ରାଓ୍ବଲପିଣ୍ଡି, ୪।୧୧: ପାକିସ୍ତାନ ବିପକ୍ଷ ତୃତୀୟ ତଥା ଅନ୍ତିମ ଅନ୍ତର୍ଜାତୀୟ ଦିନିକିଆ ମ୍ୟାଚ୍ରେ ଭ୍ରମଣକାରୀ ଜିମ୍ବାଓ୍ବେ ସୁପର ଓଭରରେ ବିଜୟୀ ହୋଇଛି। ଟସ୍ ଜିତି ଜିମ୍ବାଓ୍ବେ ପ୍ରଥମେ ବ୍ୟାଟିଂ କରି ୬ ଉଇକେଟ ହରାଇ ୨୭୮ ରନ କରିଥିଲା। ଜବାବରେ ପାକିସ୍ତାନ ଅଧିନାୟକ ବାବର ଆଜମଙ୍କ ୧୨୫ ରନର ଶତକୀୟ ଇନିଂସ ବଳରେ ୫୦ ଓଭରରେ ୯ ଉଇକେଟ ହରାଇ ସମାନ ୨୭୮ ରନରେ ସୀମିତ ରହିଥିଲା ଓ ମ୍ୟାଚ୍ ଟାଇ ହୋଇଥିଲା। ଫଳରେ ସୁପର ଓଭରର ସହାୟତା ନିଆଯାଇଥିଲା ଓ ଏଥିରେ ଜିମ୍ବାଓ୍ବେ ବିଜୟୀ ହୋଇଥିଲା। ପରାସ୍ତ ହୋଇଥିଲେ ମଧ୍ୟ ପାକିସ୍ତାନ ୨-୧ରେ ସିରିଜ ହାତେଇଛି।
ପ୍ରଥମେ ବ୍ୟାଟିଂ କରିଥିବା ଜିମ୍ବାଓ୍ବେ ତରଫରୁ ସିନ୍ ଓ୍ବିଲିୟମ୍ସ ସର୍ବାଧିକ ଅପରାଜିତ ୧୧୮ ରନର ଶତକୀୟ ପାଳି ଖେଳିଥିଲେ। ଉଇକେଟକିପର ବ୍ୟାଟ୍ସମ୍ୟାନ ବ୍ରେଣ୍ଡନ ଟେଲର ୫୬, ସିକନ୍ଦର ରାଜା ୪୫, ଓ୍ବେସଲି ମାଧେଭେର ୩୩ ରନ ସଂଗ୍ରହ କରିଥିଲେ। ବୋଲିଂରେ ପାକିସ୍ତାନର ମହମ୍ମଦ ହାସ୍ନେନ ସର୍ବାଧିକ ୫ ଓ ଓ୍ବାହାବ ରିୟାଜ ଗୋଟିଏ ଉଇକେଟ ଅକ୍ତିଆର କରିଥିଲେ। ଅପରପକ୍ଷରେ ପାକିସ୍ତାନ ତରଫରୁ ବାବର ୧୨୫, ଓ୍ବାହାବ ରିୟାଜ ୫୨, ଖୁସ୍ଦିଲ ଶାହା ୩୩ ରନ ସଂଗ୍ରହ କରିଥିଲେ ଓ ଅନ୍ୟମାନେ ବିଫଳ ହୋଇଥିଲେ। ବୋଲିଂରେ ଜିମ୍ବାଓ୍ବେର ବ୍ଲେସିଂ ମୁଜାରବାନି ସର୍ବାଧିକ ୫, ରିଚାର୍ଡ ଏନ୍ଗାରାଭା ଓ ଡୋନାଲ୍ଡ ତିରିପାନୋ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଜିମ୍ବାଓ୍ବେ ୫୦ ଓଭରରେ ୨୭୮/୬
(ଓ୍ବିଲିୟମ୍ସ-୧୧୮*, ଟେଲର-୫୬, ରାଜା-୪୫, ମାଧେଭେର-୩୩, ହାସନେନ-୫/୨୬)।
ପାକିସ୍ତାନ ୫୦ ଓଭରରେ ୨୭୮/୯
(ବାବର-୧୨୫, ରିୟାଜ-୫୨, ଖୁସ୍ଦିଲ-୩୩, ମୁଜାରବାନି-୫/୪୯, ଏନ୍ଗାରାଭା- ୨/୬୨, ତିରିପାନୋ- ୨/୩୯)।
