ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ମାମଲାରେ ଡ୍ରଗ୍ସ କନେକ୍ସନ ଯାଞ୍ଚ୍ କରୁଥିବା ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ(ଏନସିବି) ଏବେ ବଲିଉଡରେ ଡ୍ରଗ୍ସ ଯୋଗାଉଥିବା ଚେନ୍କୁ ଧରିବାକୁ ଚେଷ୍ଟା ଚଳାଇଛି। ଏନସିବି ଅନୁସନ୍ଧାନରେ ବଲିଉଡ ଅଭିନେତ୍ରୀ ଦୀପିକା ପାଦୁକୋନଙ୍କ ନାମ ମଧ୍ୟ ପ୍ରକାଶ ପାଇଛି। ଏବେ ଦୀପିକାଙ୍କୁ ସୋସିଆଲ ମିଡିଆରେ ଟ୍ରୋଲ କରାଯାଉଛି। ଅନ୍ୟପକ୍ଷରେ ଅଭିନେତ୍ରୀ କଙ୍ଗନା ରାଣାୱତ ମଧ୍ୟ ଦୀପିକାଙ୍କ ଉପରେ ବର୍ଷିଛନ୍ତି। ଡ୍ରଗ୍ସ ମାମଲାରେ ଦୀପିକାଙ୍କ ନାମ ପଦାକୁ ଆସିବା ପରେ ସୋସିଆଲ ମିଡିଆରେ ତାଙ୍କର ଏକ ପୁରୁଣା ପୋଷ୍ଟ ଭାଇରାଲ ହେବାରେ ଲାଗିଛି ଯେଉଁଥିରେ ସେ ସ୍ବାମୀ ତଥା ଅଭିନେତା ରଣବୀର ସିଂଙ୍କୁ ତାଙ୍କ ସୁପର ଡ୍ରଗ ବୋଲି କହିଛନ୍ତି। ଏହି ପୋଷ୍ଟ ନଭେମ୍ବର ୨୦୧୯ରେ କରାଯାଇଥିଲା। ରଣବୀରଙ୍କ ଫଟୋ ଶେୟାର କରିଥିଲେ। ଫଟୋରେ ରଣବୀରଙ୍କ ଟି-ସାର୍ଟର ପଛପଟରେ ଲେଖାଯାଇଥିଲା- ପ୍ରେମ ହେଉଛି ଏକ ସୁପର ପାୱାର। ଫଟୋ କ୍ୟାପସନରେ ଦୀପିକା ଲେଖିଥିଲେ- ଏବଂ ତୁମେ ମୋର ସୁପର ଡ୍ରଗ। ଦୀପିକାଙ୍କ ଏହି ଫଟୋକୁ ପ୍ରାୟ ୧ କୋଟି ଲୋକ ପସନ୍ଦ କରିଥିଲେ।
