କଟକ ଅଫିସ, ୨୯ା୪: ନାବାଳିକାଙ୍କ ଅଶ୍ଳୀଳ ଫଟୋ ଏଡିଟିଂ କରି ସେମାନଙ୍କୁ ବ୍ଲାକ୍ମେଲ୍ କରୁଥିଲେ। ଏହି ଅଭିଯୋଗରେ କଟକ ସାଇବର ଥାନା ପୋଲିସ ଜଣେ ଯୁବକଙ୍କୁ ଶୁକ୍ରବାର ଗିରଫ କରିଛି। ଗିରଫ ଅଭିଯୁକ୍ତ ହେଲେ କଟକ ନେମାଳ ଅଞ୍ଚଳର ୨୨ବର୍ଷୀୟ ବିଶ୍ୱଜିତ ଭୂୟାଁ। ଅଧିକ ତଥ୍ୟ ହାସଲ ପାଇଁ ତାଙ୍କୁ ପୋଲିସ ପଚରାଉଚରା କରୁଛି। ଏନେଇ ଜଣେ ଛାତ୍ରୀ କଟକ ସାଇବର ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ କରି କାର୍ଯ୍ୟାନୁଷ୍ଠାନ ନେଇଥିବା ଡିସିପି ପ୍ରତୀକ ସିଂ ଏକ ଖବତଦାତା ସମ୍ମିଳନୀରେ ସୂଚନା ଦେଇଛନ୍ତି।
ଡିସିପି ସିଂ କହିଛନ୍ତି ଯେ, ଅଭିଯୁକ୍ତ ବିଶ୍ୱଜିତ ସୋସିଆଲ ମିଡିଆ ମାଧ୍ୟମରେ ନାବାଳିକାମାନଙ୍କୁ ଫ୍ରେଣ୍ଡ ରିକ୍ୟୁଏଷ୍ଟ ପଠାଉଥିଲେ। ସମ୍ପୃକ୍ତ ନାବାଳିକା ଫ୍ରେଣ୍ଡ ରିକ୍ୟୁଏଷ୍ଟ ଗ୍ରହଣ କରିବା ପରେ ତାଙ୍କ ଆକାଉଣ୍ଟରେ ଥିବା ଫଟୋଗୁଡ଼ିକୁ ଡାଉନଲୋଡ୍ କରି ଏଡିଟିଂ ଜରିଆରେ ସେଗୁଡିକୁ ଅଶ୍ଳୀଳ ଫଟୋ ରୂପଦେଇ ଏକ ଫେକ ଆକାଉଣ୍ଟରୁ ସମ୍ପୃକ୍ତ ନାବାଳିକାଙ୍କୁ ପଠାଉଥିଲେ। ପରେ ସେ ନାବାଳିକାଙ୍କୁ ଫେକ୍ ଆକାଉଣ୍ଟରୁ ଭିଡିଓ କଲ ଗ୍ରହଣ କରିବା ପାଇଁ ମେସେଜ କରୁଥିଲେ। ଭିଡିଓ କଲ୍ ବେଳେ ନାବାଳିକାଙ୍କ ଭିଡିଓ ରେକର୍ଡିଂ କରି ବ୍ଲାକମେଲ୍ କରୁଥିଲେ। ଏହିଭଳି ପ୍ରାୟ ୪୫ଜଣ ନାବାଳିକାଙ୍କୁ ବ୍ଲାକମେଲ୍ କରିବା ପାଇଁ ଅଭିଯୁକ୍ତ ମାଷ୍ଟର ପ୍ଲାନ କରିଥିବାବେଳେ ବରିଷ୍ଠ ନାଗରିକ ମଧ୍ୟ ଏହି ଜାଲରୁ ବାଦ୍ ପଡ଼ିନାହାନ୍ତି ବୋଲି ଡିସିପି ସୂଚନା ଦେଇଛନ୍ତି। ଏଭଳି ଘଟଣା ଦିନକୁ ଦିନ ବୃଦ୍ଧି ପାଉଥିବାରୁ ଏନେଇ ସତର୍କ ରହିବାକୁ ଡିସିପି ପରାମର୍ଶ ଦେଇଛନ୍ତି। ନିଜର ଫଲୋଅର୍ସ ବଢାଇବା ପାଇଁ ଅଜଣା ଲୋକଙ୍କୁ ବନ୍ଧୁତା ନିବେଦନ ନ ପଠାଇବା ସହ ଅଜଣା ଲୋକଙ୍କ ଫେଣ୍ଡ ରିକ୍ୟୁଏଷ୍ଟ ଗ୍ରହଣ ନ କରିବାକୁ ସେ ପରାମର୍ଶ ଦେଇଛନ୍ତି।
