ନୂଆଦିଲ୍ଲୀ,୧୭ ।୧୨: କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଯୁଗ୍ମ ସଚିବ ଲଭ ଅଗ୍ରୱାଲ ଶୁକ୍ରବାର ଏକ ପ୍ରେସ୍ ବାର୍ତ୍ତାରେ ଦେଶରେ କରୋନା ମହାମାରୀର ସ୍ଥିତି ସମ୍ପର୍କରେ ସୂଚନା ଦେଇଛନ୍ତି । ସେ କହିଛନ୍ତି ଗତ ୨୦ ଦିନ ମଧ୍ୟରେ ନୂଆ ସଂକ୍ରମଣ ପ୍ରତିଦନର ସଂଖ୍ୟା ୧୦ ହଜାରରୁ କମ୍ ରହିଛି । ଗତ ସପ୍ତାହରେ କରୋନା ପଜିଟିଭଙ୍କ ସଂଖ୍ୟା ୦.୬୫ ପ୍ରତିଶତ ରହିଛି । ସେ କହିଛନ୍ତି ବର୍ତ୍ତମାନ ଦେଶରେ କରୋନାର ସକ୍ରିୟ ମାମଲା ମଧ୍ୟରୁ ୪୦.୩୧ ପ୍ରତିଶତ କେବଳ କେରଳରେ ରହିଛନ୍ତି ।
ଓମିକ୍ରନ୍ ଭାରିଏଣ୍ଟକୁ ନେଇ ଅଗ୍ରୱାଲ କହିଛନ୍ତି ଦେଶରେ କରୋନାର ନୂଆ ଭାରିଏଣ୍ଟ ଦ୍ୱାରା ସଂକ୍ରମିତଙ୍କ ସଂଖ୍ୟା ଏବେ ପର୍ଯ୍ୟନ୍ତ ୧୦୧ରେ ପହଞ୍ଚିଲାଣି । ଏହା ୧୧ ରାଜ୍ୟକୁ ବ୍ୟାପି ସାରିଲାଣି । ୧୦୧ ସଂକ୍ରମିତଙ୍କ ମଧ୍ୟରୁ ମହାରାଷ୍ଟ୍ର ୩୨, ଦିଲ୍ଲୀ ୨୨, ରାଜସ୍ଥାନ ୧୭, କର୍ନାଟକ ଓ ତେଲେଙ୍ଗାନାରେ ୮ ଲେଖାଏଁ, ଗୁଜରାଟ ୫ ଓ ଆନ୍ଧ୍ର ପ୍ରଦେଶ, ଚଣ୍ଡିଗଡ଼, ତାମିଲନାଡୁ ଓ ପଶ୍ଚିମବଙ୍ଗରେ ଜଣେ ଲେଖାଏଁ ସଂକ୍ରମିତଙ୍କୁ ଚିହ୍ନଟ କରାଯାଇଛି ।
ସେହିପରି ବିଶ୍ୱର ୯୧ ଦେଶକୁ ବ୍ୟାପିଲାଣି ଓମିକ୍ରନ୍ । ବିଶ୍ୱ ସ୍ୱାସ୍ଥ୍ୟ ସଙ୍ଗଠନ(ଡବ୍ଲୁଏଚଓ) କହିଛି ଦକ୍ଷିଣ ଆଫ୍ରିକାରେ ଓମିକ୍ରନ୍ ଡେଲ୍ଟା ଭାରିଏଣ୍ଟଠାରୁ ବହୁଗୁଣ ଅଧିକ ମାତ୍ରାରେ ବଢି ଚାଲିଛି । ଡେଲ୍ଟା କମ୍ ବେଗରେ ସଂକ୍ରମଣ ହେଉଥିବା ବେଳେ ଓମିକ୍ରନର ସଂକ୍ରମଣ ଅଧିକ ବେଗରେ ହେଉଛି । ଆଶଙ୍କା କରାଯାଉଛି କି ଗୋଷ୍ଠୀ ସଂକ୍ରମଣ ହେଲେ ଏହା ଡେଲ୍ଟା ସଂକ୍ରମଣଠାରୁ ବହୁ ଆଗକୁ ଚାଲିଯିବ ।
କରୋନାକୁ ହରାଇବାକୁ ଭାରତରେ ସବୁଠାରୁ ଅଧିକ ବେଗରେ ଟିକାକରଣ କରାଯାଉଛି । ଭାରତରେ ପ୍ରତିଦିନ ଯେତିକି ଟିକା ଦିଆଯାଉଛି ତାହା ଆମେରିକାଠାରୁ ୪.୮ ଓ ବ୍ରିଟେନଠାରୁ ୧୨.୫ ପ୍ରତିଶତ ଅଧିକ ।
