ପୁରୁଷୋତ୍ତମପୁର,୨୭ା୯(ସବିତା ମିଶ୍ର): ପରିବାର ପୋଷିବା ସହ କରଜ ଶୁଝିବା ଆଶାରେ ଦାଦନ ଖଟିବାକୁ ଯାଇଥିବା ଜଣେ ଦାଦନ ଶ୍ରମିକ ନିଜ ମଜୁରି ଟଙ୍କା ମାଗିବାରୁ ଠିକାଦାର ଓ ଦଲାଲଙ୍କ ମରଣାନ୍ତକ ଆକ୍ରମଣର ଶିକାର ହୋଇଛନ୍ତି। ସେମାନଙ୍କ ଆକ୍ରମଣରେ ଏବେ ଚିକିତ୍ସା ଅଭାବରୁ ଘରେ ପଡି ରହିଛନ୍ତି। ସେ ହେଲେ ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ତଥା ଥାନା ଅନ୍ତର୍ଗତ ଭୂତସରସିଙ୍ଗି ପଞ୍ଚାୟତ ଦାସିଆମାରୀ ପଲ୍ଲୀ ଗ୍ରାମର ପ୍ରଭାକର ନାହାକ(୬୦)। ଖବରରୁ ପ୍ରକାଶ, ପ୍ରଭାକର ଅତି ଗରିବ ହୋଇଥିବାରୁ ଗ୍ରାମରେ ମୂଲଲାଗି ପରିବାର ଚଳାଉଥିଲେ। ସେ ଝିଅ ବାହାଘରରେ କରଜ ହୋଇଯାଇଥିବା ହେତୁ ତାହା ଶୁଝିବେ କିପରି ଚିନ୍ତାରେ ଥିଲେ। ଏହି ସମୟରେ ଗତ ୬ମାସ ତଳେ ପୁରୁଷୋତ୍ତମପୁର ଥାନା ଅନ୍ତର୍ଗତ ଜଗନ୍ନାଥପୁର ବ୍ରାହ୍ମଣ ଶାସନ ଗ୍ରାମର ଜଣେ ମଧ୍ୟସ୍ଥି ଜିତେନ୍ଦ୍ର ସାହୁଙ୍କ ମାଧ୍ୟମରେ ଭଦ୍ରକର ଠିକାଦାର ପର୍ଶୁରାମ ଦାଶଙ୍କ ଅଧୀନରେ ବେଙ୍ଗାଲୁରୁର ହିନ୍ଦିପୁର ଯାଇ ସେଠାରେ ଥିବା ଆଦିଷ୍ଟିଲ କମ୍ପାନୀରେ ଶ୍ରମିକ ଭାବରେ କାମ କରୁଥିଲେ। ଇତିମଧ୍ୟରେ ଠିକାଦାର ତିନିମାସର ମଜୁରି ଦେଇଥିବା ବେଳେ ଆଉ ତିନିମାସର ଦେଇ ନ ଥିଲେ। ମଜୁରି ଠିକ୍ ରୂପେ ନ ମିଳିବାରୁ ପ୍ରଭାକର ନିଜ ଗ୍ରାମକୁ ଫେରି ଆସିବାକୁ ଚାହିଁ ମଧ୍ୟସ୍ଥି ଓ ଠିକାଦାରଙ୍କୁ କହିଥିଲେ। ଠିକାଦାର ଓ ମଧ୍ୟସ୍ଥି ଉଭୟେ ତାଙ୍କୁ ମନା କରିଥିଲେ। ମାତ୍ର ପ୍ରଭାକର ଚାଲି ଆସିବାକୁ ଜିଦ୍ ଜିଦ ଧରିବାରୁ ଗତ ୪ରେ ତାଙ୍କୁ ସେଠାରେ ମରଣାନ୍ତକ ଆକ୍ରମଣ କରାଯଇଥିଲା। ମାଡ଼ ମାରି ତାଙ୍କ ହାତକୁ ମୋଡି ଭାଙ୍ଗି ଦେବା ସହ ମୁଣ୍ଡ ଓ ଶରୀରର ବିଭିନ୍ନ ସ୍ଥାନକୁ ମାରଣାସ୍ତ୍ରରେ ଆକ୍ରମଣ କରାଯିବାରୁ ସେ ଗୁରୁତର ହୋଇଥିଲେ। ସେଠାରେ ଏକ ହସ୍ପିଟାଲରେ ପ୍ରଭାଗରଙ୍କୁ ଭର୍ତ୍ତି କରିଦେଇ ଠିକାଦାର ଓ ମଧ୍ୟସ୍ଥି ଦଲାଲ ଚାଲି ଯାଇଥିଲେ। ସେ ମେଡିକାଲରେ ପଡି ଛଟପଟ ହେଉଥିବା ବେଳେ ସେଠାକାର ଅନ୍ୟ ଏକ କମ୍ପାନୀରେ କାର୍ଯ୍ୟ କରୁଥିବା ପୁରୁଷୋତ୍ତମପୁର ଅଞ୍ଚଳର କେତେ ଜଣ ବ୍ୟକ୍ତି ପ୍ରଭାକରଙ୍କ ପରିବାରକୁ ଫୋନ କରି ଏ ସମ୍ପର୍କରେ ଜଣାଇଥିଲେ। ପରେ ସ୍ତ୍ରୀ ସରସ୍ବତୀ ଓ ଶଳା ଧର୍ମା ନାହାକ ସେଠାକୁ ଯାଇ ପ୍ରଭାକରଙ୍କ ଚିକିତ୍ସା କରାଇଥିଲେ। ହେଲେ ଅର୍ଥ ଅଭାବରୁ ଅଧିକ ଚିକିତ୍ସା କରି ନ ପାରି ଉଭୟେ ଏକ ଆମ୍ବୁଲାନ୍ସ ଯୋଗେ ସେଠାରୁ ପ୍ରଭାକରଙ୍କୁ ବ୍ରହ୍ମପୁର ଆଣି ଗତ ୭ରେ ବଡମେଡିକାଲରେ ଚିକିତ୍ସା କରାଇ ଘରକୁ ଆଣିଥିଲେ। ଅର୍ଥ ଅଭାବରୁ ଅଧିକ ଚିକିତ୍ସା ଲାଗି ପରିବାର ଲୋକେ କେଉଁଆଡେ ନେଇପାରୁନାହାନ୍ତି। ବର୍ତ୍ତମାନ ପ୍ରଭାକର ଏକ ପ୍ରକାରର ମୂକ ପାଲଟି କଥାବାର୍ତ୍ତା ମଧ୍ୟ କହିପାରୁ ନାହାନ୍ତି। ଏନେଇ ପରିବାର ଲୋକେ ଠିକାଦାର ପର୍ଶୁରାମ ଦାଶଙ୍କୁ ଫୋନ କରିପଚାରିବାରୁ ସେ ଘଟଣାକୁ ଏଡାଇଦେଇ ଜାଣି ନ ଥିବା ଏବଂ ପ୍ରଭାକରଙ୍କ ବକେଆ ମଜୁରି ଟଙ୍କା ଦେବାକୁ ମନା କରିଦେଇଛନ୍ତି। ପ୍ରଭାକରଙ୍କୁ ନେଇଥିବା ମଧ୍ୟସ୍ଥି ଦଲାଲ ଜିତେନ୍ଦ୍ର ସାହୁ ମଧ୍ୟ କିଛି ଜାଣି ନ ଥିବା କହିଛନ୍ତି ବୋଲି ସ୍ତ୍ରୀ ସରସ୍ବତୀ ପ୍ରକାଶ କରିଛନ୍ତି। ଦୋଷୀଙ୍କୁ ଦଣ୍ଡବିଧାନ ସହ ନ୍ୟାୟ ପ୍ରଦାନ କରିବା, ପ୍ରଭାକରଙ୍କ ଚିକିତ୍ସା ପାଇଁ ସହାୟତା ଯୋଗାଇ ଦେବାକୁ ପରିବାର ଲୋକେ ସରକାର ଓ ଗଞ୍ଜାମ ଜିଲାପାଳଙ୍କୁ ନିବେଦନ କରିଛନ୍ତି।
