ଭଦ୍ରକ ଅଫିସ, ୨୮ା୬-ଭଦ୍ରକ ଜିଲା ବାସୁଦେବପୁର ବ୍ଲକ ବାଲିମେଦ ପଞ୍ଚାୟତର ଚାରବାଟିଆ ମନ୍ତେଇ ନଦୀଘାଟରେ ଦୈନିକ ହଜାର ହଜାର ଲୋକ ବିପଦପୂର୍ଣ୍ଣ ଭାବେ ଡଙ୍ଗା ମାଧ୍ୟମରେ ଯାତ୍ରା କରୁଛନ୍ତି। ଘାଟିଆ ନଦୀର ଉଭୟପଟେ ଦଉଡି ବାନ୍ଧି ତାହାରି ଭରସାରେ ଯାତ୍ରୀମାନଙ୍କୁ ଡଙ୍ଗାରେ ପାର କରାଉଛନ୍ତି। ଏହି ଘାଟରେ ବାରମ୍ବାର ଦୁର୍ଘଟଣା ଘଟୁଥିଲେ ହେଁ ଏଥିପ୍ରତି ପ୍ରଶାସନର ଦୃଷ୍ଟି ପଡୁନାହିଁ। ଏଠାରେ ଏକ ପୋଲ ନିର୍ମାଣ ଲାଗି ଲୋକେ ବାରମ୍ବାର ଦାବି କରିଆସୁଥିଲେ ମଧ୍ୟ କୌଣସି ସୁଫଳ ମିଳୁନି।
ବାସୁଦେବପୁର, ତିହିଡ଼ି, ଚାନ୍ଦବାଲି ଅଞ୍ଚଳବାସୀଙ୍କ ସମେତ ଜିଲାର ବିଭିନ୍ନ କୋଣ ଅନୁକୋଣରୁ ଲୋକମାନେ ଏହି ଘାଟ ଦେଇ ପାର ହେଉଛନ୍ତି। ମୁଖ୍ୟତଃ ବାସୁଦେବପୁର ବ୍ଲକକୁ ଜଳପଥ ଯୋଗେ ତିହିଡ଼ି ଓ ଚାନ୍ଦବାଲି ବ୍ଲକକୁ ଏହି ଘାଟ ଯୋଗାଯୋଗ କରାଇବାର ମୁଖ୍ୟ ମାଧ୍ୟମ। ବାସୁଦେବପୁର ବ୍ଲକର ବାଲିମୁଣ୍ଡା, ବିଦେଇପୁର, କିସ୍ମତକୃଷ୍ଣପୁର, ସାନକୃଷ୍ଣପୁର, ଲକ୍ଷ୍ମୀଦାସପୁର, ବାଲିମେଦ, ଜଗନ୍ନାଥପ୍ରସାଦ, ପଦ୍ମପୁର, ସୁଗୋ, ଏଡ଼ତାଳ, ଲୁଙ୍ଗା ଓ ଭଦ୍ରକ ବ୍ଲକର ସାହାଡ଼ା, ସାବରଙ୍ଗ, ଗୋରାମାଟି ପଞ୍ଚାୟତର ଲୋକେ ତିହିଡ଼ି ଓ ଚାନ୍ଦବାଲି ବ୍ଲକକୁ ଏହି ଘାଟ ପାର ହୋଇ ଯାତାୟାତ କରୁଛନ୍ତି। ଏହି ରାସ୍ତା ଉପରୋକ୍ତ ୩ ବ୍ଲକକୁ ଯାତାୟାତରେ ଶଟ୍କଟ୍ ରାସ୍ତା ହୋଇଥିବାରୁ ଦୀର୍ଘ ପାଞ୍ଚ ଦଶନ୍ଧି ଧରି ଏହି ଘାଟ ଉପରେ ନିର୍ଭର କରି ଯାତାୟାତ କରିଥାନ୍ତି।
ଜାତିର ପିତା ମହାତ୍ମା ଗାନ୍ଧୀ ଏହି ଘାଟ ଦେଇ ଆସି ଚାରବାଟିଆ ଗ୍ରାମରେ ରାତ୍ରିଯାପନ କରିଥିଲେ। ଉକ୍ତ ସ୍ଥାନକୁ ଗାନ୍ଧୀ ସ୍ମାରକୀ ପୀଠ ଭାବେ ରାଜ୍ୟ ସରକାର ଘୋଷଣା କରିଛନ୍ତି। ଏପରି କି ବ୍ରିଟିଶ ସମୟରେ ଇଷ୍ଟ ଇଣ୍ଡିଆ କମ୍ପାନୀ ଜଳ ପରିବହନ ପାଇଁ ଚାରବାଟିଆଠାରୁ ଅବିଭକ୍ତ ବାଲେଶ୍ୱର ଜିଲାର ଭୋଗରାଇ ବ୍ଲକ ଅଧୀନ ଜାମକୁଣ୍ଡା ବ୍ଲକ ପର୍ଯ୍ୟନ୍ତ ଜଳପଥ ଭାବରେ ବ୍ୟବହାର କରୁଥିଲେ। ବର୍ତ୍ତମାନ ସୁଦ୍ଧା ବ୍ରିଟିଶ ଅମଳର ସ୍ଲୁଇସଗେଟ୍ ଅକ୍ଷତ ଅବସ୍ଥାରେ ରହିଛି। ଉକ୍ତ ଘାଟ ଏବେ ଲୋକଙ୍କ ବିପଦପୂର୍ଣ୍ଣ ଯାତ୍ରାର ମାଧ୍ୟମ ପାଲଟିଛି। ଏଥିପ୍ରତି ପ୍ରଶାସନ କିମ୍ବା ରାଜନେତା ଦୃଷ୍ଟି ଦେଉ ନ ଥିବାରୁ ଏକ ଦଉଡ଼ି ଲୋକଙ୍କ ଜୀବନକୁ ଝୁଲାଇ ରଖିଛି। ଏହି ଘାଟ ପାର ହେବାକୁ ହେଲେ ଘାଟିଆ ଲୋକଙ୍କୁ ବସାଇ ଏକ ଦଉଡ଼ିକୁ ଟାଣି ଧରି ଗୋଟିଏ ପାର୍ଶ୍ୱରୁ ଅନ୍ୟ ପାର୍ଶ୍ୱକୁ ପାର କରାଉଛି। ହେଲେ ଡଙ୍ଗାରେ କୌଣସି ଜୀବନ ରକ୍ଷାକାରୀ ଉପକରଣ ଯଥା ଲାଇଫ୍ ଜ୍ୟାକେଟ୍, ବାୟୁ ଭର୍ତ୍ତି ଟ୍ୟୁବ୍ ରଖାଯାଇନାହିଁ। ଏହି ଘାଟରେ ଗତବର୍ଷ ଯାତ୍ରୀମାନେ ପାର ହେଉଥିବା ବେଳେ ଭାରସାମ୍ୟ ହରାଇ ବାଇକ୍ ସହ ନଦୀକୁ ଗଳିପଡ଼ିଥିଲେ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରିଥିଲେ। ବାରମ୍ବାର ଦୁର୍ଘଟଣା ଘଟୁଥିଲେ ମଧ୍ୟ ପ୍ରଶାସନ ଯାତ୍ରୀମାନଙ୍କ ସୁରକ୍ଷା ପ୍ରତି ଦୃଷ୍ଟି ନ ଦେଇ ପୋଲ ନିର୍ମାଣ ପାଇଁ ଉଦ୍ୟମ ନ କରିବା ପରିତାପର ବିଷୟ। କରୋନା ମହାମାରୀ ସମୟରେ ପ୍ରଶାସନ ସାମାଜିକ ଦୂରତ୍ୱ ପ୍ରତି ଗୁରୁତ୍ୱ ଦେଉଥିବା ବେଳେ ଘାଟ ପାର ହେଉଥିବା ସମୟରେ ସାମାଜିକ ଦୂରତ୍ୱ କଟକଣାକୁ ଫାଙ୍କି ସଂଖ୍ୟାଧିକ ଯାତ୍ରୀ ଏକାସାଙ୍ଗରେ ପାର ହେଉଛନ୍ତି। ଏନେଇ ଜିଲା ପ୍ରକଳ୍ପ ନିର୍ଦ୍ଦେଶକ ମଧୁସୂଦନ ଦାସ କହନ୍ତି ଏକାଧିକବାର ଟେଣ୍ଡର କରାଯାଇଛି। କିନ୍ତୁ ଠିକାଦାରମାନେ ଏଥିରେ ସାମିଲ ହେଉନାହାନ୍ତି। ପ୍ରକଳ୍ପର ମୂଲ୍ୟ କମ୍ ହେଉଥିବା ଦର୍ଶାଇ ଟେଣ୍ଡର ପ୍ରକ୍ରିୟାରେ ସାମିଲ ହେଉନାହାନ୍ତି।
