ଲକ୍ଷ୍ନୌ,୧୫ ।୧୧: ଉତ୍ତର ପ୍ରଦେଶରେ ବେଳକୁ ବେଳ ବଢି ଚାଲିଛି ଡେଙ୍ଗୁର ପ୍ରକୋପ । ସେଥିପାଇଁ ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ନଭେମ୍ବର ୧୭ରୁ ସମସ୍ତ ଜିଲାରେ ଡେଡିକେଟେଡ ଡେଙ୍ଗୁ ହସ୍ପିଟାଲ କାର୍ଯ୍ୟ କରିବାକୁ ଯାଉଛି । ଏଥିରେ ଫିଜିସିଆନ ଓ ଶିଶୁ ରୋକ ଚିକିତ୍ସକ ରହିବା ଅନିର୍ବାର୍ଯ୍ୟ କରିଦିଆଯାଇଛି । ଯେଉଁଠାରେ ଏମିତି ଡାକ୍ତର ନାହାନ୍ତି ସେଠାରେ ନିକଟରେ ଥିବା ଡାକ୍ତରଙ୍କ ସହ ଯୋଗାଯୋଗ କରିବାକୁ ନିର୍ଦ୍ଦେଶ ଦିଆଯାଇଛି । ପ୍ରତି ହସ୍ପିଟାଲଷର ଜଣେ ନୋଡାଲ ଅଧିକାରୀ ରହିବେ । ବେଡର ଉପଲବ୍ଧତା, ଭର୍ତ୍ତି ଓ ରେଫର େହେଉଥିବା ରୋଗୀ ଓ ମୃତକଙ୍କ ରିପୋର୍ଟ ପ୍ରତିଦିନ ପ୍ରସ୍ତୁତ କରିବାକୁ ପଡିବ ।
ସ୍ୱାସ୍ଥ୍ୟ ବିଭାଗର ମୁଖ୍ୟ ସଚିବ ପାର୍ଥ ସାରଥି ଶର୍ମା ସୋମବାର ଏ ସମ୍ପର୍କରେ ବିସ୍ତୃତ ଗାଇଡ ଲାଇନ ଜାରି କରିଛନ୍ତି । ରାଜ୍ୟରେ ଦିନକୁ ଦିନ ଡେଙ୍ଗୁ ରୋଗୀଙ୍କ ସଂଖ୍ୟା ବଢି ଚାଲିଥିବାରୁ ଡେଡିକେଟେଡ ହସ୍ପିଟାଲ ଖୋଲିବା ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନିର୍ଦ୍ଦେଶ ଦେଇଥିଲେ । ପୂର୍ବରୁ କାର୍ଯ୍ୟ କରୁଥିବା କୋଭିଡ ହସ୍ପିଟାଲକୁ ଏବେ ଡେଙ୍ଗୁ ଡେଡିକେଟେଡ ହସ୍ପିଟାଲରେ ପରିବର୍ତ୍ତନ କରି ଦିଆଯାଇଛି ।
