କର୍ଲାମୁଣ୍ଡା,୧୯।୮(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକରେ ୨୪ଟି ବିଦ୍ୟାଳୟକୁ ତତ୍କାଳୀନ ରାଜ୍ୟ ସରକାର କମ ଛାତ୍ରୀଛାତ୍ର ଥିବା କାରଣରୁ ୨୦୨୦ ମସିହାରେ ସମ୍ପୁର୍ଣ୍ଣ ବନ୍ଦ କରିଦେଲେ। ଫଳରେ ବ୍ଲକର ଅନେକ ଗାଁର ଛାତ୍ରୀଛାତ୍ରମାନେ ଦୂର ଦୁରାନ୍ତକୁ ଯାଇ ପାଠ ପଢ଼ୁଥିବା ବିଷୟକୁ ନେଇ ଚଳିତ ମାସ ୬ ତାରିଖରେ ଧରିତ୍ରୀ ଖବର କାଗଜରେ ବିପଦ ପୂର୍ଣ୍ଣ ରାସ୍ତାରେ ପାଠ ପଢି ଯାଉଛନ୍ତି ଛାତ୍ରୀଛାତ୍ର ଶୀର୍ଷକ ପ୍ରକାଶ ପାଇଥିଲା । ତେବେ ଖବର ପ୍ରକାଶ ପାଇବା ପରେ ଜିଲା ପ୍ରଶାସନ ଓ ବ୍ଲକ ଶିକ୍ଷା ବିଭାଗ ତତ୍ପରତା ଦେଖାଇ ମଙ୍ଗଳବାର ବ୍ଲକର ଜୋରାଡ଼ବରା ପଞ୍ଚାୟତର ହଜାରିପଡା ଓ ବୋରପଦର ପଞ୍ଚାୟତର କେର୍ଣାପଲା ଗାଁରେ ବ୍ଲକ ଶିକ୍ଷା ଅଧିକାରୀ ବାଞ୍ଛାନିଧିପଣ୍ଡା, ଅତିରିକ୍ତ ବ୍ଲକ ଶିକ୍ଷା ଅଧିକାରୀ ଗୋପମଣୀ ସାହୁ, ରେଙ୍ଗାଲୀ ସିଆରସିସି ଉଜ୍ଜଳ କୁମାର ସାହୁ ପ୍ରମୁଖ ବ୍ଲକର ବିଦ୍ୟାଳୟ ବନ୍ଦ ହୋଇଥିବା ଜୋରାଡ଼ବରା ପଞ୍ଚାୟତର ହଜାରିପଡା ଓ ବୋରପଦର ପଞ୍ଚାୟତର କେର୍ଣାପଲା ଗାଁରେ ପହଞ୍ଚି ଗାଁ ଲୋକଙ୍କ ଉପସ୍ଥିତରେ ବିଦ୍ୟାଳୟ ପୁଣି ଥରେ ଖୋଲା ଯିବାର ଆବଶ୍ୟକତା ସ୍ଥିତି ପରଖି ଥିଲେ। ଏ ନେଇ ବ୍ଲକ ଶିକ୍ଷା ଅଧିକାରୀଙ୍କୁ ପଚାରିବାରୁ ତଦନ୍ତ ରିପୋର୍ଟ ଜିଲା ପ୍ରଶାସନକୁ ଦିଆଯିବ ବୋଲି କହିବା ସହ ଜିଲା ପ୍ରଶାସନ ସରକାରଙ୍କ ନିୟମ ଅନୁସାରେ ଯାହା ଥିବ ତାହାହିଁ କରିବେ ବୋଲି କହିଛନ୍ତି।
ଏଠାରେ ପ୍ରକାଶ ଯୋଗ୍ୟ ଯେ, କେର୍ଣାପଲା ବିଦ୍ୟାଳୟ ବନ୍ଦ ହେବା ପରେ ଗାଁର ଛୋଟଛୋଟ ଶିଶୁମାନେ ୩ କିମି ଦୂର ୫୯ ନମ୍ବର ଜାତୀୟ ରାଜପଥ ନିକଟରେ ଥିବା ମ. ରାମପୁର ବ୍ଲକ ର ଟୁର୍ଚ୍ଚି ବିଦ୍ୟାଳୟରେ ପାଠ ପଢୁଛନ୍ତି। ଠିକ୍ ସେହି ପରି ହଜାରିପଡାର ଛାତ୍ରୀଛାତ୍ର ମଧ୍ୟ ୫୯ ନମ୍ବର ଜାତୀୟ ରାଜପଥ ଦେଇ କୁଶୁର୍ଲା ବିଦ୍ୟାଳୟରେ ପାଠ ପଢୁଛନ୍ତି। ଏଣୁ ଏହି ଉଭୟ ଗାଁରେ ପୁଣି ଥରେ ବିଦ୍ୟାଳୟ ଖୋଲା ଯିବାକୁ ହଜାରିପଡାର ସ୍ବେଚ୍ଛାସେବୀ ସନତ କୁମାର ସାହୁ, ତ୍ରିଲୋଚନ ସାହୁ, କେର୍ଣାପଲାର ବଳଭଦ୍ର ମାଝୀ, ସତ୍ୟା ନନ୍ଦ ସାହୁ, ପରମେଶ୍ବର ସାହୁ, ତରୁଣ ସାହୁ, ଦେବେନ୍ଦ୍ର ସାହୁ, ଥବିର ସାହୁ,ବିକ୍ରମ ସାହୁ, ତୁମେଶ୍ୱର ସାହୁ ପ୍ରମୁଖ ପ୍ରଶାସନକୁ ଅନୁରୋଧ କରିଛନ୍ତି।
