ନୟାଗଡ଼,୧୫।୧୦(ଲୋକନାଥ ମିଶ୍ର)ଏପିଏମ୍ ଆପ୍ ଠକେଇ ଘଟଣାରେ ନୟାଗଡ଼ ଜିଲାରେ ୧୦ କୋଟିରୁ ଊର୍ଦ୍ଧ୍ୱ ଟଙ୍କା ଠକେଇ ହୋଇଥିବା ପ୍ରାଥମିକ ଭାବେ ଜଣାପଡିଛି। ତେବେ ଇନ୍ଦିରା ଠାକୁର ନାଁରେ ଦୀପିକା ଦିପୁ ନାମ୍ନୀ ଜଣେ ମହିଳା ଜମାକାରୀଙ୍କ ଜମା ଟଙ୍କାକୁ କଳାକନା ବୁଲାଇ ଦେଇଥିବା ଚର୍ଚ୍ଚା ହେଉଛି। ଇନ୍ଦିରା ଠାକୁର ଏପିଏମ୍ ଆପ୍ରେ ଏକ କୁକୁର ଧରି ଠିଆ ହୋଇଛନ୍ତି। ଏପିଏମ୍ ଆପ୍ ସମ୍ପର୍କରେ ବିଭିନ୍ନ ସମୟରେ ଇନ୍ଦିରା ଠାକୁର ହ୍ବାଟ୍ସ ଅପ୍ ଗ୍ରୁପ ଚଳାଉଥିଲେ। ଠକେଇ ପରେ ଇନ୍ଦିରା ଠାକୁର ଦୀପିକା ଦିପୁ ବୋଲି ଜଣାପଡିଛି ବୋଲିି କେତେଜଣ ଜମାକାରୀ ନିଜ ନାମ ଗୋପନ ରଖି କହିଛନ୍ତି।
ସୂଚନାଯୋଗ୍ୟ, ଏହି ଏପିଏମ୍ ଆପ୍ ଅନ୍ଲାଇନ ଗ୍ରୁପରେ ସଂସ୍ଥାର ଲୋଭନୀୟ ଅଫର ଦେଇ ପ୍ରାୟ ୪ ମାସରୁ ଊର୍ଦ୍ଧ୍ୱ ହେବ ଜମାକାରୀ ବଢ଼ାଇ ଚାଲିଥିଲେ। ନୟାଗଡ଼ ନୂଆ ରାଜବାଟୀ ଲେନ୍ ଗାୟତ୍ରୀ କଲୋନୀର ଅରୁଣ କୁମାର ଦାସ ଏଥିରେ ସାମିଲ ହୋଇ ନୟାଗଡ଼ରେ ନିଜର ଚେନ୍ ବଢ଼ାଇବାରେ ଲାଗିଥିଲେ। ଅରୁଣ ନିଜର ସାନ ଭାଇ ଅମୂଲ୍ୟଙ୍କୁ ନେଇ ବିଭିନ୍ନ ସ୍ଥାନରେ ସଭାସମିତି କରି ଏପିଏମ୍ ଆପ୍କୁ ଲୋକପ୍ରିୟ କରାଇଲେ। ଜମାକାରୀଙ୍କ ଆକାଉଣ୍ଟକୁ ଟଙ୍କା ଆସୁଥିଲା। ବହୁ ଜମାକାରୀ ସ୍ବଳ୍ପ ଟଙ୍କା ଦେଇ ଲାଭବାନ ହୋଇ ଚାଲିଥିଲେ। ତେବେ ଗତ ଗାନ୍ଧୀ ଜୟନ୍ତୀର ଅଫର ୫ ହଜାର ଦେଲେ ୨୪ ଘଣ୍ଟା ପରେ ୬ ହଜାର ପାଇବ। ୩୦ ଦିନ ପର୍ଯ୍ୟନ୍ତ ଦିନକୁ ୧ ହଜାର ଲେଖାଏ ଏପରି ଜମାକାରୀ ୩୫ ହଜାର ପାଇଥାନ୍ତେ। ହେଲେ ଗାନ୍ଧୀ ଜୟନ୍ତୀ ଅଫର ସବୁ କିଛି ବିଗାଡି ଦେଲା। ଜମାକାରୀଙ୍କ ଆକାଉଣ୍ଟକୁ ଆଉ ଟଙ୍କା ଆସିଲାନି। ମୋବାଇଲରୁ ଆପ୍ ନିଷ୍କ୍ରିୟ ହୋଇଗଲା। ଗାନ୍ଧୀ ଜୟନ୍ତୀ ଅଫରରେ ଟଙ୍କା ଡିପୋଜିଟ୍ କରିଥିବା ଲୋକ ବେଶି କ୍ଷତିଗସ୍ତ ହୋଇଛନ୍ତି। ଏହି ଠକେଇ ଘଟଣାରେ ନୟାଗଡ଼ର ୨ ଭାଇ ଅରୁଣ ଓ ଅମୂଲ୍ୟ ଦାସଙ୍କୁ ପୋଲିସ ଗିରଫ କରି ଜେଲ ପଠାଇଛି। ତେବେ ଏପିଏମ୍ ଆପ୍ର ମୁଖ୍ୟ ଦିପିକା ଦୀପୁ ପାଖରେ ପୋଲିସ ପହଞ୍ଚି ପାରିନାହିଁ। ଭୟ ଦେଖାଇ ରୋଜଗାର ଚାଲିଛି ଏପିଏମ୍ ଆପ୍ ଠକେଇ ଘଟଣାରେ ନାଁ ରହିଛି, ପୋଲିସ ଆପଣଙ୍କୁ ଥାନାକୁ ଡକାଇ ଜେରା କରିପାରେ। ଦରକାର ପଡିଲେ କୋର୍ଟ ଚାଲାଣ କରିପାରେ ବୋଲି ନୟାଗଡ଼ ସହରରେ କେତେଜଣ ବ୍ୟକ୍ତି ଏପରି କହି ଲୋକଙ୍କୁ ଭୟଭୀତ କରୁଛନ୍ତି। ଏପରି କି ପୋଲିସ ଡାଏରୀରୁ ନାଁ କାଟିବାକୁ ଭଲ ଟଙ୍କା ନେଉଥିବା ପରି ଅଭିଯୋଗ ଉଠିଛି। ଏପିଏମ୍ ଆପ୍ରେ ଠକେଇ ହୋଇଥିବା କେତେଜଣ ଜମାକାରୀ ଦଲାଲଙ୍କ ହାବୁଡରେ ପଡି କିଛି ଟଙ୍କା ଦେଇ ସାରିଲେଣି ବୋଲି କୁହାଯାଉଛି। ପୋଲିସ ପକ୍ଷରୁ ଘଟଣା ସମ୍ପର୍କରେ ସଚେତନତା କରା ନ ଗଲେ ଏପରି ବ୍ୟକ୍ତିମାନେ ରୋଜଗାର ବଢ଼ାଇ ଚାଲିବେ ବୋଲି କୁହାଯାଉଛି।
