ନ୍ୟୁୟର୍କ,୮ା୩:ଗତ କିଛି ଦିନ ହେଲା ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟରେ ନିଅଁା ଲାଗିଛି। ୟୁକ୍ରେନ ଉପରେ ରୁଷିଆ ଚଳାଇଥିବା ଯୁଦ୍ଧର ପ୍ରତ୍ୟକ୍ଷ ପ୍ରଭାବ ଏହା ଉପରେ ଦେଖାଯାଉଛି। ସୋମବାର ଅଶୋଧିତ ତୈଳ ମୂଲ୍ୟ ୨୦୦୮ ମସିହା ପରଠାରୁ ସର୍ବୋଚ୍ଚ ସ୍ତରରେ ପହଞ୍ଚତ୍ଛି, ଯାହାକି ଏକ ବ୍ୟାରେଲର ଦର ୧୩୯ ଆମେରିକୀୟ ଡଲାର ଅତିକ୍ରମ କରିଥିଲା। ଏଭଳି ମୂଲ୍ୟ ବୃଦ୍ଧିର ଦୁଇଟି ପ୍ରମୁଖ କାରଣ ରହିଛି। ଗୋଟିଏ ହେଲା ବିଶ୍ୱର ଦ୍ୱିତୀୟ ବୃହତ୍ ତୈଳ ଉତ୍ପାଦକ ରୁଷିଆଠାରୁ ତୈଳ ଆମଦାନୀ ଉପରେ ପ୍ରତିବନ୍ଧକ ଲଗାଇବାକୁ ଆମେରିକା ଏବଂ ୟୁରୋପୀୟ ଦେଶଗୁଡ଼ିକ ଚିନ୍ତା କରୁଛନ୍ତି। ଦ୍ୱିତୀୟ ହେଲା ବିଶ୍ୱ ବଜାରକୁ ଇରାନର ଅଶୋଧିତ ତୈଳ ଫେରିବାରେ ବିଳମ୍ବ ଘଟିବା। ଏହି ପରିପ୍ରେକ୍ଷୀରେ ସୋମବାର ତୈଳ ମୂଲ୍ୟରେ ପ୍ରାୟ ୧୦ ଡଲାର ବୃଦ୍ଧି ପାଇଥିଲା। ଫଳରେ ବ୍ରେଣ୍ଟ ଅଶୋଧିତ ତୈଳ ବ୍ୟାରେଲ ପିଛା ୧୩୯.୧୩ ଡଲାରରେ ପହଞ୍ଚିଥିବାବେଳେ ଆମେରିକାର ଓ୍ବେଷ୍ଟ ଟେକ୍ସାସ୍ ଇଣ୍ଟରମିଡିଏଟ୍ (ଡବ୍ଲ୍ୟୁଟିଆଇ) ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା ୧୩୦.୫ ଡଲାର ହୋଇଥିଲା। ପରବର୍ତ୍ତୀ ସମୟରେ ଦରରେ ପରିବର୍ତ୍ତନ ଘଟି ବ୍ରେଣ୍ଟ ବ୍ୟାରେଲ ପିଛା ୧୨୫.୫୫ ଡଲାର ହୋଇଥିବାବେଳେ ଡବ୍ଲ୍ୟୁଟିଆଇ ୧୨୩.୩୭ ଡଲାର ହୋଇଥିଲା। ୨୦୦୮ ଜୁଲାଇରେ ଏହି ଦୁଇ ତୈଳ ବେଞ୍ଚ୍ମାର୍କର ବ୍ୟାରେଲ ପିଛା ମୂଲ୍ୟ ଯଥାକ୍ରମେ ୧୪୭.୫ ଡଲାର ଏବଂ ୧୪୭.୨୭ ଡଲାର ରହିଥିଲା।
ତୈଳ ମୂଲ୍ୟ ବୃଦ୍ଧି ପ୍ରଭାବ ଭାରତର ଶେୟାର ବଜାର ଏବଂ ଟଙ୍କା ଉପରେ ଗୁରୁତର ଭାବେ ପଡ଼ିଛି। ସୋମବାର ବିଏସ୍ଇ ସେନ୍ସେକ୍ସ ୧୪୯୧.୦୬ ପଏଣ୍ଟ ଏବଂ ଏନ୍ଏସ୍ଇ ନିଫି୍ଟ ୩୮୦.୨୦ ପଏଣ୍ଟ ଖସିଥିବାବେଳେ ଆମେରିକୀୟ ଡଲାର ତୁଳନାରେ ଟଙ୍କା ସର୍ବକାଳୀନ ଦୁର୍ବଳ ସ୍ତରକୁ ପହଞ୍ଚତ୍ଛି। ସୋମବାର କାରବାର ଆରମ୍ଭ ହେବାବେଳକୁ ୧ ଡଲାରର ମୂଲ୍ୟ ଭାରତୀୟ ମୁଦ୍ରାରେ ୭୬.୮୫ ଟଙ୍କା ଥିବାବେଳେ ତାହା ସର୍ବକାଳୀନ ତଳସ୍ତର ୭୭.୦୧ ଟଙ୍କାକୁ ଛୁଇଁଥିଲା। କାରବାର ଶେଷ ବେଳକୁ ତାହା ୭୬.୯୩ ହୋଇଥିଲା, ଯାହାକି ପୂର୍ବଦିନ ଅପେକ୍ଷା ୭୬ ପଇସା ଦୁର୍ବଳ ହୋଇଥିଲା।
ରୁଷିଆ ରାଷ୍ଟ୍ରପତି ଭ୍ଲାଡିମିର୍ ପୁଟିନ ଯୁଦ୍ଧ ଘୋଷଣା କରିବା ପରଠାରୁ ତୈଳ ଓ ଗ୍ୟାସ୍ ରପ୍ତାନିରେ ବ୍ୟାଘାତ ହେବା ଭୟ ବଢ଼ିଯାଇଥିଲା, ଯାହା ବର୍ତ୍ତମାନ ସ୍ପଷ୍ଟ ଦେଖାଯାଉଛି। ରୁଷିଆ ମୁଖ୍ୟତଃ ଅଶୋଧିତ ତୈଳ ୟୁରୋପୀୟ ରିଫାଇନାରିଗୁଡ଼ିକୁ ବିକ୍ରି କରେ। ୟୁରୋପୀୟ ଦେଶଗୁଡ଼ିକ ରୁଷିଆରୁ ୨୦%ରୁ ଊର୍ଦ୍ଧ୍ୱ ତେଲ ନେଇଥାନ୍ତି। ଆମେରିକୀୟ ଅର୍ଥ ବିଶେଷଜ୍ଞ ଜେ.ପି. ମୋର୍ଗାନଙ୍କ କହିବାନୁଯାୟୀ, ଯଦି ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଆଗକୁ ବଢ଼େ ତେବେ ଅଶୋଧିତ ତୈଳର ମୂଲ୍ୟ ବ୍ୟାରେଲ ପିଛା ୧୮୫ ଡଲାରରେ ପହଞ୍ଚିପାରେ। କୁହାଯାଉଛି ଯେ, ଅଶୋଧିତ ତୈଳର ମୂଲ୍ୟରେ ଯଦି ଏକ ଡଲାର ବୃଦ୍ଧି ହୁଏ, ଭାରତରେ ପେଟ୍ରୋଲ ଏବଂ ଡିଜେଲ ଲିଟର ମୂଲ୍ୟ ୫୦ରୁ ୬୦ ପଇସା ବୃଦ୍ଧି ପାଇବ। ଯୁଦ୍ଧ ପରିସ୍ଥିତିରେ ଉତ୍ପାଦନ ହ୍ରାସ ଏବଂ ଯୋଗାଣ ବାଧାପ୍ରାପ୍ତ ହେତୁ ଏହାର ମୂଲ୍ୟ ଅନିଶ୍ଚିତ ହେବାରେ ଲାଗିଛି। ସୋମବାରର ମୂଲ୍ୟ ବୃଦ୍ଧିକୁ ଦେଖିଲେ, ଖୁବ୍ଶୀଘ୍ର ଅଶୋଧିତ ତୈଳ ବ୍ୟାରେଲ ପିଛା ୧୫୦ ଡଲାର ଅତିକ୍ରମ କରିବା ନିଶ୍ଚିତ ମନେ ହେଉଛି। ଫଳରେ ଭାରତରେ ପେଟ୍ରୋଲ ଏବଂ ଡିଜେଲର ଲିଟର ପିଛା ମୂଲ୍ୟ ୧୫ରୁ ୨୨ ଟଙ୍କା ବୃଦ୍ଧି ପାଇବା ଯଥେଷ୍ଟ ସମ୍ଭାବନା ରହିଛି। ଭାରତ ହେଉଛି ଅଶୋଧିତ ତୈଳର ଏକ ପ୍ରମୁଖ ଆମଦାନୀକାରୀ ଏବଂ ୮୫%ରୁ ଅଧିକ କ୍ରୟ କରିଥାଏ। ଆମଦାନୀ ହେଉଥିବା ଅଶୋଧିତ ତୈଳର ମୂଲ୍ୟକୁ ଭାରତ ଆମେରିକୀୟ ଡଲାରରେ ଦେଉଛି। ଏଭଳି ପରିସ୍ଥିତିରେ ଅଶୋଧିତ ତୈଳର ଦରବୃଦ୍ଧି ଏବଂ ଭାରତୀୟ ଟଙ୍କା ତୁଳନାରେ ଡଲାର ମଜଭୁତ ହେବା ଦେଶରେ ପେଟ୍ରୋଲ ଓ ଡିଜେଲ ସମେତ ସବୁ ସାମଗ୍ରୀ ମୂଲ୍ୟବୃଦ୍ଧିର କାରଣ ହେଉଛି। ୟୁକ୍ରେନ୍ ଯୁଦ୍ଧ ଆରମ୍ଭର ୧୨ ଦିନ ମଧ୍ୟରେ ଭାରତୀୟ ଶେୟାର ବଜାରରେ ବାରମ୍ବାର ବଡ଼ଧରଣର ହ୍ରାସ ଘଟୁଛି। ସେନ୍ସେକ୍ସ ଗତ ଫେବୃୟାରୀ ୨୪ରେ ୨୭୦୨ ପଏଣ୍ଟ, ମାର୍ଚ୍ଚ ୨ରେ ୭୭୮ ପଏଣ୍ଟ ଏବଂ ମାର୍ଚ୍ଚ ୪ରେ ୭୬୯ ପଏଣ୍ଟ ହ୍ରାସ ପାଇଥିଲା। ସୋମବାର ଏହା ୧୪୯୧ ପଏଣ୍ଟ ହ୍ରାସ ପାଇ ୫୨,୮୪୨.୭୫ରେ ବନ୍ଦ ହୋଇଥିଲା। ନିଫ୍ଟି କାରବାର ୩୮୨.୨୦ ପଏଣ୍ଟ ହ୍ରାସ ପାଇ ୧୫,୮୬୩.୧୫ରେ ବନ୍ଦ ହୋଇଥିଲା। ଏହାଦ୍ୱାରା ନିବେଶକମାନେ ୫.୪୩ ଲକ୍ଷ କୋଟି ଟଙ୍କା ହରାଇଛନ୍ତି।
