ଭୁବନେଶ୍ୱର,୨୩।୯: ବଙ୍ଗୋପସାଗରରେ ସୃଷ୍ଟି ହୋଇଥିବା ଅବପାତ ଏବେ ଡିପ ଡିପ୍ରେସନରେ ପରିଣତ ହୋଇଛି। ଭାରତୀୟ ପାଣିପାଗ ବିଭାଗ (IMD) ଅନୁସାରେ ଏହି ପାଣିପାଗ ପ୍ରଣାଳୀ ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରୁଛି। ୨୩ ସେପ୍ଟେମ୍ବର ରାତି ସୁଦ୍ଧା କଳିଙ୍ଗପଟ୍ଟଣମ ନିକଟରେ ଉତ୍ତର ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡ଼ିଶା ଉପକୂଳ ମଧ୍ୟରେ ଏହା ଅତିକ୍ରମ କରିବାର ସମ୍ଭାବନା ରହିଛି।
ବୁଧବାର ସକାଳର IMD ସୂଚନା ଅନୁସାରେ, ଗତ ୬ ଘଣ୍ଟାରେ ଡିପ ଡିପ୍ରେସନ ପ୍ରାୟ ୭ କିଲୋମିଟର ପ୍ରତିଘଣ୍ଟା ବେଗରେ ପଶ୍ଚିମ ଦିଗକୁ ଗତି କରିଥିଲା। ଏହା କଳିଙ୍ଗପଟ୍ଟଣମଠାରୁ ପ୍ରାୟ ୧୦୦ କିଲୋମିଟର ପୂର୍ବ-ଦକ୍ଷିଣପୂର୍ବ, ଗୋପାଳପୁରଠାରୁ ୧୫୦ କିଲୋମିଟର ଦକ୍ଷିଣ ଏବଂ ପୁରୀଠାରୁ ପ୍ରାୟ ୨୨୦ କିଲୋମିଟର ଦକ୍ଷିଣ-ଦକ୍ଷିଣପଶ୍ଚିମରେ ରହିଥିଲା।
ଡିପ ଡିପ୍ରେସନର ପ୍ରଭାବରେ ଓଡ଼ିଶାର ଦକ୍ଷିଣ ଓ ଉପକୂଳ ଜିଲାଗୁଡ଼ିକରେ ବର୍ଷା ଜାରି ରହିଛି। ଦକ୍ଷିଣ ଓଡ଼ିଶା ଉପକୂଳରେ ପବନର ବେଗ ମଧ୍ୟ ବଢ଼ିବା ସହ ସମୁଦ୍ର ଅଶାନ୍ତରୁ ଅତ୍ୟନ୍ତ ଅଶାନ୍ତ ହେବାର ସତର୍କତା ରହିଛି। ଓଡ଼ିଶାର ସମସ୍ତ ବନ୍ଦରରେ ଲୋକାଲ କସନାରି ସିଗନାଲ ନମ୍ବର-୩ ଜାରି ରଖାଯାଇଛି।
ବର୍ଷା ଯୋଗୁ ନଦୀ, ଜଳାଶୟ ଓ ଡ୍ୟାମର ଜଳସ୍ତର ବଢ଼ିବା ସହ ତଳିଆ ଅଞ୍ଚଳରେ ଜଳବନ୍ଦୀ କିମ୍ବା ବନ୍ୟା ସ୍ଥିତି ସୃଷ୍ଟି ହେବାର ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ରିଲିଫ ଓ ଉଦ୍ଧାର ପ୍ରସ୍ତୁତି ଆରମ୍ଭ କରାଯାଇଛି।
ସମ୍ଭାବ୍ୟ ପ୍ରଭାବକୁ ନଜରରେ ରଖି ଓଡ଼ିଶାର ବିଭିନ୍ନ ଜିଲା ପ୍ରଶାସନକୁ ସତର୍କ କରାଯାଇଛି। ଆବଶ୍ୟକ ପଡ଼ିଲେ ଲୋକଙ୍କୁ ସୁରକ୍ଷିତ ସ୍ଥାନକୁ ନେବା ପାଇଁ ନିର୍ଦ୍ଦେଶ ରହିଛି। ଆପତ୍କାଳୀନ ସେବା, ସ୍ବାସ୍ଥ୍ୟ ବିଭାଗ ଓ ଦୁର୍ଯୋଗ ପରିଚାଳନା ଟିମକୁ ମଧ୍ୟ ସଜାଗ ରଖାଯାଇଛି।
ଭାରୀ ବର୍ଷାକୁ ଦୃଷ୍ଟିରେ ରଖି ଓଡ଼ିଶାର କିଛି ଜିଲାରେ ସ୍କୁଲ ଓ ଅଙ୍ଗନବାଡ଼ି କେନ୍ଦ୍ର ବନ୍ଦ ରଖାଯାଇଛି। ଲଗାତାର ବର୍ଷା ହେଉଥିବା ଅଞ୍ଚଳରେ ନଦୀ ଜଳସ୍ତର ବୃଦ୍ଧି ଓ ତଳିଆ ଅଞ୍ଚଳରେ ପାଣି ପଶିବାର ଆଶଙ୍କା ଥିବାରୁ ପ୍ରଶାସନ ପକ୍ଷରୁ ଲୋକଙ୍କୁ ସତର୍କ ରହିବାକୁ କୁହାଯାଇଛି।
ଏହି ପାଣିପାଗ ପ୍ରଣାଳୀକୁ ନେଇ ‘ଅର୍ଣ୍ଣବ’ ନାମର ସାଇକେ୍ଲାନ୍ ହେବା ନେଇ ଚର୍ଚ୍ଚା ଚାଲିଥିଲେ ମଧ୍ୟ ବର୍ତ୍ତମାନ IMDର ଅଧିକୃତ ବୁଲେଟିନରେ ଏହାକୁ ଡିପ ଡିପ୍ରେସନ ଭାବେ ହିଁ ଦର୍ଶାଯାଇଛି। ତେଣୁ ଏହି ସମୟରେ ଏହାକୁ ସାଇକେ୍ଲାନ୍ ବୋଲି ନିଶ୍ଚିତ ଭାବେ କହିବା ଠିକ ହେବ ନାହିଁ। ସମୁଦ୍ର ଅଶାନ୍ତ ରହିବାର ସମ୍ଭାବନା ଥିବାରୁ ମତ୍ସ୍ୟଜୀବୀମାନଙ୍କୁ ସମୁଦ୍ର ମଧ୍ୟକୁ ନଯିବାକୁ IMD ପକ୍ଷରୁ ସତର୍କ କରାଯାଇଛି।
