ଭୁବନେଶ୍ୱର,୧୬ା୯(ଅଭିଜିତ ଦାସ): ରାଜ୍ୟରେ ଡେଙ୍ଗୁ ସ୍ଥିତି ଦିନକୁ ଦିନ ସଙ୍ଗିନ ହେବାରେ ଲାଗିଛି। ଜ୍ୱର ହେଲେ ଲୋକଙ୍କୁ ଡେଙ୍ଗୁ ଭୟ ଘାରୁଛି। ଘରେ ଘରେ ଜ୍ୱର ବ୍ୟାପୁଥିବାବେଳେ ଡାକ୍ତରଖାନାରେ ଭିଡ଼ ଜମୁଛି। ଟିକେଟ କାଉଣ୍ଟରଠାରୁ ଆରମ୍ଭ କରି ଡାକ୍ତରଙ୍କ ଚାମ୍ବର ଓ ଟେଷ୍ଟିଂ ସେଣ୍ଟରରେ ଜ୍ୱର ରୋଗୀଙ୍କ ଲମ୍ବା ଧାଡ଼ି ଲାଗୁଛି। ସ୍ଥିତି ଏପରି ହେଉଛି ଅଧିକାଂଶ ରୋଗୀ ଏତେ ସମୟ ଅପେକ୍ଷା ନ କରି କେବଳ ମେଡିସିନ୍ ଧରି ଘରକୁ ଫେରୁଥିବା ଦେଖିବାକୁ ମିଳୁଛି। ପୁଣି ଯେତିକି ନମୁନା ପରୀକ୍ଷା ହେଉଛି ସେଥିରୁ ଡେଙ୍ଗୁ ପଜିଟିଭ୍ ହାର ମଧ୍ୟ ବଢ଼ି ଚାଲିଛି। ଏଥିରୁ ଡେଙ୍ଗୁ ମୁକାବିଲା କ୍ଷେତ୍ରରେ ସ୍ବାସ୍ଥ୍ୟ ବିଭାଗର ପଦକ୍ଷେପ ଗ୍ରହଣ କାଟୁ କରୁ ନ ଥିବା ବାରି ହୋଇପଡୁଛି। ସ୍ଥିତି ନିୟନ୍ତ୍ରଣରେ ଥିବା ବିଭାଗ କହୁଥିବାବେଳେ ଇତିମଧ୍ୟରେ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ୬ ହଜାର ପାର୍ କରିଛି। ଗତବର୍ଷ ଭଳି ଚଳିତବର୍ଷ ମଧ୍ୟ ଖୋର୍ଦ୍ଧା ଜିଲା ଡେଙ୍ଗୁ ହଟସ୍ପଟ୍ ପାଲଟିଥିବାବେଳେ ଏହା ତଳକୁ ଥିବା ପୁରୀ ଜିଲାରେ ଆକ୍ରାନ୍ତଙ୍କ ସଂଖ୍ୟା ହୁ ହୁ ବଢିବାରେ ଲାଗିଛି।
ଜନସ୍ବାସ୍ଥ୍ୟ ବିଭାଗର ତଥ୍ୟ ଅନୁଯାୟୀ, ରାଜ୍ୟର ବିଭିନ୍ନ ଜିଲାରେ ୧୪ ତାରିଖ ସୁଦ୍ଧା ୭୭,୦୦୧ ରକ୍ତ ନମୁନା ପରୀକ୍ଷଣ ହୋଇଥିବାବେଳେ ସେଥିରୁ ୬୦୬୮ ଡେଙ୍ଗୁ ପଜିଟିଭ ବାହାରିଛି। ଗତବର୍ଷ ୩ ହଜାର ୪୮୨ ଜଣ ଡେଙ୍ଗୁ ଆକ୍ରାନ୍ତ ଚିହ୍ନଟ ହୋଇଥିବାବେଳେ ଚଳିତବର୍ଷ ଏହି ସଂଖ୍ୟାରେ ୨ ଗୁଣା ବୃଦ୍ଧି ହୋଇଛି। ତେବେ ଖୋର୍ଦ୍ଧା ଜିଲାରେ ସର୍ବାଧିକ ୨ ହଜାର ୬୦୪ ଜଣ ଡେଙ୍ଗୁ ଆକ୍ରାନ୍ତ ଚିହ୍ନଟ ହୋଇଛନ୍ତି। ସେହିପରି ପୁରୀ ଜିଲାରେ ୬୭୨, କଟକରେ ୫୫୭, ବାଲେଶ୍ୱରରେ ୫୬୨, ଜଗତସିଂହପୁରରେ ୩୦୮ ଓ ନୟାଗଡ ଜିଲାରେ ୨୨୪ ଡେଙ୍ଗୁ ରୋଗୀ ରହିଛନ୍ତି। ୧୦ଟି ଜିଲାରେ ଆକ୍ରାନ୍ତଙ୍କ ସଂଖ୍ୟା ୨୦ ତଳକୁ ଥିବାବେଳେ ବୌଦ୍ଧ ଜିଲାରେ ଜଣେ ପଜିଟିଭ ଚିହ୍ନଟ ହୋଇଛନ୍ତି। ଇତି ମଧ୍ୟରେ ପୁରୀ ଓ ବାଲେଶ୍ୱର ଜିଲାରେ କ୍ରମଶଃ ଡେଙ୍ଗୁ ରୋଗୀଙ୍କ ସଂଖ୍ୟା ବଢିବାରେ ଲାଗଛି। ଅନ୍ୟପକ୍ଷରେ ଅଧିକାଂଶ ଡେଙ୍ଗୁ ରୋଗୀ ଭୁବନେଶ୍ୱର ମହାନଗର ନିଗମ(ବିଏମ୍ସି)ର ନୟାପଲ୍ଲୀ, ଶହୀଦନଗର ଓ ଯୁନିଟ-୯ ଅଞ୍ଚଳରେ ଚିହ୍ନଟ ହୋଇଥିବାବେଳେ ଉଭୟ ବିଏମ୍ସି ଓ ସ୍ବାସ୍ଥ୍ୟ ବିଭାଗ ପକ୍ଷରୁ ସେପରି ଦୃଢ଼ ଓ ସଫଳ ପଦକ୍ଷେପ ଗ୍ରହଣ କରାଯାଇ ନ ଥିବା ଅଭିଯୋଗ ହେଉଛି। ଚଳିତବର୍ଷ ଜୁନ୍ରୁ ଡେଙ୍ଗୁ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି। ବିଭାଗ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଜରିଆରେ ଡେଙ୍ଗୁ ରୋକିବା ପାଇଁ ପଦକ୍ଷେପ ନିଆଯାଉଥିବା କୁହାଯାଉଥିଲେ ମଧ୍ୟ ଆକ୍ରାନ୍ତଙ୍କ ଉପରେ ରୋକ୍ ଲାଗିପାରୁନାହିଁ। ସେହିପରି ପୂର୍ବରୁ ସେପ୍ଟେମ୍ବର ଯାଏ ସତର୍କତା ଜାରି କରାଯାଇଥିବାବେଳେ ଏବେ ବିଭାଗ ପକ୍ଷରୁ ଅକ୍ଟୋବର ଯାଏ ସଚେତନ ରହିବାକୁ ନିର୍ଦ୍ଦେଶ ଜାରି କରାଯାଇଛି।
