ପାଟକୁରା,୧୨ା୧୧(ଡି.ଏନ.ଏ.): କେନ୍ଦ୍ରାପଡ଼ା ଜିଲା ପାଟକୁରା ନିର୍ବାଚନମଣ୍ଡଳୀ ଅନ୍ତର୍ଗତ ଗରଦପୁର ବ୍ଲକ ଏବେ ଦୁର୍ନୀତିର ଗନ୍ତାଘର ସାଜିଛି। ଉନ୍ନୟନ ଅର୍ଥର ବ୍ୟାପକ ହେରଫେର ହୋଇଛି। ଏପରି ଅଭିଯୋଗର ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ରାଷ୍ଟ୍ରୀୟ ମଧ୍ୟବିତ ପରିବାର ମହାସଂଘ ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଲିଖିତ ଦାବିପତ୍ର ଗୁରୁବାର ବିଡିଓଙ୍କୁ ପ୍ରଦାନ କରାଯାଇଛି। ଏ ସମ୍ପର୍କରେ ରାଜ୍ୟ ସଭାପତି ପ୍ରଦୀପ ମିଶ୍ର କହିଛନ୍ତି, ଆଞ୍ଚଳିକ ଉନ୍ନୟନ ପାଇଁ ବିଭିନ୍ନ ଉନ୍ନୟନ ଯୋଜନାରେ ଏହି ବ୍ଲକକୁ ଅନୁଦାନ ଆସୁଛି। ତେବେ ଏଠାରେ ସ୍ଥାନୀୟ ପ୍ରଶାସନ ସ୍ଥାଣୁ ପାଲଟି ଯାଇଛି। କେତେକ ମୁଷ୍ଟିମେୟ ରାଜନେତା ଓ ନିର୍ବାଚିତ ପ୍ରତିନିଧିମାନେ ପ୍ରଶାସକଙ୍କୁ ହାତରେ ରଖି ଅର୍ଥ ହଡପ କରୁଥିବା ଅଭିଯାଗରେ ଉଲ୍ଲେଖ ରହିଛି। ଫଳରେ ବହୁ ସମୟରେ ସରକାରଙ୍କ ଦ୍ୱାରା ସାଧାରଣ ଜନତାଙ୍କ ପାଇଁ ଉଦ୍ଦିଷ୍ଟ ବିଭିନ୍ନ ଲୋକାଭିମୁଖୀ ଯୋଜନାର ହେରଫେର ହେଉଥିବା ଅଭିଯୋଗ ହୋଇଛି। ସେହିପରି ସୂଚନା ଅଧିକାର ଆଇନ ତଥ୍ୟ ପ୍ରଦାନ କରାଯାଉନାହିଁ। ଏଥିପାଇଁ ୨ଥର ପ୍ରଶାସକଙ୍କୁ ଜରିମାନା ଦେବାକୁ ପଡିଛି। ଗରଦପୁର ବ୍ଲକରେ ହୋଇଥିବା ସମସ୍ତ ଉନ୍ନୟନ କାର୍ଯ୍ୟର ସ୍ବତନ୍ତ୍ର ଅଡିଟ କରାଯାଉ। ଏହାସହ ଦୁର୍ନୀତିରେ ଲିପ୍ତଥିବା ପ୍ରଶାସକ ଓ ଲୋକ ପ୍ରତିନିଧିମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ମହାସଂଘ ପକ୍ଷରୁ ଦାବି କରାଯାଇଥିବା ରାଜ୍ୟ ସଭାପତି ମିଶ୍ର ସୂଚନା ଦେଇଛନ୍ତି। ଏହି ଦାବିପତ୍ର ପ୍ରଦାନ ସମୟରେ ମହାସଂଘର କେନ୍ଦ୍ରାପଡ଼ା ଜିଲା ସଭାପତି ନିରଞ୍ଜନ ପରିଡା, ସମ୍ପାଦକ ଆଶିଷ ବେହେରା, ରାଜ୍ୟ ସମ୍ପାଦକ ହରେକୃଷ୍ଣ ପାତ୍ର, ଜିଲା କାର୍ଯ୍ୟକାରିଣୀ ସଦସ୍ୟ ଅମର ମହାପାତ୍ର, ଧନେଶ୍ୱର ପଟ୍ଟନାୟକ, ମାଧବ ରଥ, ନିରଞ୍ଜନ ଶତପଥୀ ପ୍ରମୁଖ ସାମିଲ ହୋଇଥିଲେ।
