କାମାକ୍ଷାନଗର, ୧୪।୫ (ଡି.ଏନ୍.ଏ.) ତେଲଙ୍ଗାନାରେ ଖଟୁଛନ୍ତି ଦାଦନ। ଦୀର୍ଘଦିନ ହେଲା ଗଁାରେ ନାହାନ୍ତି। ଅଥଚ ଗ୍ରାମରେ ଚାଲିଥିବା ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ର ମଷ୍ଟର ରୋଲ୍ରେ ତାଲିକାଭୁକ୍ତ ହୋଇଛି ନଁା। କେବଳ ଏତିକି ନୁହେଁ, ଏହି ଯୋଜନାରେ ଅନ୍ତର୍ଭୁକ୍ତ ଥିବା ଦର୍ଶାଇ ଜମାଖାତାକୁ ଟଙ୍କା ମଧ୍ୟ ଛଡ଼ାଯାଉଛି। ଏହାକୁ ବାଦ୍ଦେଲେ ଯୁକ୍ତ ୨ ପଢୁଥିବା ଛାତ୍ରଙ୍କୁ ଶ୍ରମଜୀବୀ ବୋଲି ଦର୍ଶାଇ ଅର୍ଥ ହଡ଼ପ କରାଯାଉଥିବା ଭଳି ସାଂଘାତିକ ଅଭିଯୋଗ ମଧ୍ୟ ଉଠିଛି। ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକ ଦଶୀପୁର ପଞ୍ଚାୟତରେ ଶ୍ରମିକ କଲ୍ୟାଣ ନିମନ୍ତେ କାର୍ଯ୍ୟକାରୀ ହେଉଥିବା କେନ୍ଦ୍ରୀୟ ଯୋଜନାରେ ମୂଳରୁ ଚୂଳ ଯାଏ ଏଭଳି କେଳେଙ୍କାରୀ ବିଭାଗୀୟ ଅଧିକାରୀଙ୍କ ସମ୍ପୃକ୍ତିଙ୍କୁ ସ୍ପଷ୍ଟ କରିଥିବାବେଳେ ଏହାକୁ ନେଇ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ଦେଖିବାକୁ ମିଳିଛି।
ଦଶୀପୁର ପଞ୍ଚାୟତ ଅନ୍ତର୍ଗତ ଗୁରୁଜାଙ୍ଗୁଲି ଗ୍ରାମରେ ସାନବନ୍ଧ (କୋଡ୍ ନମ୍ବର ୨୪୦୭୦୦୫୦୦୭/ ଡବ୍ଲ୍ୟଏଚ୍/୧୦୩୮୬୧୨୮) ପୁନରୁଦ୍ଧାର ପାଇଁ ୨୦୨୧-୨୦୨୨ ଆର୍ଥିକ ବର୍ଷରେ ଏମ୍ଜିଏନ୍ଆର୍ଇଜିଏସ୍ରେ ୫ ଲକ୍ଷ ଟଙ୍କା ମଞ୍ଜୁର ହୋଇଛି। ତେବେ ଓ୍ବେବ୍ ସାଇଟ୍ରୁ ଯେଉଁ ଚିତ୍ର ଆସିଛି, ତାହା ଦୁର୍ନୀତିକୁ ପଦାରେ ପକାଇ ଦେଇଛି। ଏହି ଯୋଜନାରେ ମହାବିରୋଡ କଲେଜରେ ପଢୁଥିବା ଯୁକ୍ତ ୨ ପ୍ରଥମ ବର୍ଷର ଜଣେ ଛାତ୍ରଙ୍କ ନାମ ଶ୍ରମିକ ତାଲିକାରେ ରହିଛି। ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ହେଉଛି ସମ୍ପୃକ୍ତ ଛାତ୍ରଙ୍କ ବୟସ ମାତ୍ର ୧୬ବର୍ଷ। ସେହିପରି ତେଲଙ୍ଗାନା ରାଜ୍ୟର ଏକ ବେସରକାରୀ ସଂସ୍ଥାରେ ଶ୍ରମିକ ଭାବେ କାମ କରୁଥିବା ଜଣେ ବ୍ୟକ୍ତିଙ୍କ ନାମ ମଷ୍ଟର ରୋଲ୍ରେ ଚଢ଼ାଯାଇଛି। ମଷ୍ଟରରୋଲ୍ ନମ୍ବର ୨୦୪୫ରେ ୧୩ ହଜାର ୩୨୦ ଟଙ୍କା ଛଡ଼ାଯାଇଛି। ଅନୁରୂପ ଭାବେ ମଷ୍ଟରରୋଲ୍ ନଂ. ୨୦୪୬ରେ ୫ ହଜାର ୩୨୮ ଟଙ୍କା ପୈଠ ହୋଇଛି। ପଞ୍ଚାୟତରେ ଚାଲିଥିବା ଏମ୍ଜିଏନ୍ଆର୍ଇଜିଏସ୍ କାର୍ଯ୍ୟରେ ଶ୍ରମିକଙ୍କ ଜବ୍କାର୍ଡକୁ ମାଧ୍ୟମ କରି ଟଙ୍କା ହଡ଼ପ କରାଯାଉଥିବା ଅଭିଯୋଗ ଆସୁଥିବାବେଳେ ଏଥିରେ ବ୍ୟାପକ ଅନିୟମିତତା ହେଉଥିବା ସ୍ପଷ୍ଟ ହୋଇଛି।
ଦଣ୍ଡାବନ୍ଧ ପୁନରୁଦ୍ଧାର ସମୟରେ ଅନୁରୂପ ଦୁର୍ନୀତି ପଦାକୁ ଆସିଥିଲା। ରାଜ୍ୟ ବାହାରେ ରହି କାମ କରୁଥିବା ସ୍ଥାନୀୟ ହିତାଧିକାରୀଙ୍କ ଜବ୍କାର୍ଡରେ ଟଙ୍କା ଛଡ଼ାଯାଇଥିବା ଗଣମାଧ୍ୟମରେ ଖବର ପ୍ରକାଶ ପାଇଥିଲା। ତେବେ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ ନ କରି ଚଞ୍ଚକତା ପୂର୍ବକ ୱେବସାଇଟ୍ରୁ ମଷ୍ଟର ରୋଲ୍କୁ ଡିଲିଟ୍ କରିଦିଆଯାଇଥିଲା। ଠିକାଦାର ଏବଂ ସରକାରୀ କର୍ମଚାରୀଙ୍କ ସଲାସୁତୁରାରେ ଏଭଳି ଦୁର୍ନୀତି ଚାଲିଥିବାବେଳେ ଜିଲା ପ୍ରଶାସନ ଏହାର ଉଚ୍ଚସ୍ତରୀୟ ତଦନ୍ତ କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି।
ଏ ସମ୍ପର୍କରେ ଗ୍ରାମ ରୋଜଗାର ସେବକ ଦୀପୁନ ନାଏକଙ୍କ ସହିତ ଯୋଗାଯୋଗ କରାଯାଇଥିବାବେଳେ କୌଣସି ଉତ୍ତର ମିଳି ନ ଥିଲା। କନିଷ୍ଠ ଯନ୍ତ୍ରୀ ପ୍ରଦୀପ ମଲ୍ଲିକ କୁହନ୍ତି, ଏମିତି ହେବା କଥା ନୁହେଁ। ଏ ସମସ୍ତ କାମ ଗ୍ରାମ ରୋଜଗାର ସେବକଙ୍କର। ସେ ସମସ୍ତ ଗାଇଡ୍ଲାଇନ ଦେଖି କାର୍ଯ୍ୟ କରିବା କଥା। ବିଡିଓ ବୁଲ୍ବୁଲ୍ ବେହେରା କୁହନ୍ତି, ଅଭିଯୋଗ ସତ୍ୟ ହୋଇଥିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
