ଗୁଣପୁର, ୧୮/୭ (ସୁଜାତା ପାଢ଼ୀ): ଗୁଡାରି ୧୯୭୨ ମସିହାରେ ଏନ୍ଏସିର ମାନ୍ୟତା ପାଇଥିଲା। ଏହାଛଡ଼ା ଗୁଡାରି ବ୍ଲକ ୯ଟି ଗ୍ରାମପଞ୍ଚାୟତକୁ ନେଇ ଗଠିତ। ଏହା ଏକ ଆଦିବାସୀ ଅଧ୍ୟୁଷିତ ଅଞ୍ଚଳ। କିନ୍ତୁ ଗୁଡାରିରୁ ରାଜଧାନୀ ଭୁବନେଶ୍ୱରକୁ ଯାତାୟାତ ପାଇଁ ସିଧାସଳଖ କୌଣସି ସରକାରୀ କିମ୍ବା ବେସରକାରୀ ବସ ସୁବିଧା ନାହିଁ।
ଗୁଡାରିରୁ ଭୁବନେଶ୍ୱର ଯିବା କିମ୍ବା ଫେରିବା ପାଇଁ ଅଞ୍ଚଳବାସୀଙ୍କୁ ପ୍ରଥମେ ୨୦ କିଲୋମିଟର ଦୂରରେ ଥିବା ପଦ୍ମପୁର କିମ୍ବା ଗୁମୁଡାକୁ ଯିବାକୁ ପଡ଼ୁଛି। ଏହି ଅଞ୍ଚଳରୁ ପ୍ରତିଦିନ ଅନେକ ଲୋକ ଭୁବନେଶ୍ୱର ଯାତାୟାତ କରୁଥିବା ବେଳେ, ଭୁବନେଶ୍ୱରରୁ ରାତ୍ରିକାଳୀନ ବସରେ ଫେରି ପଦ୍ମପୁର କିମ୍ବା ଗୁମୁଡାରେ ଭୋର ୩ଟାରୁ ୪ଟା ମଧ୍ୟରେ ଓହ୍ଲାଇଥାନ୍ତି। ସେଠାରେ ଗୁଡାରି ଯିବା ବସ ପାଇଁ ସେମାନଙ୍କୁ ୪ରୁ ୫ ଘଣ୍ଟା ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ୁଛି।
ବାରମ୍ବାର ଦାବି ଓ ଅଭିଯୋଗ ପରେ ୨୦୨୩ ମସିହାରେ ଗୁଡାରିରୁ ଭୁବନେଶ୍ୱରକୁ ଗୋଟିଏ ସରକାରୀ ବସ ସେବା ଆରମ୍ଭ କରାଯାଇଥିଲା। ତେବେ ଏହି ବସକୁ ଦୈନିକ ପ୍ରାୟ ୪୦୦ କିଲୋମିଟର ଯାଇ ପୁଣି ସେହି ଦିନ ଫେରିବାକୁ ପଡ଼ୁଥିଲା। ୨୪ ଘଣ୍ଟା ମଧ୍ୟରେ ପ୍ରାୟ ୮୦୦ କିଲୋମିଟର ଚଳାଚଳ କରିବା କଷ୍ଟସାଧ୍ୟ ହୋଇଥିବାରୁ ସେବା ଆରମ୍ଭର କିଛି ଦିନ ପରେ ଦିଗପହଣ୍ଡି ନିକଟରେ ବସଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହା ପରଠାରୁ ଏହି ବସ ସେବା ବନ୍ଦ ରହିଥିବାରୁ ଗୁଡାରି ଅଞ୍ଚଳବାସୀ ଏହି ସୁବିଧାରୁ ବଞ୍ଚିତ ଅଛନ୍ତି।
ବସ ସେବା ପୁନଃ ଚାଲୁ କରିବା ଦାବିରେ ସ୍ଥାନୀୟ “ୟୁଥ ଫର ଚେଞ୍ଜ” ଯୁବଗୋଷ୍ଠୀ ପକ୍ଷରୁ ଅଞ୍ଚଳବାସୀଙ୍କ ସହଯୋଗରେ ଜିଲାପାଳ, ବିଧାୟକ, ଏମ୍ ପି ଓ ପରିବହନ ମନ୍ତ୍ରୀଙ୍କୁ ବାରମ୍ବାର ଲିଖିତ ଭାବେ ଅବଗତ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସୁଫଳ ମିଳିନାହିଁ।
ଏହି ପରିପ୍ରେକ୍ଷୀରେ, ଆସନ୍ତା ସେପ୍ଟେମ୍ବର ୩୦ ତାରିଖ ସୁଦ୍ଧା ଗୁଡାରିରୁ ଭୁବନେଶ୍ୱର ଉଭୟ ପାର୍ଶ୍ୱରେ ସରକାରୀ ବସ ସେବା ଆରମ୍ଭ ନ କରାଗଲେ, ପବିତ୍ର ଗାନ୍ଧୀ ଜୟନ୍ତୀ ଅବସରରେ ଅକ୍ଟୋବର ୨ ତାରିଖରେ ସେ ସାଇକେଲରେ ପ୍ରାୟ ୪୦୦ କିଲୋମିଟର ଯାତ୍ରା କରି ଭୁବନେଶ୍ୱରରେ ମୁଖ୍ୟମନ୍ତ୍ରୀଙ୍କୁ ଭେଟି ଦାବିପତ୍ର ପ୍ରଦାନ କରିବେ ବୋଲି ସ୍ଥାନୀୟ ବାସିନ୍ଦା ପ୍ରମୋଦ କୁମାର ପତି ଶନିବାର ବିଡିଓ ସୁଚିସ୍ମିତା ବେହେରାଙ୍କ ଜରିଆରେ ଦାବିପତ୍ର ପ୍ରଦାନ କରିଛନ୍ତି।
ଅଞ୍ଚଳବାସୀଙ୍କ ସହଯୋଗ ଓ ଆଶୀର୍ବାଦ ନେଇ ମା’ ମାଣିକେଶ୍ୱରୀଙ୍କ ନିକଟରେ ନଡ଼ିଆ ଭାଙ୍ଗି ସାଇକେଲରେ ଭୁବନେଶ୍ୱର ଅଭିମୁଖେ ଯାତ୍ରା ଆରମ୍ଭ କରିବେ ବୋଲି ପ୍ରମୋଦ କୁମାର ପତି ଦୃଢ଼ତାର ସହ ପ୍ରକାଶ କରିଛନ୍ତି। ବର୍ତ୍ତମାନ ସରକାର ଏହି ଗୁରୁତ୍ୱପୂର୍ଣ୍ଣ ଦାବି ପ୍ରତି କି ପଦକ୍ଷେପ ନେଉଛନ୍ତି, ତାହା ଉପରେ ଅଞ୍ଚଳବାସୀଙ୍କ ନଜର ରହିଛି।
Dharitri – Odisha’s No.1 Odia Daily
