ବେଙ୍ଗାଲୁରୁ,୧୨।୪: କର୍ନାଟକ ବିଧାନସଭା ନିର୍ବାଚନ ପାଖେଇ ଆସୁଥିବା ବେଳେ ନେତାଙ୍କ ଦଳ ବଦଳ ପ୍ରକ୍ରିୟା ଜାରି ରହିଛି। ବୁଧବାର ଅର୍ଥାତ୍ ୧୨ ଏପ୍ରିଲରେ କଂଗ୍ରେସକୁ ଝଟକା ଲାଗିଛି। ବରିଷ୍ଠ କଂଗ୍ରେସ ନେତା ତଥା ପୂର୍ବତନ ସ୍ପିକର କାଗୋଡୁ ଥିମ୍ମପ୍ପାଙ୍କ ଝିଅ ଡା. ରାଜନନ୍ଦିନି ଭାରତୀୟ ଜନତା ପାର୍ଟି(ଭାଜପା)ରେ ସାମିଲ ହୋଇଛନ୍ତି। ଭାଜପା ନେତା ତଥା କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ବିଏସ ୟେଦୁରପ୍ପା ଓ ଦଳର ଅନ୍ୟ ସଦସ୍ୟଙ୍କ ଉପସ୍ଥିତିରେ ରାଜନନ୍ଦିନି ଭାଜପାରେ ସାମିଲ ହୋଇଛନ୍ତି। ଏହି ସମୟରେ ସେ ହାତରେ ଭାଜପାର ପତାକା ଧରିଥିବା ଦେଖିବାକୁ ମିଳିଥିଲା।
ଭାଜପାରେ ସାମିଲ ହେବା ପରେ ଡା. ରାଜନନ୍ଦିନି କହିଛନ୍ତି, ମୋର ଆଶା ଥିଲା କି ମୋତେ କଂଗ୍ରେସ ଚିହ୍ନିବ ଓ ଟିକେଟ ଦେବ। ହେଲେ ମୋତେ ସୁଯୋଗ ମିଳିଲା ନାହିଁ। ଭାଜପା ମୋତେ ଉତ୍ସାହର ସହ ସ୍ବାଗତ କରିଛି। ଦଳ ପାଇଁ କାମ କରିବି। ମୁଁ ଜଣେ ଓ୍ବାର୍କର ଓ ଯେଉଁଠି ହେଲେ ବି କାମ କରିପାରିବି।
ଝିଅ ଭାଜପାରେ ସାମିଲ ହେବା ପରେ ପିତା ଥିମ୍ମପ୍ପା କହିଛନ୍ତି, ରାଜନନ୍ଦିନିଙ୍କ ଠାରୁ ଏହା ଆଶା କରୁ ନ ଥିଲି। ଏହା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ। ଏହା ଭାଜପା ନେତାଙ୍କ ଚାଲ। ରାଜନନ୍ଦିନିଙ୍କ ସହ କଥା ହେବି। କଂଗ୍ରେସ ସହ ଠିଆ ହୋଇଛି, ସବୁବେଳେ କଂଗ୍ରେସର ସମର୍ଥନରେ ରହିବି, କଂଗ୍ରେସ ପାଇଁ କାମ କରିବି।
