ନୂଆଦିଲ୍ଲୀ,୨୫ା୧: ଆମ୍ ଆଦ୍ମୀ ପାର୍ଟି (ଏଏପି) ଏବଂ ଭାଜପା କାଉନ୍ସିଲରଙ୍କ ମଧ୍ୟରେ ହଟ୍ଟଗୋଳ ଯୋଗୁ ମଙ୍ଗଳବାର ହେବାକୁ ଥିବା ଦିଲ୍ଲୀ ମେୟର ନିର୍ବାଚନ ଦ୍ୱିତୀୟ ଥର ପାଇଁ ଅଟକିଛି। ଦିଲ୍ଲୀ ମ୍ୟୁନିସିପାଲ କର୍ପୋରେଶନ (ଏମ୍ସିଡି) ହାଉସ୍କୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା କରାଯାଇଛି। ଏମ୍ସିଡି ନିର୍ବାଚନରେ ଏଏପି ବିଜୟୀ ହୋଇଥିଲା। ନିର୍ବାଚନକୁ ମାସେରୁ ଊର୍ଦ୍ଧ୍ୱ ସମୟ ବିତିଥିଲେ ମଧ୍ୟ ମେୟର ଓ ଡେପୁଟି ମେୟର ନିର୍ବାଚନ ହୋଇପାରୁ ନାହିଁ। ଗତ ୬ ତାରିଖରେ ୨୫୦ ସଦସ୍ୟ ବିଶିଷ୍ଟ ଏମ୍ସିଡି ହାଉସ୍ର ପ୍ରଥମ ବୈଠକ ବସିଥିଲା। ଭାଜପା ନିର୍ବାଚନ ହାରିଥିଲେ ମଧ୍ୟ ଏମ୍ସିଡିକୁ ନିୟନ୍ତ୍ରଣ କରିବା ଲାଗି ଉଦ୍ୟମ କରୁଥିବା ଅଭିଯୋଗ କରି ଏଏପି କାଉନ୍ସିଲରମାନେ ହଟ୍ଟଗୋଳ କରିବାରୁ ମେୟାର ନିର୍ବାଚନକୁ ୨୪ ତାରିଖକୁ ସ୍ଥଗିତ ରଖାଯାଇଥିଲା। ମଙ୍ଗଳବାର ମେୟର ନିର୍ବାଚନ ପାଇଁ କାଉନସିଲରମାନେ ଏକତ୍ରିତ ହୋଇଥିବାବେଳେ ଉପରାଜ୍ୟପାଳ ଭି.କେ. ସାକ୍ସେନା ନିଯୁକ୍ତ କରିଥିବା ପ୍ରିଜାଇଡିଂ ଅଫିସର ଭାଜପାର ସତ୍ୟ ଶର୍ମା ପ୍ରଥମେ ୧୦ ଜଣ ମନୋନୀତ କାଉନସିଲରଙ୍କୁ ଶପଥ ପାଠ କରାଇଥିଲେ। ୬ ତାରିଖ ବୈଠକ ଭଳି ଏଥର ମଧ୍ୟ ଏଏପି ଶର୍ମାଙ୍କ କାର୍ଯ୍ୟକୁ ବିରୋଧ କରିଥିଲା। ଏହାକୁ ନେଇ ହଟ୍ଟଗୋଳ ଜାରି ରହିବାରୁ ମେୟର ନିର୍ବାଚନ ହୋଇ ନ ପାରି ଗୃହକୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ମୁଲତବୀ ଘୋଷଣା କରାଯାଇଥିଲା।
