ଯୋଧପୁର,୮।୧୦ : ରାଜସ୍ଥାନର ଯୋଧପୁର ସହରରେ ଗ୍ୟାସ ରିଫିଲିଂ ସମୟରେ ଏକ ସିଲିଣ୍ଡର ବିସ୍ଫୋରଣ ଘଟିଛି। ଏହି ଦୁର୍ଘଟଣାରେ ତିନି ପିଲାଙ୍କ ସମେତ ୪ ଜଣଙ୍କର ମୃତ୍ୟୁ ହୋଇଛି। ୧୬ ଜଣ ଗୁରୁତର ଆହତ ହୋଇଛନ୍ତି। ବିସ୍ଫୋରଣର ଶବ୍ଦରେ ଆଖପାଖ କଲୋନୀ ମଧ୍ୟ କମ୍ପି ଯାଇଥିବା ସ୍ଥାନୀୟ ଲୋକେ କହିଛନ୍ତି। ଜିଲାପାଳ ହିମାଂଶୁ ଗୁପ୍ତାଙ୍କ ଅନୁଯାୟୀ, ଅପରାହ୍ନ ପ୍ରାୟ ତିନିଟା ବେଳେ କିର୍ତ୍ତୀ ନଗର ଅଞ୍ଚଳରେ ଏହା ଘଟିଛି। ନିକଟସ୍ଥ କଲୋନୀରେ ପାର୍କିଂ ହୋଇଥିବା ଗାଡିଗୁଡିକରେ ମଧ୍ୟ ନିଆଁ ଲାଗିଯାଇଥିବା ସେ ସୂଚନା ପ୍ରଦାନ କରିଛନ୍ତି।
ଏହି ଦୁର୍ଘଟଣାରେ ୧୨ ବର୍ଷୀୟ ନିକୁ , ୧୫ ବର୍ଷ ବୟସ୍କ ବିକି, ୧୩ ବର୍ଷ ବୟସ୍କା କୋମଲ ଏବଂ ୪୫ ବର୍ଷ ବୟସ୍କ ସୁରେଶ ଅଛନ୍ତି। ଆଠ ଜଣ ଲୋକଙ୍କ ଶରୀରର ୮୦ ପ୍ରତିଶତ ପର୍ଯ୍ୟନ୍ତ ଜଳିଯାଇଛନ୍ତି। ଅନୁସନ୍ଧାନରୁ ଜଣାପଡିଛି ଯେ ଯେଉଁ ଘରେ ରିଫିଲିଂ ଚାଲିଥିଲା ସେହି ଘର କୋଜାରାମ ଲୋହାରଙ୍କର ଥିଲା। କୋଜାରାମଙ୍କ ପୁଅ ଗ୍ୟାସ ରିଫିଲିଂ କାମ କରନ୍ତି । ଦୁର୍ଘଟଣାର କାରଣ କଣ ତାହା ବର୍ତ୍ତମାନ ସୁଦ୍ଧା ଜଣା ପଡିନାହିଁ। ରିଫିଲିଂ ସମୟରେ ଏହି ବିସ୍ଫୋରଣ ହୋଇଥିବା ସନ୍ଦେହ କରାଯାଉଛି।
ମୁଖ୍ୟମନ୍ତ୍ରୀ ଅଶୋକ ଗେହଲୋଟ ଟୁଇଟ କରି ଏନେଇ ଦୁଃଖ ପ୍ରକାଶ କରିଛନ୍ତି। ସେ ଲେଖିଛନ୍ତି ଯେ ଘଟଣା ସମ୍ପର୍କରେ ସୂଚନା ସ୍ଥାନୀୟ ପ୍ରଶାସନ ପକ୍ଷରୁ ନିଆଯାଇଛି। ଆହତଙ୍କ ଚିକିତ୍ସା ପାଇଁ ନିର୍ଦ୍ଦେଶନାମା ଜାରି କରାଯାଇଛି।
ଅନୁସନ୍ଧାନରେ ପ୍ରାୟ ଚାରି ଡଜନ ଘରୋଇ ଏବଂ ବ୍ୟବସାୟିକ ସିଲିଣ୍ଡର ମଧ୍ୟ ଘରୁ ବାହାର କରାଯାଇଛି। କୁହାଯାଉଛି ଯେ ଏହି ଘରଟି ଲୋକଙ୍କ ଘରେ ସିଲିଣ୍ଡର ନେଇଥିବା ହକରଙ୍କର। ବିସ୍ଫୋରଣରେ ଘରର କିଛି ଅଂଶ ମଧ୍ୟ ଭୁଶୁଡି ପଡିଛି। ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ଜିଲାପାଳ ଏବଂ ଏସପି ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ। ବିଧାୟକ ମନୀଷା ପାୱାର କହିଛନ୍ତି ଯେ ଏହି ଘଟଣା ସମ୍ପର୍କରେ ସିଏମଓ କାର୍ଯ୍ୟାଳୟରୁ ମନିଟରିଂ କରାଯାଉଛି। ସହରରେ ବେଆଇନ ଗ୍ୟାସ ରିଫିଲିଂ କାମ ଚାଲିଛି। ଏହାକୁ ପରୀକ୍ଷା କରାଯିବ।