ଓଡେନ୍ସ,୧।୧୦(ପି.ଟି.): ଟୋକିଓ ଅଲିମ୍ପିକ୍ସ ଖେଳିବାର ସମ୍ଭାବନା ସୃଷ୍ଟି କରିଥିବା ବ୍ୟାଡମିଣ୍ଟନ ତାରକା କିଡାମ୍ବୀ ଶ୍ରୀକାନ୍ତ ଓ ସାଇନା ନେହ୍ବାଲ ଆଗକୁ ଆୟୋଜନ ହେବାକୁ ଥିବା ଡେନ୍ମାର୍କ ଓପନ୍ରେ ସୁବିଧାଜନକ ଡ୍ର’ରେ ସ୍ଥାନିତ ହୋଇଛନ୍ତି। କୋଭିଡ୍-୧୯ ମହାମାରୀ କାରଣରୁ ଦୀର୍ଘ ୭ମାସ ଧରି ବ୍ୟାଡ୍ମିଣ୍ଟନ ବେଶ୍ ପ୍ରଭାବିତ ହୋଇଥିଲା। ପରିବର୍ତ୍ତିତ କ୍ୟାଲେଣ୍ଡରରେ ଡେନ୍ମାର୍କ ଓପନ୍ ସୁପର ୭୫୦ ଟୁର୍ନାମେଣ୍ଟ ସ୍ଥାନ ପାଇଛି।
ଟୋକିଓ ଅଲିମ୍ପିକ୍ସ ପଦକ ଆଶାରେ ଥିବା ସାଇନା ଓ ଶ୍ରୀକାନ୍ତ ୭ ଲକ୍ଷ ୫୦ ହଜାର ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଟୁର୍ନାମେଣ୍ଟରେ ଅଂଶଗ୍ରହଣ କରି ମୂଲ୍ୟବାନ ର଼୍ୟାଙ୍କିଙ୍ଗ୍ ପଏଣ୍ଟ ହାସ କରିବା ଲକ୍ଷ୍ୟରେ ରହିଛନ୍ତି। ଏହା ଦ୍ୱାରା ଟେକିଓ ଅଲିମ୍ପିକ୍ସରେ ଭାଗନେବା ପ୍ରକ୍ରିୟା ସହଜ ହେବ। ଅଲ୍ ଇଂଲଣ୍ଡ ଚାମ୍ପିୟନଶିପ୍ ପରେ ଏକମାତ୍ର ଇଭେଣ୍ଟ ଭାବେ ଏହି ଟୁର୍ନାମେଣ୍ଟ ଅକ୍ଟୋବର ୧୩ ତାରିଖରୁ ଆରମ୍ଭ ହେବ।
ରିଓ ଅଲିମ୍ପିକ୍ସ କ୍ୱାର୍ଟର ଫାଇନାଲକୁ ଉଠିଥିବା ଶ୍ରୀକାନ୍ତ ପୁରୁଷ ସିଙ୍ଗଲ୍ସରେ ଇଂଲଣ୍ଡର ଟୋବି ପେଣ୍ଟିଙ୍କ ବିପକ୍ଷରୁ ଅଭିଯାନ ଆରମ୍ଭ କରିବେ। ଦ୍ୱିତୀୟ ରାଉଣ୍ଡରେ ସେ ନିଜର ଦେଶର ଶୁଭଙ୍କର ଦେ’ଙ୍କୁ ଭେଟିବେ। ଶୁଭଙ୍କର କାନାଡ଼ାର ଆନ୍ଥୋନୀ ହୋ- ଶୁଏଙ୍କୁ ପ୍ରଥମ ରାଉଣ୍ଡରେ ଭେଟିବେ। କ୍ୱାର୍ଟର ଫାଇନାଲରେ ଶ୍ରୀକାନ୍ତ ପ୍ରବେଶ କଲେ ତାଇଓ୍ବାନର ଚୋଉ ତିଏନ ଚେନ୍ଙ୍କୁ ଭେଟିବାର ସମ୍ଭାବନା ରହିଛି।
ସେହିପରି ବିଶ୍ୱର ୨୦ ନମ୍ବର ଖେଳାଳି ସାଇନା ମହିଳା ସିଙ୍ଗଲ୍ସରେ ଫ୍ରାନ୍ସର ୟାଲେ ହୋୟାଉକ୍ସଙ୍କୁ ପ୍ରଥମ ରାଉଣ୍ଡରେ ଭେଟିବେ। ସେହିପରି ସେ ଦ୍ୱିତୀୟ ରାଉଣ୍ଡରେ ସ୍ଥାନୀୟ ଖେଳାଳି ତଥା ସପ୍ତମ ସିଡ୍ ଖେଳାଳି ମିଆ ବ୍ଲିଚ୍ଫେଲଟ୍ଙ୍କୁ ପରବର୍ତ୍ତୀ ରାଉଣ୍ଡରେ ଭେଟିବେ। ଯଦି ଏହି ଦୁଇ ରାଉଣ୍ଡ ଅତିକ୍ରମ କରିନ୍ତ ସାଇନା ପରବର୍ତ୍ତୀ ପର୍ଯ୍ୟାୟରେ କାନାଡ଼ାର ମିଚେଲେ ଲିଙ୍କୁ ଭେଟିବେ।
ଅନ୍ୟମାନଙ୍କ ମଧ୍ୟରେ ସାଇନାଙ୍କ ସ୍ବାମୀ ତଥା ପୂର୍ବତନ ବିଶ୍ୱ ୬ ନମ୍ବର ଖେଳାଳି ତଥା ଲଣ୍ଡନ ଅଲିମ୍ପିକ୍ସ କ୍ୱାର୍ଟର ଫାଇନାଲିଷ୍ଟ ପାରୁପାଲ୍ଲୀ କାଶ୍ୟପ୍ ଜାପାନର କୋକି ଓ୍ବାଟାନାବେଙ୍କ ବିପକ୍ଷରୁ ଅଭିଯାନ ଆରମ୍ଭ କରିବେ। ଯଦି ସେ ବିଜୟୀ ହେବେ ତେବେ ସେ ବିଶ୍ୱର ୧ ନମ୍ବର ଖେଳାଳି କେଣ୍ଟୋ ମୋମୋଟାଙ୍କୁ ଭେଟିବେ। ସେହିପରି ଉଦୀୟମାନ ଖେଳାଳି ଲକ୍ଷ୍ୟ ସେନ୍ ଫ୍ରାନ୍ସର କ୍ରିଷ୍ଟୋ ପୋପୋଭଙ୍କୁ ଭେଟିବେ। ଯଦି ବିଜୟୀ ହୁଅନ୍ତି ସେ ଚତୁର୍ଥ ସିଡ୍ ଜାପାନର କାଣ୍ଟା ସୁନେୟାମାଙ୍କୁ ଭେଟିବେ। ସେହିପରି ବିଶ୍ୱର ପୂର୍ବତନ ୧୩ ନମ୍ବର ଖେଳାଳି ଅଜୟ ଜୟରାମ ତୃତୀୟ ସିଡ୍ ସ୍ଥାନୀୟ ଖେଳାଳି ଆନ୍ଦ୍ରେସ୍ ଆଣ୍ଟୋନସେନଙ୍କୁ ଭେଟିବେ।
