କେସିଙ୍ଗା,୧୪।୬(ତୁମେଶ୍ବର ସାହୁ): କଳାହାଣ୍ଡି ଜିଲା କେସିଙ୍ଗା ସମନ୍ବିତ ଶିଶୁ ବିକାଶ ଯୋଜନା ଅନ୍ତର୍ଗତ ଜୋଲକୋ ଗ୍ରାମ ସ୍ଥିତ ଆମ ଅଙ୍ଗନଓ୍ବାଡି କେନ୍ଦ୍ରକୁ ପକ୍କା ରାସ୍ତା ନ ଥିବାରୁ କୋମଳ ମତି ଶିଶୁ, ଗର୍ଭବତୀ ଓ ପ୍ରସୂତୀ ମହିଳାମାନେ କେନ୍ଦ୍ରକୁ ଯିବାକୁ ଅସୁବିଧାର ସମ୍ମୁଖୀନ ହେଉଛନ୍ତି। ଉକ୍ତ ଅଙ୍ଗନଓ୍ବାଡି କେନ୍ଦ୍ର ଗତ ୨୦୨୩-୨୪ ଆର୍ଥିକ ବର୍ଷରେ ୭ଲକ୍ଷ ଟଙ୍କା ବ୍ୟୟ ଅଟକଳରେ ନୂତନ ଭାବେ ନିର୍ମାଣ ହୋଇଛି।
ହେଲେ ଜୋଲକୋ ଗ୍ରାମର ସରକାରୀ ପ୍ରାଥମିକ ବିଦ୍ୟାଳୟ ପରିସରରେ ଅବସ୍ଥିତ । ପକ୍କା ରାସ୍ତାଠାରୁ ପ୍ରାୟ ୨୦୦ ଫିଟ ଯାଏ ସ୍କୁଲଠାରୁ ଅଙ୍ଗନଓ୍ବାଡି କେନ୍ଦ୍ରକୁ ପକ୍କା ରାସ୍ତା ନିର୍ମାଣ ହୋଇ ନ ଥିବାରୁ ୩ରୁ ୫ବର୍ଷର ପ୍ରାୟ ୪୨ଜଣ କୋମଳମତି ଶିଶୁ, ଗର୍ଭବତୀ ଓ ପ୍ରସୂତୀ ମହିଳାମାନେ ଉକ୍ତ କେନ୍ଦ୍ରକୁ ଯିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ଗର୍ଭବତୀ ମହିଳାମାନେ ଟିକାକରଣ, ଓଜନ ମାପ ଆଦି କାର୍ଯ୍ୟକ୍ରମରେ କେନ୍ଦ୍ରକୁ ଯାଇଥାନ୍ତି। ଛୋଟ ଶିଶୁମାନେ ରାସ୍ତାରେ ପଡ଼ି ଥିବା ସିମେଣ୍ଟ, ଇଟା ଓ ପଥର ରେ ଚାଲିବାକୁ ଭୟରେ କରୁଛନ୍ତି। ଚାଲିଲା ବେଳେ ଶିଶୁମାନେ ଝୁଣ୍ଟି ପଡୁଥିବା ନଜିର ରହିଛଛି।
ଦୀର୍ଘ ଦୁଇ ବର୍ଷ ହେଲା ରାସ୍ତା ଅବସ୍ଥା ଶୋଚନୀୟ ପଡି ରହିଛି। ଏ ନେଇ ଅଙ୍ଗନବାଡି କର୍ମୀ ତଥା ଯାଞ୍ଚ କମିଟି ସଦସ୍ୟ କେସିଙ୍ଗା ବିଡ଼ିଓ, ଅଧ୍ୟକ୍ଷ ଓ ଯନ୍ତ୍ରୀଙ୍କୁ ଲିଖିତ ଭାବେ ଅଭିଯୋଗ କରିଛନ୍ତି। ହେଲେ ରାସ୍ତା କାମ ସମ୍ପୂର୍ଣ ହୋଇପାରୁ ନ ଥିବା କେତେଜଣ ଅଭିଭାବକ ଅଭିଯୋଗ କରିଛନ୍ତି। ଏହି ସଂକ୍ରାନ୍ତରେ କନିଷ୍ଠ ଯନ୍ତ୍ରୀ ତ୍ରିଲୋଚନ ବେହେରାଙ୍କୁ ପଚାରିବାରୁ କିଛି ଦିନ ଭିତରେ ଅଧ୍ୟକ୍ଷ, ବିଡ଼ିଓଙ୍କ ସହ ଆଲୋଚନା କରି ଯଥାଶୀଘ୍ର ପକ୍କା ରାସ୍ତା ନିର୍ମାଣ କରାଯିବ ବୋଲି ପ୍ରକାଶ କରିଛନ୍ତି।
