସି କ୍ଷୟକ୍ଷତି ହୋଇନାହିଁ।
ଦୁର୍ଘଟଣା ସମ୍ପର୍କରେ ଖବର ପାଇ ଧାମନଗର ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା। ପୋଲିସ ବୋଲେରୋ ପିକଅପ୍ ଭ୍ୟାନକୁ ଜବତ କରି ଥାନାକୁ ନେବା ସହ ଘଟଣାର ତଦନ୍ତ ଆରମ୍ଭ କରିଛି। ଅନ୍ୟପଟେ ବନ ବିଭାଗର ସରକାରୀ ଗାଡ଼ିଟି ଚାଲିବା ସ୍ଥିତିରେ ନ ଥିବାରୁ ତାହା ଦୁର୍ଘଟଣା ସ୍ଥଳରେ ହିଁ ପଡ଼ି ରହିଛି।
