ନୂଆଦିଲ୍ଲୀ,୧୧ ।୧୧: ଏମସିଡି ନିର୍ବାଚନ ପାଇଁ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି(ଏଏପି)ର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜରିୱାଲ ଶୁକ୍ରବାର ‘କେଜରିୱାଲଙ୍କ ୧୦ ଗ୍ୟାରେଣ୍ଟି’ ଲଞ୍ଚ କରିଛନ୍ତି । ଏହାପୂର୍ବରୁ ମୁଖ୍ୟମନ୍ତ୍ରୀ କହିଛନ୍ତି, ଆମେ ଯାହା କହୁ ତାହା କରୁ । ଆମେ ଫେବିକଲର ଯୋଡେଇ ଭଳି ମଜଭୁତ କେବେ ଭାଙ୍ଗି ନ ଥାଉ । ଅନ୍ୟ ରାଜନୈତିକ ଦଳ ବଚନ ପତ୍ର ଜାରି କରିଥାଆନ୍ତି, ହେଲେ ସେମାନଙ୍କ ନିୟମ ସ୍ପଷ୍ଟ ହୋଇ ନ ଥାଏ । କେଜରିୱାଲ କହିଛନ୍ତି କେନ୍ଦ୍ର ସରକାର ମୋତେ କେବଳ ଗାଳି ଦେବା ବ୍ୟତୀତ ଏମସିଡିକୁ ଗୋଟିଏ ଟଙ୍କା ବି ଦେଇ ନାହାନ୍ତି ।
କେଜରିୱାଲ କହିଲେ ଭ୍ରଷ୍ଟାଚାର କରିବେ ସେମାନେ, ହେଲେ ଜେଲ ଯିବେ ସତ୍ୟେନ୍ଦ୍ର ଜୈନ ଓ ମନିଷ ସିସୋଡିଆ । ଦିଲ୍ଲୀ ସରକାରଙ୍କ କାମକୁ ଅଟକାଇବା ଓ ଦିଲ୍ଲୀବାସୀଙ୍କ ଅବସ୍ଥା ଖରାପ କରିବାକୁ କୌଣସି ବାଟ ଛାଡି ନାହାନ୍ତି ଏମାନେ । କେଜରିୱାଲ କହିଛନ୍ତି ସେମାନେ କହିଥିଲେ ଅଳିଆ ପାହାଡ଼କୁ ସଫା କରିଦେବେ, ଆଉ ଦିଲ୍ଲୀର ସବୁ ଗଳି ଅଳିଆ ମୁକ୍ତ ହେବ । ହେଲେ ସେମିତି କିଛି ହୋଇନାହିଁ । ସବୁ ମାର୍କେଟରେ ଅଳିଆ ଗଦା ହୋଇ ରହିଛି, ଏମାନେ ମିଛ ପ୍ରତିଶ୍ରୁତି ଦିଅନ୍ତି । ଏଏପି ନେତା କହିଛନ୍ତି, ଭାରତ ଇତିହାସରେ ଏମିତି ପ୍ରଥମଥର ହୋଇଛି, କି କେନ୍ଦ୍ର ସରକାର କହୁଛନ୍ତି, ରାଜ୍ୟ ସରକାରଙ୍କର ଅଭିଯୋଗ ଯେ କେନ୍ଦ୍ର ପକ୍ଷରୁ ତାଙ୍କୁ ଅର୍ଥ ଦିଆଯାଇ ନାହିଁ, ଏମିତି କହିବାକୁ ତାଙ୍କୁ ଲାଜ ବି ଲାଗୁନାହିଁ ।
କେଜରିୱାଲଙ୍କ ୧୦ ଗ୍ୟାରେଣ୍ଟି
ଦିଲ୍ଲୀକୁ ସୁନ୍ଦର କରିବେ
ତିନୋଟି ଅଳିଆ ପାହାଡ଼କୁ ସଫା କରିବେ, ଭ୍ରଷ୍ଟାଚାର ମୁକ୍ତ ଏମସିଡି ହେବ
ପାର୍କିଂ ସମସ୍ୟାରୁ ମୁକ୍ତି ମିଳିବ
ବୁଲା ପଶୁଙ୍କଠାରୁ ଦିଲ୍ଲୀ ମୁକ୍ତ ହେବ
ନଗର ନିଗମ ଗଳିକୁ ଠିକ୍ କରିବେ
ନଗର ନିଗମ ସ୍କୁଲ ଓ ହସ୍ପିଟାଲକୁ ଠିକ୍ କରିବେ
ନଗର ନିଗମର ସମସ୍ତ ପାର୍କକୁ ସୁନ୍ଦର କରିବେ
ସମସ୍ତ ଠିକା କର୍ମଚାରୀଙ୍କୁ ସ୍ଥାୟୀ କରାଯିବ
ବ୍ୟବସାୟଙ୍କ ଲାଇସେନ୍ସ ପ୍ରକ୍ରିୟାକୁ ସହଜ କରିଦିଆଯିବ
ରେଡି-ପଟରି ବାଲାଙ୍କ ପାଇଁ ଭେଣ୍ଡିଂ ଜୋନ କରାଯିବ, ସେମାନଙ୍କୁ ଭ୍ରଷ୍ଟାଚାର ମୁକ୍ତ କରାଯିବ
