ମସ୍କୋ,୩୧।୭: ମହାମାରୀ କରୋନା ଭାଇରସ୍ ସମଗ୍ର ବିଶ୍ୱରେ କାୟା ବିସ୍ତାର କରିସାରିଛି। ପ୍ରତିଦିନ ବିଭିନ୍ନ ଦେଶରେ କରୋନାର ବର୍ଦ୍ଧିତ ମାମଲା ସାମ୍ନାକୁ ଆସୁଛି। ଏଥିରୁ ରକ୍ଷା ପାଇବା ପାଇଁ ସଫାସୁତୁରା ରହିବା ସହ ବାରମ୍ବାର ହାତ ଧୋଇବା, ମାସ୍କ ପିନ୍ଧିବା ଓ ସାମାଜିକ ଦୂରତ୍ୱ ରକ୍ଷା କରିବାକୁ ସରକାରଙ୍କ ପକ୍ଷରୁ ଲୋକମାନଙ୍କୁ ବାରମ୍ବାର ନିବେଦନ କରାଯାଉଛି। ହେଲେ ଏହା ସତ୍ତ୍ୱେ ବି ବିଭିନ୍ନ ଦେଶରେ ହଜାର ହଜାର ସଂଖ୍ୟାରେ ଆକ୍ରାନ୍ତ ଚିହ୍ନଟ ହେଉଛନ୍ତି। ଅନ୍ୟପଟେ ବିଭିନ୍ନ ଦେଶ କରୋନା ଭାଇରସ୍ର ବିସ୍ତାର, ଏହାର ରୂପ ଓ ସଂରଚନା ବିଷୟରେ ବିଭିନ୍ନ ପ୍ରକାରର ଦାବି କରିଆସୁଛନ୍ତି। ଇତିମଧ୍ୟରେ ରୁଷର ବୈଜ୍ଞାନିକମାନେ ଦାବି କରିଛନ୍ତି ଯେ, କରୋନା ଭାଇରସ୍ ପାଣିରେ ସମ୍ପୂର୍ଣ୍ଣଭାବେ ଦୂର ହୋଇଯାଏ। ଏହି ଗବେଷଣା ସେଣ୍ଟର ଅଫ୍ ବାୟୋଲୋଜି ଆଣ୍ଡ ବାୟୋଟେକ୍ନଲୋଜି ଦ୍ୱାରା ଅଧ୍ୟୟନ କରାଯାଇଛି।
ଏହି ଗବେଷଣାରୁ ବୈଜ୍ଞାନିକମାନେ ଦାବି କରିଛନ୍ତି ଯେ, ୭୨ ଘଣ୍ଟା ମଧ୍ୟରେ କରୋନା ଭାଇରସ୍କୁ ପାଣି ସମ୍ପୂର୍ଣ୍ଣ ରୂପେ ବିଲୋପ କରିପାରେ। ଏଥିସହ ୯୦ପ୍ରତିଶତ ଜୀବାଣୁ ୨୪ ଘଣ୍ଟା ମଧ୍ୟରେ ଓ ୯୯.୯ ପ୍ରତିଶତ କଣିକା କୋଠରୀର ତାପମାତ୍ରାରେ ରହିଥିବା ପାଣିରେ ମରିଯାଆନ୍ତି ବୋଲି ସେମାନେ ଦାବି କରିଛନ୍ତି। ସେହିପରି ଫୁଟୁଥିବା ପାଣିର ତାପମାତ୍ରାରେ କରୋନା ଭୂତାଣୁ ସମ୍ପୂର୍ଣ୍ଣ ଓ ତୁରନ୍ତ ମରିଯାଇଥାଏ। ଯଦିଓ କେତେକ ପରିସ୍ଥିତିରେ ଜୀବାଣୁ ପାଣିରେ ବଞ୍ଚିପାରନ୍ତି, କିନ୍ତୁ ଏହା ସମୁଦ୍ରରେ କିମ୍ବା ମଧୁର ଜଳରେ ବଢ଼ିପାରେ ନାହିଁ। କରୋନା ଜୀବାଣୁ ୪୮ ଘଣ୍ଟା ପର୍ଯ୍ୟନ୍ତ ଷ୍ଟେନଲେସ ଷ୍ଟିଲ, ଲିନୋଲିୟମ, ଗ୍ଲାସ, ପ୍ଲାଷ୍ଟିକ ଓ ସେରାମିକ ପୃଷ୍ଠରେ ସକ୍ରିୟ ରହିଥାଏ।
ତେବେ ଭୂପୃଷ୍ଠକୁ ବିଶୋଧନ କରିବାରେ କ୍ଲୋରିନ ମଧ୍ୟ ଅତ୍ୟନ୍ତ ପ୍ରଭାବଶାଳୀ ବୋଲି ପ୍ରମାଣିତ ହୋଇଛି। କୌଣସି କ୍ଲୋରିନ ଦ୍ୱାରା ଭୂପୃଷ୍ଠକୁ ବିଶୋଧନ କରାଗଲେ Sars-CoV-2 ୩୦ ସେକେଣ୍ଡ ମଧ୍ୟରେ ସଂପୂର୍ଣ୍ଣ ନଷ୍ଟ ହୋଇଯାଇଥାଏ ବୋଲି ଏକ ଗବେଷଣାରୁ ଜଣାପଡ଼ିଛି। ଅନ୍ୟପଟେ ରୁଷ କରୋନା ଭାଇରସ୍ ଭ୍ୟାକସିନ୍ ପ୍ରସ୍ତୁତ କରିଛି ବୋଲି ଦାବି କରିଛି। ଅଗଷ୍ଟ ୧୫ ସୁଦ୍ଧା ଲୋକଙ୍କ ନିକଟରେ ଏହାକୁ ଉପଲବ୍ଧ କରାଯାଇପାରେ ବୋଲି ସୂଚନା ରହିଛି।
