ମୁମ୍ବାଇ: ୨୯।୧: ବ୍ରିଟିଶ୍ ବ୍ରଡ୍କାଷ୍ଟିଂ କର୍ପୋରେଶନ୍ (ବିବିସି) ପକ୍ଷରୁ ପ୍ରସ୍ତୁତ ଡକ୍ୟୁମେଣ୍ଟାରିକୁ ନେଇ ବିବାଦ ଥମିବାର ନାଁ ନେଉନାହିଁ। ୨୦୦୨ ଗୁଜରାଟ ଦଙ୍ଗାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭୂମିକାକୁ ନେଇ ତିଆରି ହୋଇଥିବା ‘ଇଣ୍ଡିଆ: ଦ ମୋଦି କ୍ୱୋଶ୍ଚିନ୍’କୁ ନେଇ ବିଭିନ୍ନ କଲେଜ ପରିସରରେ ବିଶୃଙ୍ଖଳା ବାତାବରଣ ଦିନକୁ ଦିନ ବଢ଼ିବାରେ ଲାଗିଛି। ଶନିବାର ଟାଟା ଇନ୍ଷ୍ଟି-ଚ୍ୟୁଟ ଅଫ୍ ସୋସିଆଲ ସାଇନସେସ୍ (ଟିସ୍) କର୍ତ୍ତୃପକ୍ଷଙ୍କ ବାରଣ ସତ୍ତ୍ୱେ କେତେଜଣ ଛାତ୍ରୀଛାତ୍ର ମୋବାଇଲ୍ରେ କଲେଜ ପରିସରରେ ବିବିସି ଡକ୍ୟୁମେଣ୍ଟାରି ଦେଖିଛନ୍ତି। କ୍ୟାମ୍ପସ ବାହାରେ ଭାରତୀୟ ଜନତା ଯୁବ ମୋର୍ଚ୍ଚା (ବିଜଓ୍ବୋଇଏମ୍), ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିଭିପି), ଭାଜପା ଏବଂ ଆର୍ଏସ୍ଏସ୍ ସମର୍ଥକଙ୍କ ଦ୍ୱାରା ଡକ୍ୟୁମେଣ୍ଟାରି ପ୍ରଦର୍ଶନକୁ ନେଇ ପ୍ରତିବାଦ କରାଯାଇଥିଲା। ଘଟଣାସ୍ଥଳରେ ପୋଲିସ ପହଞ୍ଚି ସେମାନଙ୍କୁ ଆୟତ୍ତ କରିଥିଲା।
ଅନ୍ୟପକ୍ଷେ ବିବିସି ସିରିଜ୍ ସ୍କ୍ରିନିଂକୁ ନେଇ ଦିଲ୍ଲୀ ୟୁନିଭର୍ସିଟି ଆର୍ଟସ୍ ଫାକଲ୍ଟିଜ୍ଙ୍କ ବିଲ୍ଡିଂ ସମ୍ମୁଖରେ ଛାତ୍ରୀ ଗୋଷ୍ଠୀଙ୍କ ଦ୍ୱାରା କରାଯାଇଥିବା ହଙ୍ଗାମାର ତଦନ୍ତ ପାଇଁ ୟୁନିଭର୍ସିଟି କର୍ତ୍ତୃପକ୍ଷ ଶନିବାର ୭ ଜଣିଆ ସଦସ୍ୟ ବିଶିଷ୍ଟ ଏକ କମିଟି ଗଠନ କରିଛନ୍ତି। ତେବେ କମିଟି ଆସନ୍ତା ୩୦ ତାରିଖ ସନ୍ଧ୍ୟା ୫ଟା ସୁଦ୍ଧା କୁଳପତି ଯୋଗେଶ ସିଂଙ୍କୁ ଏ ସଂକ୍ରାନ୍ତରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି।
