ଜଗତ୍ସିଂହପୁର ଅଫିସ, ୧୩।୮: ରାଜ୍ୟ ସରକାର ବିକାଶ ନାଁରେ ଡେଙ୍ଗୁରା ପିଟୁଛନ୍ତି। କିନ୍ତୁ ଜଗତ୍ସିଂହପୁର ଭଳି ଉପକୂଳବର୍ତ୍ତୀ ଶିକ୍ଷିତ ଜିଲାରେ ବି ଲୋକେ ମୌଳିକ ସୁବିଧାରୁ ବଞ୍ଚିତ ହେଉଛନ୍ତି। ଏପରି କି ଜିଲା ମୁଖ୍ୟାଳୟଠାରୁ ମାତ୍ର ୧୦ କିଲୋମିଟର ଦୂର ଜଗତ୍ସିଂହପୁର ଜଳ ସମ୍ପଦ ବିଭାଗ ଅଧୀନ ୧୦ ନମ୍ବର ମୁଖ୍ୟ କେନାଲ ରାସ୍ତା ଅବସ୍ଥା ଲୋକଙ୍କ ଚିନ୍ତାର କାରଣ ହେଲାଣି। ଦୀର୍ଘ ୩୯ ବର୍ଷ ତଳୁ ଏହି ରାସ୍ତା ଅର୍ଥାତ୍ ଅରଣ ଗ୍ରାମଠାରୁ ବେଗୁନିଆ ପର୍ଯ୍ୟନ୍ତ ମୋରମ ହୋଇଥିଲ। ଦୁଃଖର କଥା ହେଲା ତା’ପରଠାରୁ ପ୍ରତିବର୍ଷ ରାସ୍ତା ମରାମତି ହେଉଛି। ମାତ୍ର ମରାମତି ନାଁରେ ଲକ୍ଷାଧିକ ଟଙ୍କା ଚଳୁ ହେଉଛି। ଗତ ୧୦ ବର୍ଷ ମଧ୍ୟରେ ରାସ୍ତା ମରାମତି ପାଇଁ ଏକ କୋଟିରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇଥିବା ନେଇ ସାଧାରଣରେ ଅଭିଯୋଗ ହୋଇଛି।
କିନ୍ତୁ ରାସ୍ତା ଅବସ୍ଥା ଯଥା ପୂବଂ ତଥା ପର। ୨୦୨୦ ତିର୍ତ୍ତୋଲ ବିଧାନସଭା ଉପନିର୍ବାଚନରେ ଏହି କେନାଲ ରାସ୍ତା ସମସ୍ୟାକୁ ନେଇ ଲୋକେ ଭୋଟ ବର୍ଜନ କରିଥିଲେ। ସେତେବେଳେ ଲୋକେ ଏହି ବିଷୟରେ ମୁଖ୍ୟମନ୍ତ୍ରୀ, ଜଳ ସମ୍ପଦ ମନ୍ତ୍ରୀ, ଜିଲାପାଳଙ୍କ ସମେତ ଗଣମାଧ୍ୟମ ପ୍ରତିନିଧିଙ୍କୁ ଅବଗତ କରାଇଥିଲେ। ଜନ ଅସନ୍ତୋଷ ଦେଖି ରାଜନେତାମାନେ ଅନେକ ପ୍ରତିଶ୍ରୁତି ଦେଇଥିଲେ। କିନ୍ତୁ ଏ ପର୍ଯ୍ୟନ୍ତ ରାସ୍ତା ଅବସ୍ଥାରେ କୌଣସି ସୁଧାର ଆସିନାହିଁ। ଏହି ପ୍ରସଙ୍ଗକୁ ନେଇ ଶୁକ୍ରବାର ଗୋପାଳପୁର ସରପଞ୍ଚ ରଶ୍ମିରଞ୍ଜନ ଦାଶ ଜଗତ୍ସିଂହପୁର ଜିଲା ପରିଷଦ ମୁଖ୍ୟ ବିକାଶ ତଥା କାର୍ଯ୍ୟନିର୍ବାହୀ ଅଧିକାରୀ ରୁଦ୍ରପ୍ରସାଦ ଦାଶଙ୍କୁ ସାକ୍ଷାତପୂର୍ବକ ଚିଠି ଦେଇ ସ୍ଥାୟୀ ସମାଧାନ ପାଇଁ ଦାବି କରିଛନ୍ତି। ସେ ଦର୍ଶାଇଛନ୍ତି, ଉକ୍ତ ରାସ୍ତା ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର କରାଯାଉ। ଏଥିସହ ରାସ୍ତା ପିଚୁ କିମ୍ବା ଢଳେଇ କରାଗଲେ ୬ ପଞ୍ଚାୟତର ଶହସ୍ରାଧିକ ଲୋକେ ଉପକୃତ ହେବେ। ଏହି ପ୍ରସଙ୍ଗକୁ ଗୁରୁତ୍ୱ ଦେଇ ଜିଲା ପରିଷଦ ମୁଖ୍ୟ ବିକାଶ ଅଧିକାରୀ ଦାଶ ନିଜେ ରାସ୍ତା ଅନୁଧ୍ୟାନ କରି ସ୍ଥାୟୀ ପ୍ରତିକାର ପାଇଁ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିବା ସରପଞ୍ଚ ସୂଚନା ଦେଇଛନ୍ତି।
ସରପଞ୍ଚ ଦାଶ ଏକଥା ମଧ୍ୟ ଦର୍ଶାଇଛନ୍ତି, ଅରଣ ନିକଟବର୍ତ୍ତୀ କୀର୍ତ୍ତନପୁରଠାରୁ ବେଗୁନିଆ ଗ୍ରାମକୁ ସଂଯୋଗ କରୁଥିବା ଦୀର୍ଘ ୪ କିଲୋମିଟର ବିଶିଷ୍ଟ ଏହି କେନାଲ ବନ୍ଧରେ ପ୍ରତିଦିନ ଗୋପାଳପୁର ପଞ୍ଚାୟତର ଇଦ୍ରାକ୍ଷାପୁର, ଗୋପାଳପୁର, ମଇଦିପୁର, କଟରା ପଞ୍ଚାୟତର ହାଜିନଗର, କୋରକୋର, ବିରିତୋଳ ପଞ୍ଚାୟତର ସଲମପୁର (କଣ୍ଟିଗଡିଆ), ସଁଅରା, କନକପୁର ଓ ପଟିଲୋ ପଞ୍ଚାୟତର ପାଖାପାଖି ୨ ହଜାରରୁ ଅଧିକ ଲୋକ ଯାତାୟାତ କରନ୍ତି। କିନ୍ତୁ ବର୍ଷା ଋତୁରେ ଏହି ପଞ୍ଚାୟତର ଲୋକଙ୍କ ଦୁର୍ଦ୍ଦଶା ବଢ଼ିଯାଏ। କେନାଲ ବନ୍ଧର ଅନେକ ସ୍ଥାନ ବୁଡ଼ିଯିବା ସହ କିଛି ସ୍ଥାନରେ ଘାଇ ସୃଷ୍ଟି ହୋଇ ଚାଷ ନଷ୍ଟ ହୋଇଯାଏ। ଯାତାୟାତ ବାଧାପ୍ରାପ୍ତ ହୋଇଥାଏ। ବିଦ୍ୟାର୍ଥୀମାନେ ଶିକ୍ଷା ଗ୍ରହଣରୁ ବଞ୍ଚତ୍ତ ହୋଇଥାନ୍ତି। ଜରୁରୀ ପରିସ୍ଥିତିରେ ଦମକଳ ସେବା ଓ ରିଲିଫ ଯୋଗାଣ ମଧ୍ୟ ବିଳମ୍ବିତ ହୋଇଥାଏ। ଏପରି କି ଆମ୍ବୁଲାନ୍ସ ସେବା ଠିକ ସମୟରେ ମିଳିପାରେ ନାହିଁ। ଏସବୁ ସମସ୍ୟା ଉପରେ ବହୁବାର ପ୍ରଶାସନକୁ ଅବଗତ କରାଯାଇଥିଲେ ସୁଦ୍ଧା ଏ ପର୍ଯ୍ୟନ୍ତ କୌଣସି ଫଳ ମିଳିପାରିଲାନାହିଁ।
