ନୂଆଦିଲ୍ଲୀ,୨୨।୯:ଲୋକଙ୍କ ସ୍ବାସ୍ଥ୍ୟ ଉପରେ କୋଭିଡ୍ ପ୍ରଭାବ ଦୀର୍ଘଦିନ ଧରି ରହୁଛି। ବୈଜ୍ଞାନିକ ଓ ସ୍ବାସ୍ଥ୍ୟ ବିଶେଷଜ୍ଞମାନେ କୋଭିଡ୍ କିପରି ଲୋକଙ୍କ ସ୍ବାସ୍ଥ୍ୟ ଉପରେ ଦୀର୍ଘ ଦିନ ଧରି ପ୍ରଭାବ ପକାଉଛି ସେନେଇ ଆଲୋଚନା କରିବା ସହ ଏଥିପାଇଁ ଲୋକଙ୍କୁ ସଚେତନ ମଧ୍ୟ କରିଛନ୍ତି। ବର୍ତ୍ତମାନ କୋଭିଡ୍ର ବିଏ.୨.୮୬ ଓ ଇଜି.୫ ଭାରିଆଣ୍ଟ ଅଧିକ ସଂକ୍ରମିତ କରୁଛି। ଏହି ଭାରିଆଣ୍ଟଗୁଡ଼ିକ ଓମିକ୍ରନର ଉପଭାରିଆଣ୍ଟ। ଏହି ଦୁଇ ଭାରିଆଣ୍ଟ ଅନ୍ୟ ଭାରିଆଣ୍ଟ ଅପେକ୍ଷା ଲୋକଙ୍କୁ ଅଧିକ ସଂକ୍ରମିତ କରୁଛି। ଯଦିଓ କୋଭିଡ୍-୧୯ ସଂକ୍ରମିତ ଲୋକଙ୍କ ମଧ୍ୟରେ ସାଧାରଣ ରୋଗ ଲକ୍ଷଣ ଦେଖାଯାଉଛି ଏବଂ ସେମାନେ ସପ୍ତାହ ମଧ୍ୟରେ ସୁସ୍ଥ ହେଉଛନ୍ତି, ତେବେ ସେଭେର ଆକ୍ୟୁଟ୍ ରେସ୍ପିରେଟରୀ ସିଣ୍ଡ୍ରମ୍(ଏସ୍ଏଆର୍ଏସ୍-୨) ଭାରିଆଣ୍ଟ ଲୋକଙ୍କ ସ୍ବାସ୍ଥ୍ୟ ଉପରେ ଏବେ ବି ପ୍ରଭାବ ପକାଇବାରେ ଲାଗିଛି। କିଛି ସଂକ୍ରମିତ ଲୋକଙ୍କ ମଧ୍ୟରେ ଦୁର୍ବଳତା ସହ ନିମୋନିଆ ଲକ୍ଷଣ ଦେଖାଯାଉଥିବା ଜଣାପଡ଼ିଛି। ସଂକ୍ରମିତ ରୋଗୀଙ୍କ ସ୍ବାସ୍ଥ୍ୟବସ୍ଥା ଯାଞ୍ଚ କରିବା ଲାଗି ରୋଡିଓଗ୍ରାଫି, ଅଲଟ୍ରାସାଉଣ୍ଡ ଓ ସିଟି ସ୍କାନର ସହାୟତା ନିଆଯାଉଛି, ତେବେ କୋଭିଡ୍ ରୋଗୀଙ୍କ ମଧ୍ୟରେ ଏବେ ଚର୍ମରୋଗ ଓ ହୃଦ୍ରୋଗ ଆଶଙ୍କା ବୃଦ୍ଧି ପାଉଥିବା ନୂଆ ଅଧ୍ୟୟନରୁ ଜଣାପଡ଼ିଛି। ତେଣୁ ପୂର୍ବରୁ ଦୁରାରୋଗରେ ପୀଡ଼ିତ ରୋଗୀମାନେ ଯଦି କୋଭିଡ୍ ସଂକ୍ରମିତ ହୁଅନ୍ତି, ତେବେ ସେମାନଙ୍କ ସ୍ବାସ୍ଥ୍ୟବସ୍ଥା ଯାଞ୍ଚ କରିବା ପାଇଁ ନୂଆ ଉପକରଣର ଆବଶ୍ୟକତା ରହିଛି। ଫଳରେ ସେମାନଙ୍କୁ ପ୍ରାଥମିକ ସ୍ତରରେ ଘରେ ରଖି ଚିକିତ୍ସା କରାଯାଇପାରିବ। କାଶ ଶବ୍ଦ କୋଭିଡ୍ର ପ୍ରାରମ୍ଭିକ ସ୍ଥିତିକୁ ଚିହ୍ନଟ କରୁଥିବା ନୂଆ ଅଧ୍ୟୟନରୁ ଜଣାପଡ଼ିଛି। ଏହି ପ୍ରକ୍ରିୟା ଦ୍ୱାରା ଦୁରାରୋଗ ପୀଡ଼ିତମାନଙ୍କ ସଂକ୍ରମଣ ବିଷୟରେ ସହଜରେ ଜାଣିହେବ। ନୂଆ ଅଧ୍ୟୟନ ଲାଗି ଗବେଷକମାନେ ଏସ୍ଏଆର୍ଏସ୍-କୋଭିଡ୍-୨ ସଂକ୍ରମିତ ୭୦ରୋଗୀଙ୍କ କାଶିବା ଶବ୍ଦକୁ ମୋବାଇଲରେ ରେକର୍ଡିଂ କରିଥିଲେ। ସଂକ୍ରମିତମାନେ ହସ୍ପିଟାଲରେ ଭର୍ତ୍ତି ହେବାର ୨୪ ଘଣ୍ଟା ମଧ୍ୟରେ ଏହି ରେକର୍ଡିଂ କରାଯାଇଥିଲା। ଏଥିରୁ ଏକଥା ଜଣାପଡ଼ିଥିଲା ସଂକ୍ରମିତଙ୍କ ମଧ୍ୟରୁ କାହାର ଶ୍ୱାସକ୍ରିୟା ଅଧିକ ପ୍ରଭାବିତ ହୋଇଛି, କାହାକୁ ଜରୁରିକାଳୀନ ସ୍ଥିତିରେ ଅମ୍ଳଜାନର ଆବଶ୍ୟକତା ରହିଛି। କୋଭିଡ୍ ରୋଗୀଙ୍କ ସଂକ୍ରମଣ ପ୍ରାଥମିକ, ମଧ୍ୟମ ଅଥବା ଅଧିକ ସଙ୍ଗିନ ସ୍ଥିତିରେ ରହିଛି, ସେନେଇ ମଧ୍ୟ ଏହି ନୂଆ ଅଧ୍ୟୟନରୁ ଜଣାପଡ଼ିଥିଲା। ୨୦୨୦ ଏପ୍ରିଲରୁ ୨୦୨୧ ମେ ମଧ୍ୟରେ ସଂଗୃହୀତ ଡାଟାକୁ ଆଧାର କରି ଏହି ସର୍ଭେ କରାଯାଇଥିଲା।
