ଧାମନଗର,୨୬।୫ (ଦେବେନ୍ଦ୍ର ଆନ୍ଦିଆ): ଭଦ୍ରକ ଜିଲା ଧାମନଗର ବ୍ଲକର ଖଡ଼ିପଦାଠାରେ ଏକ ଫାଣ୍ଡି ପ୍ରତିଷ୍ଠା ପାଇଁ ଦାବି ହୋଇଆସୁଛି। ପ୍ରଶାସନ କିମ୍ବା ଶାସକ ଦଳର ଇଚ୍ଛାଶକ୍ତି ଅଭାବରୁ ଏହା ପୂରଣ ହୋଇପାରୁ ନାହିଁ ବୋଲି ସ୍ଥାନୀୟ ଲୋକେ ଅଭିଯୋଗ କରୁଛନ୍ତି। ବିଭିନ୍ନ ସମୟରେ ଲୁଟ୍, ଛିନ୍ତାଇ ଭଳି କାଣ୍ଡ ଘଟାଇ ଅପରାଧୀମାନେ ପଡ଼ୋଶୀ ଯାଜପୁର ଜିଲାକୁ ଚାଲିଯିବାକୁ ସକ୍ଷମ ହେଉଛନ୍ତି। ଦୋବଲ ଜୋନ୍ ଅଧୀନରେ ଆନନ୍ଦପୁର, ପଧାନୀ, ସୋହଡ଼ା, କରଦା, ଦଳାଙ୍ଗ, ଖଡ଼ିପଦା, ଦୋବଲ ଓ ମୁସ୍ତାଫାପୁର ପଞ୍ଚାୟତ ରହିଛି। ପଧାନୀ, ସୋହଡ଼ା, ଆନନ୍ଦପୁର ପଞ୍ଚାୟତ ଭଦ୍ରକ ଏବଂ ଯାଜପୁର ଜିଲା ସୀମାନ୍ତ ଅଞ୍ଚଳ। ଧାମନଗର ଥାନା ଅଧୀନରେ ବହୁ ପଞ୍ଚାୟତ ରହୁଥିବାରୁ ପୋଲିସ ପାଟ୍ରୋଲିଂ ଗାଡ଼ି ଜାତୀୟ ରାଜପଥ ଆଡ଼କୁ ଯାଇଥିଲେ, ସେହି ସମୟରେ ଏ ଅଞ୍ଚଳରେ କୌଣସି ଅଘଟଣ ଘଟିଲେ ପୋଲିସ ଆସି ଘଟଣାସ୍ଥଳରେ ପହଞ୍ଚତ୍ଲା ବେଳକୁ ଘଣ୍ଟା ଘଣ୍ଟା ସମୟ ଲାଗୁଛି। ଫଳରେ ଅପରାଧୀମାନେ ଖସି ପଳାଇ ଯିବାକୁ ସକ୍ଷମ ହେଉଛନ୍ତି।
ବୈତରଣୀ ନଦୀର ଷେଣ୍ଢପୁର, ଆନନ୍ଦପୁର ଓ ଭଣ୍ଡାରିପୋଖରୀ ବ୍ଲକର ବଲ୍ଲଭିଘାଟଠାରେ ସେତୁ ହେବା ପରେ ଯାଜପୁର ଜିଲାରୁ ଭଦ୍ରକ ଜିଲାର ଭଣ୍ଡାରିପୋଖରୀ, ଧାମନଗର ବ୍ଲକ ଏବଂ ଭଦ୍ରକରୁ ଯାଜପୁରକୁ ଯିବା ପାଇଁ ଏହି ୩ ସେତୁ ଦେଇ ଯାତାୟାତ ଲାଗି ରାସ୍ତାଗୁଡ଼ିକ ଚଳଚଞ୍ଚଳ ହୋଇଉଠିଛି। ୮ ଦିନ ତଳେ ଆନନ୍ଦପୁର ଛକରେ ଥିବା ଜଣେ ସୁନା ଦୋକାନୀ ଦୋକାନ ବନ୍ଦ କରି ସଟର ତାଲା ପକାଉଥିଲେ। ଏହି ସମୟରେ ଦୁଇଜଣ ଲୁଟେରା ତାଙ୍କ ବାଇକ୍ ଡିକି ଖୋଲି ଅଳଙ୍କାର ନେବା ପାଇଁ ଉଦ୍ୟମ କରୁଥିଲେ। ଦୋକାନୀ ଦେଖି ଯିବା କ୍ଷଣି ଲୁଟେରାଦ୍ବୟ କିଛି ନେଇ ନ ପାରି ଏକ ବାଇକ୍ରେ ଦ୍ରୁତଗତିରେ ପଳାଇ ଯାଇଥିଲେ। ବର୍ଷକ ତଳେ ଖଡ଼ିପଦା ଆନନ୍ଦପୁର ରାସ୍ତାରେ ଉତ୍ତେଇପୁର ଗ୍ରାମର ଜଣେ ଯୁବତୀ ସ୍କୁଟି ନେଇ ଯାଉଥିବା ବେଳେ ଦୁଇଜଣ ଲୁଟେରା ପଛରୁ ଆସି ତାଙ୍କ ବେକରୁ ସୁନାଚେନ୍ ଝାମ୍ପିନେଇ ଫେରାର ହୋଇଯାଇଥିଲେ। ଦୋବଲ ବଜାର ବସ୍ଷ୍ଟାଣ୍ଡଠାରେ ସୋଧ ଗ୍ରାମର ଜଣେ ସୁନା ରୁପା ବ୍ୟବସାୟୀ ମଧ୍ୟ ଲୁଟ୍ର ଶିକାର ହୋଇଥିଲେ। ଦୋବଲ କାଳୀବଜାରର ଜଣେ ସୁନା ରୁପା ଦୋକାନୀଙ୍କ ସ୍କୁଟି ଡିକି ଭାଙ୍ଗି ଲୁଟେରାମାନେ ତାଙ୍କ ବ୍ୟାଗ୍ ନେଇଯାଇଥିଲେ। ସିସିଟିଭି ଫୁଟେଜରେ ଲୁଟେରାଙ୍କ ମୁହଁ ଦେଖାଯାଇଥିଲା। ପୋଲିସ ସିସିଟିଭି ଫୁଟେଜ ଆଧାରରେ ତଦନ୍ତ କରୁଥିଲେ ମଧ୍ୟ ବର୍ଷ ବିତିଯାଇଥିବା ବେଳେ ଏଯାଏ ସୁରାକ ପାଇପାରି ନାହିଁ।
ଆନନ୍ଦପୁରଠାରୁ ବଲ୍ଲଭିଘାଟ ସେତୁ ୫ କି.ମି. ରାସ୍ତାରେ ଚୋରି, ଛିନ୍ତାଇ ଓ ରାହାଜାନି ବଢ଼ିବାରେ ଲାଗିଛି। ଉକ୍ତ ରାସ୍ତାରେ ଦୈନଦିନ ମାଛ ବ୍ୟବସାୟୀମାନେ ରାତି ୪ଟାରୁ ମାଛ ଆଣିବା ପାଇଁ ଯାଜପୁର ଜିଲା ଉପରେ ନିର୍ଭର କରନ୍ତି। ଲୁଟେରାମାନେ ସେମାନଙ୍କଠାରୁ ଜୋରଜବରଦସ୍ତ ଟଙ୍କା ଛଡ଼ାଇ ନେବା ଭଳି ଘଟଣା ଘଟୁଛି। ସେହିପରି ଦେହୁଡ଼ି ଆନନ୍ଦପୁର ଅଞ୍ଚଳର କେତେଜଣ ବ୍ୟବସାୟୀ ଯାଜପୁରରୁ ଦୋକାନ ବନ୍ଦ କରି ରାତିରେ ଘରକୁ ଫେରୁଥିବା ବେଳେ ଲୁଟ୍ର ଶିକାର ହେଉଛନ୍ତି। ଉକ୍ତ ଅଞ୍ଚଳ ଇଣ୍ଡାରିପୋଖରୀ ଥାନା ଅଧୀନରେ ରହିଛି। ହେଲେ ଉକ୍ତ ଅଞ୍ଚଳଠାରୁ ଭଣ୍ଡାରିପୋଖରୀ ଥାନା ପ୍ରାୟ ୨୦ କି.ମି. ଦୂର ହେଉଥିବାରୁ ପାଟ୍ରୋଲିଂ ବ୍ୟବସ୍ଥା ହେଉନାହିଁ। ଏହି ସମସ୍ୟାର ସମାଧାନ ପାଇଁ ଖଡ଼ିପଦାଠାରେ ଏକ ଫାଣ୍ଡି ପ୍ରତିଷ୍ଠା ଦିଗରେ ବିଭିନ୍ନ ସମୟରେ ଦାବି ହେଉଛି। ଜିଲା ଆରକ୍ଷୀ ଅଧୀକ୍ଷକ ଏଥିପ୍ରତି ଦୃଷ୍ଟି ଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।
