ନୂଆଦିଲ୍ଲୀ,୨୧।୧୧: ନରେନ୍ଦ୍ର ମୋଦି କ୍ରିକେଟ ଷ୍ଟାଡିୟମରେ ଅଷ୍ଟ୍ରେଲିଆ ଅଧିନାୟକ ପ୍ୟାଟ କମିନ୍ସ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲେ। ପୂର୍ବରୁ ବିଶ୍ୱକପ୍ର ଅଧିକାଂଶ ମ୍ୟାଚ୍ରେ ଟିମ୍ର ଅଧିନାୟକ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଉଥିଲେ। ଏଣୁ ତାଙ୍କ ନିଷ୍ପତ୍ତି ବିରୋଧି ଟିମ୍ ଲାଗି ବିଜୟର ସୁଯୋଗ ଆଣିପାରେ ବୋଲି ପ୍ରଥମେ ଆଶା କରାଯାଉଥିଲା। ହେଲେ ଖେଳ ଆଗକୁ ବଢ଼ିବା ମାତ୍ରେ କମିନ୍ସଙ୍କ ନିଷ୍ପତ୍ତି ଦଳକୁ ଚାମ୍ପିୟାନ କରାଇବାର ପ୍ରମୁଖ କାରଣ ପାଲଟିଥିଲା।
ଟସ୍ ପରେ ଭାରତ ଅଧିନାୟକ ରୋହିତ ଶର୍ମା ମଧ୍ୟ ପ୍ରଥମେ ବ୍ୟାଟିଂ କରିବାକୁ ଚାହୁଁଥିବା କହିଥିଲେ। ହେଲେ ତାର ଓଲଟା ପରିଣାମ ଦଳକୁ ଭୋଗିବାକୁ ପଡ଼ିଥିଲା। ଅଷ୍ଟ୍ରେଲିଆର ଦ୍ରୁତ ବୋଲରମାନେ ବାଜିକୁ ପଲଟାଇଦେଇଥିଲେ। ବିଶ୍ୱକପ୍ ଫାଇନାଲର ଦୁଇ ଦିନ ପରେ ଏବେ ଦଳର ଷ୍ଟାର ବ୍ୟାଟ୍ସମ୍ୟାନ ଡେଭିଡ ଓ୍ବାର୍ନର ଏକ ବଡ଼ ଖୁଲାସା କରିଛନ୍ତି। ପୂର୍ବରୁ ଅଷ୍ଟ୍ରେଲିଆ ଭିନ୍ନ ଯୋଜନା କରିଥିବା ବେଳେ ମ୍ୟାଚ୍ର କିଛି ଘଣ୍ଟା ପୂର୍ବରୁ ନିଷ୍ପତ୍ତି କିଭଳି ବଦଳାଗଲା ତାହା ସେ ଜଣାଇଛନ୍ତି।
ଏ ବି ଡିଭିଲିୟର୍ସଙ୍କ ୟୁଟ୍ୟୁବ୍ ଚ୍ୟାନେଲରେ ଓ୍ବାର୍ନର କହିଛନ୍ତି, ବିଶ୍ୱକପ ଫାଇନାଲ ଗୋଟିଏ ଦିନ ପୂର୍ବରୁ ସମସ୍ତେ ଘଣ୍ଟାଏ-ଦୁଇଘଣ୍ଟା ଧରି ଆଲୋଚନା କରିଥିଲେ। ଏଥିରେ ସମସ୍ତ ରେକର୍ଡକୁ ଦେଖି ପ୍ରଥମେ ବ୍ୟାଟିଂ କରାଯିବ ବୋଲି ନିଷ୍ପତ୍ତି ନିଆଯାଇଥିଲା। ହେଲେ ମ୍ୟାଚ୍ ଦିନ ସମସ୍ତଙ୍କ ମନ ବଦଳିଯାଇଥିଲା। ସମସ୍ତଙ୍କୁ ପଚରାଯିବାରେ ଅଧିକାଂଶ ଖେଳାଳି ବୋଲିଂ କରିବାକୁ କହିଥିଲେ। ଶେଷରେ ଅଧିନାୟକ ତାହା ହିଁ କରିଥିଲେ।
କମିନ୍ସଙ୍କ ଉକ୍ତ ନିଷ୍ପତ୍ତି ଠିକ୍ ପ୍ରମାଣିତ ହୋଇଥିଲା। ପ୍ରଥମେ ଅଷ୍ଟ୍ରେଲିଆର ଦ୍ରୁତ ବୋଲରମାନେ ପିଚ୍ର ଲାଭ ଉଠାଇ ଭାରତୀୟ ବ୍ୟାଟ୍ସମ୍ୟାନଙ୍କୁ ଅଡୁଆରେ ପକାଇଥିଲେ। ସେମାନେ ଗୋଟିଏ ରନ୍ ଲାଗି ମଧ୍ୟ ସଂଘର୍ଷ କରୁଥିବା ଦେଖାଯାଇଥିଲା। ଫଳରେ ଫାଇନାଲରେ ୨୪୦ ରନ୍ର ଟାର୍ଗେଟ ଦେଇଥିଲା ଅଷ୍ଟ୍ରେଲିଆ। ଏହାକୁ ୪ ଉଇକେଟ ହରାଇ ସହଜରେ ଅଷ୍ଟ୍ରେଲିଆ ହାସଲ କରିନେଇଥିଲା।
