ହାଇଦ୍ରାବାଦ୍,୧୮।୧: ତେଲେଙ୍ଗାନାରେ ଶାସକ ଭାରତ ରାଷ୍ଟ୍ର ସମିତି (ବିଆରଏସ) ଖମ୍ମମରେ ଏକ ସାଧାରଣ ସଭାର ଆୟୋଜନ କରିଥିଲେ। ସାଧାରଣ ସଭାରେ ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ(କେସିଆର)ଙ୍କ ଉପସ୍ଥିତିରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ପଞ୍ଜାବର ମୁଖ୍ୟମନ୍ତ୍ରୀ ଭାଗବନ୍ତ ମାନ, କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନ, ସମାଜବାଦୀ ପାର୍ଟି ସଭାପତି ଅଖିଳେଶ ଯାଦବ ଏବଂ ସିପିଆଇ ସାଧାରଣ ସମ୍ପାଦକ ଡି.ରାଜା ସାମିଲ ହୋଇଥିଲେ।
ସଭାକୁ ସମ୍ବୋଧିତ କରି ଅଖିଳେଶ ଯାଦବ କହିଛନ୍ତି, ଆଗାମୀ ନିର୍ବାଚନରେ ଭାଜପାର ପରାଜୟ ନିଶ୍ଚିତ। ଫାସିଷ୍ଟ ମନୋଭାବ ଉପରେ ପ୍ରଶ୍ନ କରୁଥିବା ନେତାମାନଙ୍କୁ ହଇରାଣ କରିବା କେନ୍ଦ୍ରର ଅଭ୍ୟାସରେ ପରିଣତ ହୋଇଛି। ଜାନୁଆରୀରୁ ସୂର୍ଯ୍ୟ ଉତ୍ତରାୟଣକୁ ଯାଇଛନ୍ତି। ଜାତୀୟ ରାଜନୀତି ଦକ୍ଷିଣାୟନକୁ ଆସୁଛି।
ତେଲେଙ୍ଗାନାରେ ବିଆରଏସ ବୈଠକରେ କେରଳର ମୁଖ୍ୟମନ୍ତ୍ରୀ ପିନାରାଇ ବିଜୟନ କହିଛନ୍ତି, କେନ୍ଦ୍ରରେ ଶାସକ ଭାଜପା ଗଣତନ୍ତ୍ରର ମୂଳଦୁଆକୁ ନଷ୍ଟ କରିବାକୁ ଚାହୁଁଛି। ଆଜି ଆମେ ଏକ ନୂତନ ପ୍ରତିରୋଧ ଆରମ୍ଭ କରୁଛୁ। ଆମର ସମସ୍ତ ମାତୃଭାଷାକୁ ପୃଥକ କରି ହିନ୍ଦୀକୁ ଜାତୀୟ ଭାଷା ଭାବରେ ଚିତ୍ରଣ କରିବାକୁ ପ୍ରୟାସ କରାଯାଉଛି। ଆମର ମାତୃଭାଷାକୁ ହଟାଇ ହିନ୍ଦୀ ପ୍ରୟୋଗ କଲେ ଜାତିର ଅଖଣ୍ଡତା ପ୍ରଭାବିତ ହେବ।
ଦିଲ୍ଲୀ ମୁଖ୍ୟମନ୍ତ୍ରର ଅରବିନ୍ଦ କେଜ୍ରିୱାଲ କହିଛନ୍ତି, ପ୍ରଥମ ଥର ପାଇଁ ଏହି ଦେଶରେ ନେତାମାନେ ଏକାଠି ହେଉଛନ୍ତି। ଏହା ଏକ ଭଲ ଖବର। ବେରୋଜଗାର କିମ୍ବା ଦ୍ରବ୍ୟର ମୂଲ୍ୟ ବୃଦ୍ଧି ଉପରେ ପ୍ରଧାନମନ୍ତ୍ରୀ ମୋଦି ଗୁରୁତ୍ୱ ଦେଉ ନାହାଁନ୍ତି। ଅଣ-ଭାଜପା ସରକାରଗୁଡିକୁ କେମିତି ପତନ କରିବା କେନ୍ଦ୍ର ସରକାରଙ୍କୁ ଏହି ଗୋଟିଏ ଚିନ୍ତା ଘାରିଛି।
ସେହିପରି କେସିଆର କେନ୍ଦ୍ର ସରକାରଙ୍କ ବିରୋଧ କର୍ନାଟକ-ତାମିଲନାଡୁ ଏବଂ ତେଲେଙ୍ଗାନା-ଆନ୍ଧ୍ରପ୍ରଦେଶ ଭଳି ରାଜ୍ୟ ମଧ୍ୟରେ ଜଳ ଯୁଦ୍ଧ ଆରମ୍ଭ କରିଥିବା ଅଭିଯୋଗ କରିଛି। ଭୁଲ ନୀତି ଯୋଗୁ ଦେଶରେ ବିଦ୍ୟୁତ ସଙ୍କଟ ପାଇଁ କେସିଆର କେନ୍ଦ୍ରକୁ ଦାୟୀ କରିଛି।
ତେଲେଙ୍ଗାନା ରାଷ୍ଟ୍ର ସମିତି (ଟିଆରଏସ)କୁ ବିଆରଏସ୍ ଭାବରେ ନାମିତ କରାଯିବା ପରେ ଏହା ହେଉଛି ପ୍ରଥମ ସାଧାରଣ ସଭା। ରାଜନୈତିକ ଦୃଷ୍ଟିରୁ ଏହି ବୈଠକ ଗୁରୁତ୍ୱପୂର୍ଣ୍ଣ।
