ଟୋକିଓ, ୮।୮: ଜାପାନରେ ଗତ କିଛି ମାସ ଧରି ଲଗାତାର ଭୟଙ୍କର ଭୂକମ୍ପର ଝଟକା ଆତଙ୍କ ସୃଷ୍ଟି କରିଛି। ସମୁଦ୍ରରେ ଉଠୁଥିବା ଉଚ୍ଚ ଲହରୀ ଏବଂ ସୁନାମି ଆସିବାର ଆଶଙ୍କା ୨୦୧୧ର ଭୟାବହ ସ୍ମୃତିକୁ ପୁଣି ତାଜା କରିଦେଇଛି। ଏବେ ଜାପାନରେ ଆଉ ଏକ ପ୍ରାକୃତିକ ବିପର୍ଯ୍ୟୟ ବଡ଼ ଧରଣର ତାଣ୍ଡବ ରଚିବାକୁ ଆଗେଇ ଆସିଛି। ପ୍ରଶାନ୍ତ ମହାସାଗରରେ ଏକ ଅତ୍ୟନ୍ତ ଶକ୍ତିଶାଳୀ ଓ ବିନାଶକାରୀ ଚକ୍ରବର୍ତ୍ତୀ ଝଡ଼ ପ୍ରବେଶ କରିଛି, ଯାହାର ନାମ ‘ଡଲଫିନ’ ରଖାଯାଇଛି। ଏହି ଘୂର୍ଣ୍ଣିିଝଡ ପ୍ରଥମେ ଜାପାନ ଏବଂ ପରେ ଚାଇନାରେ ଲ୍ୟାଣ୍ଡଫଲ କରିବ ବୋଲି କୁହାଯାଉଛି। ଏହା ଉଭୟ ଦେଶର ସମୁଦ୍ରତଟୀୟ ଅଞ୍ଚଳରେ ଭୟଙ୍କର ବିନାଶ ଘଟାଇପାରେ।
ଜାପାନ ପାଣିପାଗ ବିଭାଗ (JMA) ଘୂର୍ଣ୍ଣିିଝଡର ଗତି ଓ ଆକାରକୁ ଦୃଷ୍ଟିରେ ରଖି ହାଇ ଆଲର୍ଟ ଜାରି କରିବା ସହ ଜରୁରୀକାଳୀନ ପରିସ୍ଥିତି ଘୋଷଣା କରିଛି। ଓକିନାୱା ଏବଂ କାଗୋଶିମା ଅଞ୍ଚଳର ପ୍ରାୟ ୨.୬ ଲକ୍ଷ ଲୋକଙ୍କୁ ସ୍ଥାନାନ୍ତର କରାଯାଇଛି। ୫୦୦ରୁ ଅଧିକ ବିମାନ ଉଡ଼ାଣ ବାତିଲ କରାଯାଇଥିବା ବେଳେ ଲୋକଙ୍କୁ ଘର ଭିତରେ ରହିବାକୁ କୁହାଯାଇଛି। ଘୂର୍ଣ୍ଣିିଝଡ ‘ଡଲଫିନ’ର ଲ୍ୟାଣ୍ଡଫଲ ଯୋଗୁ ସମୁଦ୍ରତଟୀୟ ଅଞ୍ଚଳରେ ଘଣ୍ଟାପ୍ରତି ୧୪୪ କିଲୋମିଟର ବେଗରେ ପବନ ବହୁଛି ଏବଂ ୨୦୦ କିଲୋମିଟର ବେଗରେ ପବନର ଝଟକା ଅନୁଭୂତ ହେଉଛି। ଟାଇଫୁନର ପ୍ରଭାବରେ ୧୪,୦୦୦ରୁ ଅଧିକ ଘରରେ ବିଦ୍ୟୁତ ସରବରାହ ବନ୍ଦ ହୋଇଯାଇଛି ଏବଂ ଜନଜୀବନ ଗୁରୁତର ଭାବେ ପ୍ରଭାବିତ ହୋଇଛି।
ଜାପାନ ପାଣିପାଗ ବିଭାଗ (JMA) ଅନୁସାରେ, ଟାଇଫୁନ ‘ଡଲଫିନ’ ଜାପାନର ଓକିନାୱା ଅଞ୍ଚଳର କୁମେ ଦ୍ୱୀପ ଉପରେ ରହିଛି। ଏହି ଦ୍ୱୀପ ରାଜଧାନୀଠାରୁ ପ୍ରାୟ ୧୬୦ କିଲୋମିଟର ଉତ୍ତର-ପଶ୍ଚିମରେ ଅବସ୍ଥିତ। ଦ୍ୱୀପ ଅତିକ୍ରମ କରିବା ପରେ ଟାଇଫୁନ ‘ଡଲଫିନ’ ପୂର୍ବ ଚାଇନା ସାଗରରେ ପହଞ୍ଚିବ ଏବଂ ସେଠାରୁ ଚୀନର ପୂର୍ବ ଉପକୂଳ ଦିଗକୁ ଗତି କରିବ।
ଚାଇନାରେ ଟାଇଫୁନର ପବନର ବେଗ ଘଣ୍ଟାପ୍ରତି ୫୦ରୁ ୧୬୨ କିଲୋମିଟର ପର୍ଯ୍ୟନ୍ତ ରହିପାରେ। ସେହିପରି ଘଣ୍ଟାପ୍ରତି ୨୧୬ କିଲୋମିଟର ବେଗରେ ପବନର ଝଟକା ମଧ୍ୟ ଅନୁଭୂତ ହୋଇପାରେ। ସମୁଦ୍ରରେ ୧୨ରୁ ୧୬.୫ ମିଟର ପର୍ଯ୍ୟନ୍ତ ଉଚ୍ଚ ଓ ବିପଜ୍ଜନକ ଲହରୀ ଉଠିପାରେ। ଆସନ୍ତା କିଛି ଘଣ୍ଟା ମଧ୍ୟରେ ଝଡ଼ ଆହୁରି ଶକ୍ତିଶାଳୀ ହୋଇପାରେ, ଯାହା ଫଳରେ ଭାରୀରୁ ଅତିଭାରୀ ବର୍ଷା ହେବାର ଆଶଙ୍କା ରହିଛି।
