କୋଲକାତା, ୧୨।୧୧: କୋଭିଡ୍- ୧୯ ମହାମାରୀ କାରଣରୁ ଆଉ ଏକ ମେଗା ଚେସ୍ ଇଭେଣ୍ଟ ବାତିଲ ହୋଇଛି। ସ୍ବାସ୍ଥ୍ୟ ଓ ନିରାପତ୍ତାକୁ ଦୃଷ୍ଟିରେ ରଖି ଟାଟା ଷ୍ଟିଲ ଚେସ୍ ଇଣ୍ଡିଆ ରାପିଡ୍ ଆଣ୍ଡ ବ୍ଲିଜ ଟୁର୍ନାମେଣ୍ଟର ୨୦୨୦ ସଂସ୍କରଣକୁ ବାତିଲ କରାଯାଇଛି। ଏହି ଚେସ୍ ପ୍ରତିଯୋଗିତା ଭାରତର ପ୍ରଥମ ଚେସ୍ ସୁପର ଟୁର୍ନାମେଣ୍ଟର ମାନ୍ୟତା ପାଇଥିଲା। ଗତ ଦୁଇଟି ସଂସ୍କରଣରେ ଏହି ଚେସ୍ ପ୍ରତିତଯୋଗିତା ଗ୍ଲୋବାଲ ଚେସ୍ କ୍ୟାଲେଣ୍ଡରରେ ସ୍ବତନ୍ତ୍ର ସ୍ଥାନ ହାସଲ କରିଥିଲା। ବିଶ୍ୱର ଏକାଧିକ ତାରକା ଖେଳାଳି ଏଥିରେ ଅଂଶଗ୍ରହଣ କରିଛନ୍ତି। ୨୦୧୯ ସଂସ୍କରଣରେ ମାଗ୍ନସ କାର୍ଲସେନ ଅଂଶଗ୍ରହଣ କରି ଚାମ୍ପିୟନ ହୋଇଥିଲେ। ଗ୍ରାଣ୍ଡ ଚେସ୍ ଟୁରର ଅଂଶବିଶେଷ ହୋଇଥିବା ଏହି ଟୁର୍ନାମେଣ୍ଟରେ ୧୦ଜଣ ଗ୍ରାଣ୍ଡମାଷ୍ଟର ଭାଗ ନେଇଥିଲେ। ପେସାଦାର ଚେସ୍ ଖେଳାଳି, ଚେସ୍ ଜର୍ନାଲିଷ୍ଟ ଓ ଚେସ୍ ପ୍ରେମୀଙ୍କ ନିକଟରେ ଏହାର ଲୋକପ୍ରିୟତା ଶୀର୍ଷକୁ ଛୁଇଁ ଥିଲା।
ଚେସ୍ ସହିତ ଜଡିତ ରହି ଆମେ ଗର୍ବିତ। ଗତ ଦୁଇଟି ସଂସ୍କରଣକୁ ବେଶ୍ ସଫଳତାର ସହ ଆୟୋଜନ କରିଥିଲୁ। ଭବିଷ୍ୟତରେ ମଧ୍ୟ ଏହି ଟୁର୍ନାମେଣ୍ଟ ଆମେ ଆୟୋଜନ କରିବୁ। ଏହାର ଲୋକପ୍ରିୟତାରେ ମଧ୍ୟ ଆହୁରି ବୃଦ୍ଧି ପରିଲକ୍ଷିତ ହେବ। କିନ୍ତୁ କୋଭିଡ୍-୧୯ ମହାମାରୀ ପ୍ରକୋପକୁ ଦୃଷ୍ଟିରେ ରଖି ଏଥର ଏହି ଟୁର୍ନାମେଣ୍ଟକୁ ବାତିଲ କରିବାକୁ ନିଷ୍ପତ୍ତି ନେଇଛୁ ବୋଲି ଟାଟା ଷ୍ଟିଲ୍ କର୍ପୋରେଟ ସର୍ଭିସ ଉପସଭାପତି ଚାଣକ୍ୟ ଚୌଧୁରୀ କହିଛନ୍ତି।
