କଟକ ଅଫିସ,୨୭।୨: କଟକ ଜିଲା ଲାଲବାଗ ଥାନା ଅଧୀନ ଗଙ୍ଗା ମନ୍ଦିର ଅଞ୍ଚଳରେ ଥିବା ଡି.ଆର. ଟ୍ରେଡର୍ସ ନାମକ ଧୂପକାଠି କାରଖାନା ଶନିବାର ଠାବ କରାଯାଇଛି। ସେଠାରୁ ପ୍ରାୟ ୨୫ ଲକ୍ଷ ଟଙ୍କାର ନକଲି ଧୂପକାଠି, ଧୂପକାଠି ପ୍ରସ୍ତୁତ ପାଇଁ ସରଞ୍ଜାମ ଓ ନାମୀଦାମୀ ବ୍ରାଣ୍ଡ୍ର ଖୋଳ ଜବତ କରାଯାଇଛି। ଏହି ଘଟଣାରେ କାରଖାନା ମାଲିକଙ୍କ ସମେତ ୪ ଜଣଙ୍କୁ ଅଟକ ରଖି ପଚରାଉଚରା କରାଯାଉଥିବା ଲାଲବାଗ ଥାନା ଅଧିକାରୀ ରବିନାରାୟଣ ଭଞ୍ଜ କହିଛନ୍ତି।ଭଞ୍ଜଙ୍କ ସୂଚନା ଅନୁଯାୟୀ, ପ୍ରାୟ ୧୦ ବର୍ଷ ହେବ ଉକ୍ତ କାରଖାନାରେ ଏଭଳି ବେଆଇନ କାରବାର ଚାଲିଥିଲା। ମାଲିକ କଲିକତାରୁ ନକଲି ଧୂପକାଠି ଓ ଅତର କିଣି ଆଣୁଥିଲେ। ପରେ କାରଖାନାରେ ଉକ୍ତ ଧୂପକାଠିରେ ମୋକ୍ଷ ସମାଜ କମ୍ପାନୀର ଧୂପକାଠି ଭଳି ବାସ୍ନା ଦେବା ପାଇଁ ଅତର ମିଶାଉଥିଲେ ା
ଏହାକୁ ଉକ୍ତ କମ୍ପାନୀର ଖୋଳରେ ଭର୍ତ୍ତିକରି ବିକ୍ରି ପାଇଁ ବଜାରକୁ ଛାଡୁଥିଲେ। ଏ ସମ୍ପର୍କରେ ଖବର ମିଳିବା ପରେ ପୋଲିସ ସେଠାରେ ଚଢ଼ାଉ କରିଥିଲା। ଏହି ଧୂପକାଠି କେଉଁ ସ୍ଥାନକୁ ଯାଉଥିଲା ଓ ଏହି ଘଟଣାରେ ଅନ୍ୟ କାହାର ସମ୍ପୃକ୍ତି ଅଛି କି ନାହିଁ ସେ ସମ୍ପର୍କରେ ତଦନ୍ତ ଜାରି ରହିଥିବା ଭଞ୍ଜ କହିଛନ୍ତି।
