ମହାକାଳପଡ଼ା,୨୬ା୩ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ନଦୀ ନାଳଘେରା ବତିଘର ଅଞ୍ଚଳ ମହାନଦୀ ଅବବାହିକା ଶାଖା ନାଳଗୁଡ଼ିକରେ କୁମ୍ଭୀର ମାଳ ମାଳ ଭାସୁଛନ୍ତି। ହେଲେ ସ୍ଥାନୀୟ ମତ୍ସ୍ୟଜୀବୀମାନେ ପରିବାର ପ୍ରତିପୋଷଣ ପାଇଁ ଦୈନନ୍ଦିନ ନିକଟସ୍ଥ ଜଙ୍ଗଲ ତଥା ହେଟା ମୁଣ୍ଡିଆ ସଂରକ୍ଷିତ ଜଙ୍ଗଲ, ସରଳିକୁଦ, ଯୋଗିଧାନକୁଦ, ହସିଣା କନ୍ଧା, କଂସାର ଡିଆ ଓ ନିପାଣିଆ ଜଙ୍ଗଲକୁ ଯାଇ ମାଛ କଙ୍କଡା ଧରି ନିକଟସ୍ଥ ବଜାରରେ ବିକ୍ରି କରି ଦୁଇ ପଇସା ରୋଜଗାର କରନ୍ତି। ଅପରପକ୍ଷରେ ଏହି ବତିଘର ଅଞ୍ଚଳର ନାଳ ପାର ହେବା ପାଇଁ ସୋଲ ତିଆରି ଭେଳାରେ ଯାତାୟାତ କରୁଥିବା ଦେଖିବାକୁ ମିଳୁଛି। ସେହିପରି ଏହି ନାଳରେ ସାମୁଦ୍ରିକ ଜୁଆର ପାଣି ମାଡିଲେ ମାଳ ମାଳ କୁମ୍ଭୀର ଭାସୁଛନ୍ତି। ନଦୀରେ ମାଛ, କଙ୍କଡ଼ା ଧରିବା ସମୟରେ ଅସାବଧାନତା ଯୋଗୁ ଅନେକ ସମୟରେ କୁମ୍ଭୀର ଆକ୍ରମଣର ଶିକାର ହେଉଛନ୍ତି। ୨ବର୍ଷ ମଧ୍ୟରେ ୪ରୁ ୫ଜଣ କୁମ୍ଭୀର ଆକ୍ରମଣରେ ଶିକାର ହୋଇଥିବା ନଜୀର ରହିଛି। ଅପରପକ୍ଷରେ ସ୍ଥାନୀୟ ବନ ବିଭାଗ ପକ୍ଷରୁ ନଦୀରେ ପ୍ରବେଶକୁ ବାରଣ କରାଯାଇଛି। ହେଲେ ଲୋକମାନେ ଜୀବନ ଜୀବିକା ନିର୍ବାହ ପାଇଁ ନାଳ ପାର ହେବାକୁ ପଡେ ବୋଲି କେତେଜଣ ମହିଳା କହିଛନ୍ତି।
