ନୂଆଦିଲ୍ଲୀ,୨୪।୪: ପ୍ରବାଦ ପୁରୁଷ ବିଜୁ ପଟ୍ଟନାୟକ ଉଡ଼ାଇଥିବା ଡାକୋଟା ବିମାନ ଚଳିତ ବର୍ଷ ଶେଷ ସୁଦ୍ଧା ଭୁବନେଶ୍ୱର ଫେରିବ ବୋଲି ଆଶା କରାଯାଉଛି। ଏବେ ବିମାନଟି ଅଚଳ ଅବସ୍ଥାରେ କୋଲକାତାର ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନବନ୍ଦରରେ ପଡ଼ିରହିଛି। ଏହାକୁ ଖୋଲି ସଡ଼କପଥରେ ଭୁବନେଶ୍ୱର ଆଣି ପୁଣିଥରେ ଯୋଡ଼ିବା ପରେ ଆବଶ୍ୟକ ମରାମତି ଓ ରଙ୍ଗ କରାଯାଇ ଏକ ପ୍ରମୁଖ ସ୍ଥାନରେ ରଖାଯିବ। ଏହି କାର୍ଯ୍ୟ ଲାଗ ରାଜ୍ୟ ସରକାର ଟେଣ୍ଡର ଡାକିଥିଲେ।
ବିଜୁବାବୁ ୧୯୪୭ ଜୁଲାଇ ୨୧ରେ ଡାକୋଟା ବିମାନରେ ଇଣ୍ଡୋନେସିଆର ତତ୍କାଳୀନ ରାଷ୍ଟ୍ରପତି ସୁକର୍ଣ୍ଣଙ୍କୁ ଉଦ୍ଧାର କରିଥିଲେ। ରାଜ୍ୟ ସରକାରଙ୍କ ଜଣେ ବରିଷ୍ଠ ଅଧିକାରୀ କହିଛନ୍ତି, ଡାକୋଟା ବିମାନ ଓଡ଼ିଶା ଲୋକଙ୍କ ପାଇଁ ବିଶେଷ ଗୁରୁତ୍ୱ ବହନ କରେ। ଏହାକୁ ଆଣିବା ପାଇଁ ପୂର୍ବରୁ ଯୋଜନା ହୋଇଥିଲେ ହେଁ କୋଭିଡ୍ ମହାମାରୀ ଯୋଗୁ ପ୍ରକ୍ରିୟା ବିଳମ୍ବିତ ହୋଇଛି। ଏବେ ଟେଣ୍ଡର ଚାଲିଛି। ବର୍ଷ ଶେଷ ସୁଦ୍ଧା ଏହାକୁ ଅଣାଯାଇପାରେ। ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (ଡିଜିସିଏ) ଏବଂ ଭାରତର ବିମାନବନ୍ଦର କର୍ତ୍ତୃପକ୍ଷ (ଏଏଆଇ)ଙ୍କଠାରୁ ଆବଶ୍ୟକ ମଞ୍ଜୁରୀ ମିଳିସାରିଛି। କୋଲକାତା ବିମାନବନ୍ଦରରୁ କେତେକ ସୁରକ୍ଷାଗତ ମଞ୍ଜୁରୀ ଅଣାଯିବ। ଡାକୋଟା ବିମାନକୁ ରଖିବା ପାଇଁ ଭୁବନେଶ୍ୱରରେ ଜାଗା ଚିହ୍ନଟ ହୋଇଛି।
ପ୍ରକାଶ ଯେ, ୧୯୪୭ରେ ଡଚ୍ମାନେ ପୁନର୍ବାର ଇଣ୍ଡୋନେସିଆକୁ ଦଖଲ କରିବାକୁ ଉଦ୍ୟମ କରିଥିଲେ। ସେହି ସମୟରେ କଳିଙ୍ଗ ଏୟାରଲାଇନ୍ସର ଦକ୍ଷ ପାଇଲଟ ବିଜୁବାବୁଙ୍କୁ ବିମାନରେ ଜାଭା ଯାଇ ସୁକର୍ଣ୍ଣଙ୍କୁ ଉଦ୍ଧାର କରିବା ନିମନ୍ତେ ଜବାହରଲାଲ୍ ନେହେରୁ କହିଥିଲେ। ଡଚ୍ମାନେ ଉକ୍ତ ବିମାନକୁ ଗୁଳିକରି ଖସାଇବାକୁ ଧମକ ଦେଇଥିଲେ। ଯଦି ତାଙ୍କ ବିମାନକୁ ଖସାଇ ଦିଆଯାଏ, ତେବେ ନେଦରଲାଣ୍ଡସ୍ର କୌଣସି ବିମାନକୁ ନିରାପଦର ସହିତ ଭାରତ ଉପରେ ଉଡ଼ିବାକୁ ଦିଆଯିବ ନାହିଁ ବୋଲି ବିଜୁବାବୁ କହିଥିଲେ। ତାଙ୍କର ଏଭଳି ଚେତାବନୀ ପରେ ଡଚ୍ କର୍ତ୍ତୃପକ୍ଷ ବିମାନରେ ଇଣ୍ଡୋନେସିଆ ନେତାଙ୍କୁ ନେବା ଲାଗି ଅନୁମତି ଦେଇଥିଲେ। ବିଜୁବାବୁଙ୍କର ଏହି ଦୁଃସାହସିକତା ପାଇଁ ଇଣ୍ଡୋନେସିଆ ସରକାର ତାଙ୍କୁ ‘ଭୂମିପୁତ୍ର’ ଘୋଷଣା କରିଥିଲେ।
