ପାରାଦୀପ, ୪ା୫ (ସ୍ବ.ପ୍ର.): ପୂର୍ବ ଭାରତର ବିକାଶ ପଥ ପାରାଦୀପକୁ କୁହାଯାଉଛି। ୨୦୧୬ ଫେବୃୟାରୀ ୭ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାରାଦୀପ ଗସ୍ତ ବେଳେ ଏଭଳି ଘୋଷଣା କରିଥିଲେ। ପାରାଦୀପରେ ଲକ୍ଷେ କୋଟି ଟଙ୍କା ପୁଞ୍ଜି ନିବେଶ ହେବ ବୋଲି କେନ୍ଦ୍ର ଓ ରାଜ୍ୟ ସରକାର ଘୋଷଣା କରିଛନ୍ତି। ସେହି ଘୋଷଣା ମଧ୍ୟରେ ଅନ୍ୟତମ ଶିଳ୍ପ ଥିଲା ଦୀପକ ଫର୍ଟିଲାଇଜର ଏବଂ ପେଟ୍ରୋ କେମିକାଲ୍ସ କର୍ପୋରେଶନ ଲିମିଟେଡ୍। ଜଗତ୍ସିଂହପୁର ଜିଲା ପାରାଦୀପର ରଙ୍ଗିଆଗଡ଼ ଚଉକିମଥା ବଗଦିଆ ସୀମାନ୍ତ ମଧ୍ୟରେ ଏହି କାରଖାନା ହେବ ବୋଲି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ ଥିଲା। ୮୩.୨୬ ଏକର ଜମି ଅଧିଗ୍ରହଣ ସରିଛି। କମ୍ପାନୀ ପାଇଁ ପାଚେରି କାମ ସରିଥିଲା। କମ୍ପାନୀର ନିର୍ମାଣ ସାମଗ୍ରୀ ମଧ୍ୟ ବିଦେଶରୁ ଆମଦାନୀ ସରିଥିଲା। ୨୦୧୭ ସେପ୍ଟେମ୍ବର ୧୫ରେ ପରିବେଶୀୟ ଜନଶୁଣାଣି ମଧ୍ୟ ସରିଥିଲା। ସେତେବେଳେ କମ୍ପାନୀ ପକ୍ଷରୁ କୁହାଯାଇଥିଲା ଯେ ନିର୍ମାଣ ୩୬ ମାସ ମଧ୍ୟରେ ଶେଷହେବ। ୨୦୨୦ରୁ ନାଇଟ୍ରିକ୍ ଏସିଡ୍, ଆମୋନିୟମ ନାଇଟ୍ରେଟ୍ ସଲ୍ୟୁଶନ, ଟେକ୍ନିକାଲ ପ୍ରିଲ୍, ମେଲେଟ୍ ଓ ଆମୋନିଆ ଉତ୍ପାଦନ କରିବ। ବାର୍ଷିକ ୩୦୪୦ ମେଟ୍ରିକ୍ ଟନ୍ କେମିକାଲ ଉତ୍ପାଦନ କରିବାର ଘୋଷଣା କରାଯାଇଥିଲା। ଏହି କମ୍ପାନୀରେ ପ୍ରତ୍ୟକ୍ଷ, ପରୋକ୍ଷ ଭାବେ ୧୯୦୦ ବେକାର ଯୁବତୀଯୁବକଙ୍କୁ ନିଯୁକ୍ତି ମିଳିବ ବୋଲି କୁହାଯାଇଥିଲା। ଏହି ଜନଶୁଣାଣିକୁ ଏଥିମଧ୍ୟରେ ୬ ବର୍ଷ ବିତିଗଲାଣି। କମ୍ପାନୀ ପାଇଁ ଯୋଗା ଯାଇଥିବା ଜମି ଏବେ ଫାଙ୍କା ପଡ଼ିଛି। କୌଣସି କାମ ହେଉନାହିଁ। ସେତେବେଳେ କମ୍ପାନୀର ଯେଉଁ ୩ ଜଣ ପ୍ରମୁଖ ଅଧିକାରୀ ଥିଲେ ସେମାନଙ୍କୁ ଯୋଗାଯୋଗ କରିବାରେ କହିଥିଲେ, ସେମାନେ ୨ବର୍ଷ ତଳୁ କମ୍ପାନୀ ଛାଡ଼ି ସାରିଛନ୍ତି। ଏବେକାର କୌଣସି କର୍ମଚାରୀ ପାରାଦୀପରେ ନାହାନ୍ତି। ଦୋଛକି ପାଖରେ ଥିବା ଅଫିସ ୨ବର୍ଷ ହେଲା ବନ୍ଦ ହୋଇଛି ବୋଲି ସେଠାରେ ଚାକିରି କରୁଥିବା ରଞ୍ଜନ ବେହେରା ନାମକ ବ୍ୟକ୍ତି କହିଥିଲେ। କମ୍ପାନୀ ଯିବା ପରେ ଏବେ ସେ କଟକ-ପାରାଦୀପ ରାସ୍ତା ନୂଆଗଡ଼ ଛକରେ ଏକ ଖିଲିପାନ ଦୋକାନ କରିଛନ୍ତି। ଯେଉଁ ପ୍ରୋଜେକ୍ଟ କାର୍ଗୋ ଆସିଥିଲା ଦୋଛକି ପାଖରେ ଥିବା ଏକ ଶେଡ୍ରେ ପଡ଼ି ଖତ ଖାଉଛି। କହିବାକୁ ଗଲେ ଏବେ କମ୍ପାନୀର କୌଣସି ଚିହ୍ନ ନାହିଁ। କମ୍ପାନୀର ମୁଖ୍ୟାଳୟ ମୁମ୍ବାଇ ସହ ଯୋଗାଯୋଗ କରିବାରେ କୌଣସି ପ୍ରତିକ୍ରିୟା ମିଳି ନ ଥିଲା। ସୂଚନାଯୋଗ୍ୟ, ଏହି କମ୍ପାନୀ ଓଡ଼ିଶାର ଗୋପାଳପୁରଠାରେ ଏକ ସମାନ ଧରଣର ପ୍ଲାଣ୍ଟ କରିବ ବୋଲି ଜଣାପଡିଛି, ଯାହା ୨୦୨୧ରେ ଘୋଷଣା ହୋଇଥିଲା। କମ୍ପାନୀକୁ ଜମି ଯୋଗାଇଥିବା ଇଡ୍କୋର ଭୂଅର୍ଜନ ଅଧିକାରୀ କେ.ସି. ଦାସଙ୍କୁ ପଚାରିବାରେ ଆମେ ଜାଗା ଦେଇଥିଲୁ। କମ୍ପାନୀ କାହିଁକି ହୋଇନାହିଁ ସେ ଖବର ଆମ ପାଖରେ ନାହିଁ ବୋଲି ସେ କହିଛନ୍ତି।
