ନୂଆଦିଲ୍ଲ,୧୭।୩: ଭାରତରେ ଗତ କିଛି ଦିନରୁ କୋଭିଡ-୧୯ ମାମଲା କ୍ରମାଗତ ଭାବେ ବୃଦ୍ଧି ପାଉଛି। ଭାରତରେ ପ୍ରାୟ ଚାରିମାସ ପରେ ଗୁରୁବାର ୭୦୦ରୁ ଊର୍ଦ୍ଧ୍ୱ କରୋନା ମାମଲା ଚିହ୍ନଟ ହୋଇଛି। ଏହାକୁ ମିଶାଇ ବତ୍ତର୍ମାନ ଭାରତରେ ସକ୍ରିୟ ମାମଲା ସଂଖ୍ୟା ୪,୬୨୩କୁ ବୃଦ୍ଧି ପାଇଛି। ଗତ କିଛି ଦିନ ମଧ୍ୟରେ ଭାରତରେ କରୋନା ଭାଇରସ ମାମଲା ବୃଦ୍ଧିରେ କୋଭିଡ-୧୯ ଏକ୍ସବିବି ଭାରିଆଣ୍ଟର ବଂଶଧର ଏକ୍ସବିବି ୧.୧୬ ରହିପାରେ ବୋଲି ବୈଜ୍ଞାନିକମାନେ ମତ ପ୍ରକାଶ କରିଛନ୍ତି। ଅନେକ ଦେଶରୁ ମିଳିବା ପରେ ଗତ କିଛି ସପ୍ତାହରେ ଭାରତରେ ଏହି ଭାରିଆଣ୍ଟ ମାମଲା ସାମ୍ନାକୁ ଆସିଛି। ଭାରତ ବ୍ୟତୀତ ଚାଇନା, ସିଙ୍ଗାପୁର, ଆମେରିକା ଏବଂ ଅନ୍ୟାନ୍ୟ ଦେଶରେ ଏହି ଭାରିଆଣ୍ଟ ଦ୍ରୁତ ଗତିରେ ବ୍ୟାପିବାରେ ଲାଗିଛି। ତେବେ କୋଭିଡ-୧୯ର ଏହି ଭାରିଆଣ୍ଟରୁ ଏକ ନୂଆ ଲହର ଆସିବାର ସମ୍ଭାବନା ରହିଥିବା କୁହାଯାଉଛି। କୋଭିଡ ଭାରିଆଣ୍ଟ ଉପରେ ନଜର ରଖୁଥିବା ଏକ ଅନ୍ତର୍ଜାତୀୟ ପ୍ଲାଟଫର୍ମ ଅନୁଯାୟୀ, ଭାରତ ବର୍ତ୍ତମାନ କରୋନାର ଏକ୍ସବିବି ୧.୧୬ ଭାରିଆଣ୍ଟ ମାମଲାରେ ସର୍ବାଧିକ ସଂଖ୍ୟକ ରେକର୍ଡ କରିଛି। ସଦ୍ୟତମ ରିପୋର୍ଟ ଅନୁଯାୟୀ, ଭାରତରେ ୪୮ ଟି ମାମଲା, ସିଙ୍ଗାପୁର ଏବଂ ଆମେରିକାରେ ଯଥାକ୍ରମେ ୧୪ ଏବଂ ୧୫ଟି ଏକ୍ସବିବି ୧.୧୬ ଭାରିଆଣ୍ଟ ମାମଲା ରହିଛି।
