ନାଉଗଁା,୧୩।୮(ସ୍ବ.ପ୍ର.): ନାଉଗଁା ବ୍ଲକ ଶେଷ ସୀମା ଓ ପୁରୀ ଜିଲା ଆରମ୍ଭରେ ପ୍ରବାହିତ ହୋଇଥିବା ଦେବୀ ନଦୀ ପଠାରୁ ଅତଡା ଖସୁଛି। ଏନେଇ ନଦୀ କୂଳିଆବାସୀ ଆତଙ୍କିତ ହୋଇଯାଇଛନ୍ତି। ସ୍ଥାନୀୟ ଲୋକଙ୍କ କହିବା ମୁତାବକ ଉକ୍ତ ନଦୀ ପଠାରେ ଜଳ ସମ୍ପଦ ବିଭାଗ ପକ୍ଷରୁ ପ୍ରତିବର୍ଷ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ପଥର ପ୍ୟାକିଂ କରାଯାଉଛି। ହେଲେ ନିମ୍ନମାନର କାର୍ଯ୍ୟ ଯୋଗୁ ଏସବୁ ପଥର ଖସି ନଦୀ ମଧ୍ୟକୁ ଚାଲିଯାଉଛି। ଫଳରେ ନଦୀରେ ବନ୍ୟା ପାଣି ଆସିଲେ ଉକ୍ତ ସ୍ଥାନରୁ ଅତଡା ଖସିବା ଆରମ୍ଭ କରୁଛି। ବିଭାଗ ଦ୍ୱାରା ପ୍ରତି ବର୍ଷ ବାଲି ବସ୍ତା ପକାଯାଇ ବନ୍ଧକୁ ରକ୍ଷା କରାଯାଉଥିବା ବେଳେ ସ୍ଥାୟୀ ମରାମତି କାର୍ଯ୍ୟ କରାଯାଉ ନାହିଁ। ନଦୀ ପଠା ଅତଡା ଖସିବା ଦ୍ୱାରା ନଦୀ ନିକଟରେ ଥିବା ଭଣ୍ଡିସାହି, ଓଷକଣା, ନୟା ସିଙ୍ଗଡା, ମୁତୁଣିଆ ଆଦି ଗ୍ରାମର ଲୋକେ ଭୟଭୀତ ହୋଇଯାଇଛନ୍ତି। ନଦୀରେ ବନ୍ୟା ପାଣି ଆସି ବନ୍ଧ ଭାଙ୍ଗିଲେ ନାଉଗାଁ ବ୍ଲକ ସମେତ ବାଲିକୁଦା ବ୍ଳକର ମାଛଗଁା ଅଞ୍ଚଳ ବାଲିଚର ହେବାର ସମ୍ଭାବନା ରହିଛି। ତେଣୁ ଉକ୍ତ ନଦୀ ପଠାକୁ ସ୍ଥାୟୀ ମରାମତି କରିବା ପାଇଁ ଦେବେନ୍ଦ୍ର ସ୍ବାଇଁ, ନାରାୟଣ ସ୍ବାଇଁ, ସମୀର ପରିଡା,କୈଳାସ ସ୍ବାଇଁ ପ୍ରମୁଖ ପ୍ରଶାସନ ନିକଟରେ ଦାବି କରିଛନ୍ତି। ନଦୀ ବନ୍ଧ ମରାମତି ସମ୍ପର୍କରେ ଅଲଣାହାଟ ଜଳ ସମ୍ପଦ ବିଭାଗ ଯନ୍ତ୍ରୀ ଦେବୀ ମିଶ୍ର କହିଛନ୍ତି, ନଦୀ ବନ୍ଧ ନିକଟକୁ ଯାଇ ସ୍ଥିତି ଅନୁଧ୍ୟାନ କରିବା ପରେ ଆବଶ୍ୟକ ପଦକ୍ଷେପ ନିଆଯିବ। ବିଶେଷ କରି ଯେଉଁ ସ୍ଥାନରେ ଅତଡା ଖସୁଛି ସେଠାରେ ବାଲିବସ୍ତା ପ୍ୟାକିଂ କରାଯିବ।
