ନୂଆଦିଲ୍ଲୀ, ୨୨ା୧୧ (ପି.ଟି.)-ଏୟାରଟେଲ ଦିଲ୍ଲୀ ହାଫ୍ ମାରାଥନରେ ବିଶ୍ୱରେକର୍ଡ କରିଥିବା ବ୍ରିଗିଡ୍ କୋସ୍ଗେଇ ଏବଂ ଆବାବେଲ୍ ୟେଶାନେ ଅଂଶଗ୍ରହଣ କରିବେ। ଶନିବାର ଆୟୋଜକଙ୍କ ତରଫରୁ ଏ ବିଷୟରେ ସୂଚନା ଦିଆଯାଇଛି। ଏହି ଇଭେଣ୍ଟ ଓ୍ବାଲର୍ଡ ଆଥଲେଟିକ୍ସ ଗୋଲ୍ଡ ଲେବଲ ରେସ୍ କାଉଣ୍ଟ ଡାଉନ୍ର ଏକ ଅଂଶବିଶେଷ। ୨୦୧୯ରେ ଅନୁଷ୍ଠିତ ସିକାଗୋ ମାରାଥନରେ କେନିୟାର କୋସଗେଇ ୨:୧୪:୦୪ ଟାଇମିଂରେ ଦୀର୍ଘ ଦିନର ବିଶ୍ୱ ମହିଳା ମାରାଥନ ରେକର୍ଡ ଭଙ୍ଗ କରି ଦୃଷ୍ଟି ଆକର୍ଷଣ କରିଥିଲେ। ଫେବୃୟାରୀରେ ଅନୁଷ୍ଠିତ ରାସ୍ ଅଲ୍ ଖାଇମା ହାଫ୍ ମାରାଥନର ଫାଇନାଲ ପର୍ଯ୍ୟାୟରେ ଉପରୋକ୍ତ ଦୁଇ ଧାବିକାଙ୍କ ମଧ୍ୟରେ ତୀବ୍ର ପ୍ରତିଯୋଗିତା ହୋଇଥିଲା। ଇଥିଓପିଆର ୟେଶାନେ ୬୪:୩୧ରେ ବିଶ୍ୱରେକର୍ଡ କରିଥିବାବେଳେ କୋସଗେଇ ୬୪: ୪୯ରେ ଦ୍ୱିତୀୟ ହୋଇଥିଲେ। ଗତ ମାସରେ ୨୬ ବର୍ଷୀୟ କୋସଗେଇ୨:୧୮:୫୮ ଟାଇମିଂରେ ଲଣ୍ଡନ ମାରାଥନ ଜିତିଥିଲେ। ଅନ୍ୟପକ୍ଷରେ ପୋଲାଣ୍ଡରେ ଅନୁଷ୍ଠିତ ଓ୍ବାଲର୍ଡ ଆଥଲେଟିକ୍ସ ହାଫ୍ ମାରାଥନ ଚାମ୍ପିୟନଶିପ୍ରେ ରେସ୍ ଶେଷ ହେବାକୁ ଆଉ ମାତ୍ର ୩ କିଲୋମିଟର ବାକି ରହିଥିବାବେଳେ ୨୯ ବର୍ଷୀୟା ୟେଶାନେ ଦୁର୍ଭାଗ୍ୟଜନକ ଭାବେ ତଳେ ପଡ଼ିଯାଇଥିଲେ। ଯଦିଓ ସେ ପଦକ ଦୌଡ଼ରୁ ବାଦ୍ ପଡ଼ିଯାଇଥିଲେ ଶୀଘ୍ର ଦୌଡ଼ରେ ଯୋଗ ଦେଇ ୫ମ ସ୍ଥାନ ଅଧିକାର କରିଥିଲେ। ଏଲିଟ୍ ଦୌଡ଼ାଳିମାନେ ଜବାହରଲାଲ ନେହେରୁ ଷ୍ଟାଡିୟମରେ ରେସ୍ ଆରମ୍ଭ କରିବେ। ବିଶ୍ୱବ୍ୟାପୀ ଆମେଚର ଦୌଡ଼ାଳିମାନେ ନୂଆ ଏୟାରଟେଲ ଦିଲ୍ଲୀ ହାଫ୍ ମାରାଥନ ମୋବାଇଲ୍ ଆପ୍ ଜରିଆରେ ଇଭେଣ୍ଟରେ ଅଂଶଗ୍ରହଣ କରିପାରିବେ। କ୍ରୀଡ଼ା ମନ୍ତ୍ରୀ କିରେନ ରିଜିଜୁ କହିଛନ୍ତି, ରାଜଧାନୀ ସହରରେ ଅନୁଷ୍ଠିତ ହେବାକୁଥିବା ଇଭେଣ୍ଟରେ ବିଶ୍ୱର ଶ୍ରେଷ୍ଠ ଆଥଲେଟମାନେ ଅଂଶଗ୍ରହଣ କରୁଥିବାରୁ ଆମ ପାଇଁ ଗର୍ବର ବିଷୟ। ଅଲିମ୍ପିକ ଚାମ୍ପିୟନ ଅଭିନବ ବିନ୍ଦ୍ରା ଇଭେଣ୍ଟର ବ୍ରାଣ୍ଡ ଆମ୍ବାସଡାର ଅଛନ୍ତି।
