ଢେଙ୍କାନାଳ ଅଫିସ, ୧୪।୫ ଢେଙ୍କାନାଳ ଜିଲାବାସୀଙ୍କ ପାଇଁ ପ୍ରସ୍ତାବିତ ଜନହିତକର ପ୍ରକଳ୍ପ କେବଳ ଘୋଷଣାରେ ସୀମିତ ରହିଯାଉଛି। ଏହାକୁ ନେଇ ଉଦ୍ବେଗ ବ୍ୟକ୍ତ କରିଛି ସଚେତନ ନାଗରିକ ଫୋରମ୍। ଏହାର ପ୍ରତିବାଦରେ ଶୁକ୍ରବାର ଜିଲାପାଳଙ୍କୁ ୫ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଛି।
ଫୋରମ୍ ପକ୍ଷରୁ ଅଭିଯୋଗ କରାଯାଇଛି, ଢେଙ୍କାନାଳବାସୀଙ୍କ ଜଳକଷ୍ଟ ଦୂର କରିବାକୁ ମହାନଦୀରୁ ଜଳଯୋଗାଣ ପାଇଁ ୫ବର୍ଷ ତଳେ ନିଷ୍ପତ୍ତି ହୋଇଥିଲା। ଏହି ବହୁମୁଖୀ ପ୍ରକଳ୍ପ ଫାଇଲ ତଳୁ ମୁଣ୍ଡ ଟେକିପାରୁନି। ଢେଙ୍କାନାଳ ପର୍ଯ୍ୟଟନକୁ ସମୃଦ୍ଧ କରିବା ପାଇଁ କପିଳାସରେ ‘ରୋପ ଓ୍ବେ’ ବ୍ୟବସ୍ଥା କରିବାକୁ ଦୁଇବର୍ଷ ତଳେ ରାଜ୍ୟ ସରକାର କହିଥିଲେ। ହେଲେ ଏହା ମଧ୍ୟ କାର୍ଯ୍ୟକ୍ଷମ ହେଲାନାହିଁ। ସେହିପରି ଢେଙ୍କାନାଳକୁ ମେଡିକାଲ ହବ୍ରେ ପରିଣତ କରିବା ଲାଗି ଘୋଷଣା ହୋଇଥିଲା। ଏହା ମଧ୍ୟ କାର୍ଯ୍ୟକାରୀ କରାଯାଉନାହିଁ। କେନ୍ଦ୍ର ସରକାର ଦେଶରେ ୧୯୬ ନୂତନ ମେଡିକାଲ କଲେଜ କରିବାକୁ ନିଷ୍ପତ୍ତି ନେଇଥିବାବେଳେ ଏଥିରେ ଢେଙ୍କାନାଳର ସ୍ଥାନ ନାହିଁ, ଯାହା ଦୁର୍ଭାଗ୍ୟଜନକ। ସେହିପରି ଢେଙ୍କାନାଳ ସହରରେ ସିଟି ହସ୍ପିଟାଲ ନିର୍ମାଣ ପାଇଁ ଜିଲାକୁ ପ୍ରତିନିଧିତ୍ୱ କରୁଥିବା ଜନପ୍ରତିନିଧି ପ୍ରତିଶ୍ରୁତି ଦେଇଥିଲେ ମଧ୍ୟ ଏହାକୁ କାର୍ଯ୍ୟରେ ରୂପାନ୍ତରିତ କରିବାରେ କାହାରି ଆନ୍ତରିକତା ନାହିଁ ବୋଲି ଫୋରମ୍ର ସଦସ୍ୟମାନେ ଦାବିପତ୍ରରେ ଦର୍ଶାଇଛନ୍ତି।
ପ୍ରସ୍ତାବିତ ପ୍ରକଳ୍ପଗୁଡ଼ିକର ସ୍ଥିତି ସମ୍ପର୍କରେ ଗଣମାଧ୍ୟମ ଜରିଆରେ ଜନସାଧାରଣଙ୍କୁ ଅବଗତ କରିବା ପାଇଁ ଫୋରମ୍ର କାର୍ଯ୍ୟକାରୀ ସଭାପତି ସୁରେନ୍ଦ୍ର କୁମାର ମିଶ୍ର, ଉପସଭାପତି ଦୀପକ ପ୍ରସାଦ ପଟ୍ଟନାୟକ, ଭରତ କୁମାର ଦାସ, ଅମ୍ବିକା ପ୍ରସାଦ ମିଶ୍ର, ଦୟାନିଧି ବେହେରା, ଅମରେନ୍ଦ୍ର ସାହୁ, ଦଣ୍ଡପାଣି ଦାସ, ରୁଦ୍ରମାଧବ ହୋତା, ନଗେନ କର, ପ୍ରଶାନ୍ତ ସାହୁ, ରୁଦ୍ର ପ୍ରକାଶ ଶରଣ, ଗୋକୁଳ ଚନ୍ଦ୍ର ମାଝି ପ୍ରମୁଖ ଜିଲାପାଳଙ୍କ ନିକଟରେ ଦାବି କରିଛନ୍ତି।
