ବରେଲି,୨୮ା୧୨: ଉତ୍ତରପ୍ରଦେଶରେ ଧର୍ମାନ୍ତରୀକରଣ ବା ‘ଲଭ ଜିହାଦ୍’ ଆଇନ ପ୍ରଚଳନ ପରେ ଅଲଗା ଧର୍ମର ପ୍ରେମୀଯୁଗଳଙ୍କୁ ଘାରିଛି ଗିରଫଦାରୀ ଭୟ। ଉଭୟ ଝିଅ ଓ ପୁଅ ସେମାନଙ୍କ ସମ୍ପର୍କ ପାଇଁ ରାଜିଥିଲେ ବି ପରିବାରର ବିରୋଧ ଯୋଗୁ ମାମଲା ଆଶଙ୍କାରେ ଘର ଛାଡ଼ିବାକୁ ବାଧ୍ୟ ହେଉଥିବା ଘଟଣା ଏହି ରାଜ୍ୟରେ ବଢ଼ିବାରେ ଲାଗିଛି। ନିୟମ ଚାଲୁହେବାର ମାସେ ମଧ୍ୟରେ ୩୫ରୁ ଅଧିକ ଜଣଙ୍କୁ ଏହି ଆଇନ ବଳରେ ଗିରଫ କରାଗଲାଣି। ଏଥିସହ ଦିନକୁ ଦିନ ଏ ସଂକ୍ରାନ୍ତ ମାମଲା ସଂଖ୍ୟା ବି ବୃଦ୍ଧିପାଉଛି।
ମହମ୍ମଦ ଇକବାଲ୍ ନାମକ ଜଣେ ମୁସଲମାନ ସମ୍ପ୍ରଦାୟର ଯୁବକଙ୍କ ପ୍ରେମରେ ପଡ଼ିଥିବା ବାରଣାସୀର ଜଣେ ୨୬ ବର୍ଷୀୟ ହିନ୍ଦୁ ଯୁବତୀ ସ୍କୃତି ଏବେ ଗିରଫ ଆଶଙ୍କାରେ ପ୍ରେମିକଙ୍କ ସହ ଘର ଛାଡ଼ି ଦିଲ୍ଲୀ ଆସିଥିବା ସଦ୍ୟ ଘଟଣା ଏହାର ଉଦାହରଣ ଭାବେ ନିଆଯାଇପାରେ। ସ୍ମୃତିଙ୍କ କହିବା ମୁତାବକ, ଇକବାଲଙ୍କ ସହ ଦେଖିଦେବା ପରେ ପରିବାର ଲୋକ ତାଙ୍କୁ ଏକ ଘରେ ବନ୍ଦ କରିଦେଇଥିଲେ। ପରେ ଜଣେ ହିପ୍ନୋଟିଷ୍ଟଙ୍କ ନିକଟକୁ ନେଇ ତାଙ୍କ ପରୀକ୍ଷା କରାଇଥିଲେ। ଇକବାଲଙ୍କଠାରୁ ଦୂରେଇ ରହିବାକୁ ଚାପ ବଢ଼ିବାରୁ ସେମାନେ ବାଧ୍ୟ ହୋଇ ରାଜ୍ୟ ବାହାରକୁ ପଳାଇଛନ୍ତି। ଏବେ ଦିଲ୍ଲୀରେ ରହି ଉଭୟେ ଏହି ସ୍ବତନ୍ତ୍ର ଆଇନ ଅଧୀନରେ ବିବାହ ପାଇଁ ଆବେଦନ କରିଥିବା କୁହନ୍ତି। ଯେ ପର୍ଯ୍ୟନ୍ତ ନିୟମ ଅନୁଯାୟୀ ବାହାଘର ନ ହୋଇଛି ସେ ପର୍ଯ୍ୟନ୍ତ ସେମାନଙ୍କ ଜୀବନ ପ୍ରତି ବିପଦ ରହିଛି। ଆସନ୍ତା ଫେବୃୟାରୀରେ ବିବାହ ତାରିଖ ପର୍ଯ୍ୟନ୍ତ ସେମାନଙ୍କୁ ଘର ବାହାରେ ରହିବାକୁ ପଡିବ। ସେହିପରି ୟୁପିର ଏକ ଛୋଟ ସହରର ମହମ୍ମଦ ସଦାବ(୨୪) ଓ ଅନାମିକା(୨୩)ଙ୍କ କାହାଣୀ ମଧ୍ୟ ସମାନ। ୪ ବର୍ଷର ପ୍ରେମ ସମ୍ପର୍କରେ ବାଧା ସାଜିଥିଲେ ଯୁବତୀଙ୍କ ପରିବାର। ଏଥିପାଇଁ ଅନେକ ଖରାପ ସମୟ ଓ ପରିସ୍ଥିତିର ସାମ୍ନା କରିବାକୁ ପଡିଥିବା ସଦାବ କୁହନ୍ତି। ଅନାମିକାଙ୍କ ସହ ସମ୍ପର୍କ କାଟିବାକୁ ଚାପ ସତ୍ତ୍ୱେ ସେମାନେ ପରସ୍ପରଠାରୁ ଅଲଗା ହୋଇ ନ ଥିଲେ ବି ଏବେ ଏହି ନୂଆ ଆଇନ ଆଉ ଏକ ବାଧା ହୋଇ ଛିଡ଼ା ହୋଇଛି। ଅନାମିକାଙ୍କ ପାଇଁ ନିଜ ଧର୍ମ ମଧ୍ୟ ପରିବର୍ତ୍ତନ କରି ହିନ୍ଦୁ ହେବାରେ କୌଣସି ଅସୁବିଧା ନ ଥିବା ସଦାବ କହିଛନ୍ତି। ଯଦି ଏଥିରେ ବି ପ୍ରତିବାଦ କରାଯାଏ ତେବେ ଉଭୟେ ୟୁପି ଛାଡ଼ି ବାହାରେ ରହିବାକୁ ବାଧ୍ୟ ହେବେ। ଜରୁରୀ ପଡିଲେ ସେମାନେ କୋର୍ଟର ମଧ୍ୟ ଆଶ୍ରୟ ନେବେ ବୋଲି ପ୍ରକାଶ କରିଛନ୍ତି। ଶାହାଜହାନପୁରର ସିମ୍ରନ(୨୧) ଓ ମହମ୍ମଦ ସାମିମ୍(୨୫) କ୍ଷେତ୍ରରେ ଏଭଳି ପରିସ୍ଥିତି ସୃଷ୍ଟି ହୋଇଛି। ଯୁବତୀଙ୍କ ପରିବାର ଲୋକେ ଜବରଦସ୍ତି ତାଙ୍କୁ ଘରେ ବନ୍ଦୀ ରଖିବା ଓ ମୋବାଇଲ ଫୋନ ଛଡ଼ାଇ ନେବାପରେ ସେମାନେ ମଧ୍ୟ ଘର ଛାଡ଼ିଛନ୍ତି। ଆଇନ ଅନୁଯାୟୀ ବାହାଘର ନିଷ୍ପତ୍ତି ନେବାକୁ ବୟସ ହୋଇଥିଲେ ବି ଏହି ନୂଆ ନିୟମ ଅସୁବିଧା ବଢ଼ାଇ ଦେଇଛି। ଫଳରେ ସେମାନେ ଦିଲ୍ଲୀ ହାଇକୋର୍ଟର ଦ୍ୱାରସ୍ଥ ହୋଇଥିବା ପ୍ରକାଶ କରିଛନ୍ତି। ଗତ ନଭେମ୍ବରରେ ନୂଆ ଆଇନ ପ୍ରଣୟନ ହେବାପରଠାରୁ ଏଭଳି ମାମଲାରେ ପୋଲିସ ପ୍ରାୟ ୩୫ ଜଣଙ୍କୁ ଗିରଫ କରିସାରିଛି। ଦିନକୁ ଦିନ ଅନେକ ପରିବାର ପକ୍ଷରୁ ଏତଲା ସଂଖ୍ୟା ମଧ୍ୟ ବଢ଼ିବାରେ ଲାଗିଥିବା ଜଣାପଡିଛି।
