ବେଙ୍ଗାଲୁରୁ, ୨୯।୫ : ହିଜାବ ପରେ ଏବେ କର୍ନାଟକରେ ମଲାଲି ମନ୍ଦିର-ମସଜିଦ ବିବାଦ ଆରମ୍ଭ ହୋଇଛି। ଏହାର ସର୍ବାଧିକ ପ୍ରଭାବ ଦକ୍ଷିଣ କନ୍ନଡ, ଉତ୍ତର କନ୍ନଡ ଏବଂ ଉଡୁପି ଉପକୂଳବର୍ତ୍ତୀ ଅଞ୍ଚଳରେ ଦେଖାଯାଉଛି । ରାଜ୍ୟର ଉପକୂଳବର୍ତ୍ତୀ ଅଞ୍ଚଳ ସାମ୍ପ୍ରଦାୟିକ ଭାବରେ ସମ୍ବେଦନଶୀଳ ଏବଂ ଏହାକୁ ଭାଜପାର ଗଡ଼ ବୋଲି ବିବେଚନା କରାଯାଏ।
ଏଠାରେ ସାମ୍ପ୍ରଦାୟିକ ତିକ୍ତତା ଏବଂ ସଂଘର୍ଷ ପ୍ରତିଦିନ ବଢ଼ିଚାଲିଛି। ହିଜାବ ବିବାଦ ଏଠାରୁ ଆରମ୍ଭ ହୋଇଥିଲା। ଏବେ ପୁଣି ଏହି ଅଞ୍ଚଳରେ ସାମ୍ପ୍ରଦାୟିକ ଉତ୍ତେଜନା ପୁଣି ଆରମ୍ଭ ହୋଇଛି।
ଖରା ଛୁଟି ପରେ ସ୍କୁଲ ଏବଂ କଲେଜଗୁଡ଼ିକ ଖୋଲିବା ଆରମ୍ଭ ହୋଇଛି। ହିନ୍ଦୁ ଛାତ୍ରମାନେ କ୍ଲାସରେ ହିଜାବ ପିନ୍ଧିବା ବିରୋଧରେ ପ୍ରଦର୍ଶନ ଆରମ୍ଭ କରିଛନ୍ତି। ବିଦ୍ୟାଳୟରେ କେବଳ ୟୁନିଫର୍ମ ପିନ୍ଧିବାର ଅନୁମତି ରହିଛି ବୋଲି ଶାସକ ଭାଜପା ସରକାର ଜୋର ଦେଇଛନ୍ତି। ମାଙ୍ଗାଲୁରୁ ୟୁନିଭରସିଟି କଲେଜରେ ହୋଇଥିବା ବିରୋଧର ସମାଧାନ ପାଇଁ ଭାଜପା ବିଧାୟକ ବେଦବ୍ୟାସ କାମତ ଚେଷ୍ଟା କରୁଛନ୍ତି। ସେ କଲେଜ ବିକାଶ ଏବଂ ପରିଚାଳନା କମିଟିର ସଦସ୍ୟ ଏବଂ ଛାତ୍ରମାନଙ୍କ ସହ ଏକ ବୈଠକ କରିଥିଲେ। ଏହି ବୈଠକରେ ମାଙ୍ଗାଲୁରୁ ବିଶ୍ୱବିଦ୍ୟାଳୟର କୁଳପତି ତଥା ରେଜିଷ୍ଟ୍ରାର ମଧ୍ୟ ଉପସ୍ଥିତ ଥିଲେ। ମଲାଲି ମସଜିଦର ପୁନରୁଦ୍ଧାର ସମୟରେ ମନ୍ଦିରର ଢାଞ୍ଚା ମିଳିବା ପରେ ବିବାଦ ଉପୁଜିଛି।
ସୋସିଆଲ ଡେମୋକ୍ରାଟିକ ପାର୍ଟି ଅଫ ଇଣ୍ଡିଆ (ଏସଡିପିଆଇ) କହିଛି ଯେ ମସଜିଦ ପରିସରରୁ ମୁଠାଏ ମାଟି ମଧ୍ୟ ନେବାକୁ ଦିଆଯିବ ନାହିଁ। ଏସଡିପିଆଇର ରାଜ୍ୟ ସଭାପତି ଅବଦୁଲ ମଜିଦ ମିସୁରୁ କହିଛନ୍ତି, ମଲାଲି ମସଜିଦକୁ ସୁରକ୍ଷିତ ରଖାଯିବ।
ସେ ଅଭିଯୋଗ କରିଛନ୍ତି ଯେ ଦେଶରେ ଶାସକ ଭାଜପା ଲୋକ-ସମର୍ଥକ ନୁହଁନ୍ତି ବରଂ ଅମ୍ବାନୀ ଏବଂ ଆଦାନୀଙ୍କ ସମର୍ଥକ। ଦେଶକୁ ସଶକ୍ତିକରଣ କରିବା ପରିବର୍ତ୍ତେ ଭାଜପା ଦେଶକୁ ସାମାଜିକ ତଥା ଆର୍ଥିକ ଦୃଷ୍ଟିରୁ ଦୁର୍ବଳ କରୁଛି। ସୂଚନାଯୋଗ୍ୟ ଯେ ମଲାଲି ମସଜିଦ ମାମଲା କୋର୍ଟରେ ଅଛି। ହିନ୍ଦୁ ପକ୍ଷ ଦାବି କରୁଛନ୍ତି ଯେ ଏହି ମନ୍ଦିରକୁ ଫେରାଇ ଆଣିବା ପାଇଁ ସେମାନେ ସମସ୍ତ ଆଇନଗତ ମାର୍ଗ ଗ୍ରହଣ କରିବେ।
