କୁଆଁରମୁଣ୍ଡା,୧।୫(ଡି.ଏନ.ଏ.): ସୁନ୍ଦରଗଡ଼ ଜିଲା ସରପଞ୍ଚ ମହାସଂଘ ସାଧାରଣ ସମ୍ପାଦକ ତଥା କୁଆଁରମୁଣ୍ଡା ବ୍ଲକ ସରପଞ୍ଚ ସଂଘର ସଭାପତି ସ୍ଥାନୀୟ ଦଲକି ପଞ୍ଚାୟତ ସରପଞ୍ଚ ଓସ୍କାର କୁମାର କିଣ୍ଡୋ (୪୫)ଙ୍କର ଶୁକ୍ରବାର ବିଳମ୍ବିତ ରାତିରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଯାଇଛି। ଗତ ୨ ଦିନ ତଳେ ତାଙ୍କୁ ରାଉରକେଲାସ୍ଥିତ ହାଇଟେକ୍ କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ହଠାତ୍ ଶୁକ୍ରବାର ତାଙ୍କର ସ୍ବାସ୍ଥ୍ୟାବସ୍ଥାରେ ଦ୍ରୁତ ଅବନତି ଘଟିବାରୁ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା। ହେଲେ ବିଳମ୍ବିତ ରାତିରେ ତାଙ୍କର ମୃତ୍ୟୁ ହୋଇଯାଇଥିଲା। ଏହି ଖବର ଶନିବାର ସକାଳୁ ପ୍ରଚାରିତ ହୋଇଯିବା ପରେ ଜିଲା ସରପଞ୍ଚ ମହାସଂଘ ସମେତ କୁଆଁରମୁଣ୍ଡା ବ୍ଲକ ସରପଞ୍ଚ ସଂଘ ସଦସ୍ୟ, କୁଆଁରମୁଣ୍ଡାର ସମିତି ସଭ୍ୟମାନଙ୍କ ମଧ୍ୟରେ ଶୋକର ଛାୟା ଖେଳିଯାଇଛି। ମୃତ ଓସ୍କାର କିଣ୍ଡୋ କରୋନାର ୧ମ ଲହର ସମୟରେ ଜଣେ ଆଗଧାଡିର ଯୋଦ୍ଧାଭାବେ ଦଲକି ପଞ୍ଚାୟତରେ ନିର୍ମିତ ବିଭିନ୍ନ ଟିଏମସିରେ ପ୍ରବାସୀମାନଙ୍କ ପାଇଁ କାର୍ଯ୍ୟକରି ବେଶ୍ ପ୍ରଶଂସା ପାଇଥିଲେ। ତାଙ୍କ ମୃତ୍ୟୁରେ କୁଆଁରମୁଣ୍ଡା ବିଡିଓ ମେଥେଡିୟୁସ ଲାକ୍ରା,ଏବିଡିଓ ଭବାନୀଶଙ୍କର ପାଢୀ, କୁଆଁରମୁଣ୍ଡା ବ୍ଲକର ପୂର୍ବତନ ବିଜେଡ଼ି ସଭାପତି ରାଜେନ୍ଦ୍ର କୁଜୁର, ପଦ୍ମପୁର ସରପଞ୍ଚ ବିଜୟଲକ୍ଷ୍ମୀ କାଲୋ, କୁଆଁରମୁଣ୍ଡା ସରପଞ୍ଚ ସୁଷମାକାନ୍ତି କିଣ୍ଡୋ, ସମିତି ସଭ୍ୟ ତଥା କୁଆଁରମୁଣ୍ଡା ବ୍ଲକ ବିଜେଡ଼ି ସଭାପତି ରାଜେଶ ହାଁସଦାଙ୍କ ସମେତ ଅନ୍ୟମାନେ ଶୋକ ପ୍ରକାଶ କରିଛନ୍ତି।
