ନୂଆଦିଲ୍ଲୀ,୧୨ା୧୧: ଉଚ୍ଚତର ଅଦାଲତଗୁଡ଼ିକରେ ବିଚାରପତି ନିଯୁକ୍ତି ଲାଗି ନାମ ସୁପାରିସ ସତ୍ତ୍ୱେ କେନ୍ଦ୍ର ସରକାର ଏହାକୁ ପକାଇ ରଖିଥିବାରୁ ସୁପ୍ରିମକୋର୍ଟ ଶୁକ୍ରବାର ଅସନ୍ତୋଷ ବ୍ୟକ୍ତ କରିଛନ୍ତି। ଏପରିକି ସୁପ୍ରିମକୋର୍ଟ କଲେଜିୟମ ଏନେଇ ସରକାରଙ୍କୁ ସ୍ମରଣ କରାଇବା ସତ୍ତ୍ୱେ ନିଯୁକ୍ତି ଦିଆଯାଉ ନାହିଁ। ଏହା ଗ୍ରହଣୀୟ ନୁହେଁ ବୋଲି ଜଷ୍ଟିସ୍ ଏସ୍.କେ. କୌଲ ଏବଂ ଏ.ଏସ୍. ଓକାଙ୍କ ଖଣ୍ଡପୀଠ କହିଛନ୍ତି। ଉଚ୍ଚତର କୋର୍ଟରେ ନିଯୁକ୍ତି ଲାଗି ସୁପାରିସ ହୋଇଥିବା ବିଚାରପତିଙ୍କ ନାଁକୁ ଝୁଲାଇ ରଖି ସେମାନଙ୍କ ସହମତି ହାସଲ କରିବା ଏକପ୍ରକାର କୌଶଳରେ ପରିଣତ ହୋଇଥିବା ଖଣ୍ଡପୀଠ ଟିପ୍ପଣୀ ଦେଇଛନ୍ତି। ଏନେଇ ଖଣ୍ଡପୀଠ କେନ୍ଦ୍ର ଆଇନ ମନ୍ତ୍ରଣାଳୟର ପଦସ୍ଥ ସଚିବ (ନ୍ୟାୟ)ଙ୍କୁ ନୋଟିସ ଜାରି କରି ଜବାବ ମାଗିଛନ୍ତି। ଠିକ୍ ସମୟରେ ବିଚାରପତି ନିଯୁକ୍ତି ଲାଗି ଗତବର୍ଷ ଏପ୍ରିଲ ୨୦ରେ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିବାବେଳେ ଏପର୍ଯ୍ୟନ୍ତ ତାହା କାର୍ଯ୍ୟକାରୀ ହୋଇ ନ ଥିବାରୁ ବେଙ୍ଗାଲୁରୁର ଆଇନଜୀବୀ ସଂଘ ପକ୍ଷରୁ ଏହା ବିରୋଧରେ ପିଟିଶନ ଦାଏର ହୋଇଥିଲା।
