ନୂଆଦିଲ୍ଲୀ,୨୮ ।୧୨: କଂଗ୍ରେସ ଦଳ ସୋମବାର ତା’ର ୧୩୬ ତମ ପ୍ରତିଷ୍ଠା ଦିବସ ପାଳନ କରିଛି । ଦଳ ମୁଖ୍ୟାଳୟରେ ବରିଷ୍ଠ କଂଗ୍ରେସ ନେତା ଏ.କେ. ଆଣ୍ଟୋନି ପତାକା ଉତ୍ତୋଳନ କରିଛନ୍ତି । ପ୍ରତିଷ୍ଠା ଦିବସରେ ଦଳର ଅଧ୍ୟକ୍ଷା ସୋନିଆ ଗାନ୍ଧୀ ଉପସ୍ଥିତ ନ ଥିବା ବେଳେ ରାହୁଲ ମଧ୍ୟ ବିଦେଶ ଯାତ୍ରା କରିଛନ୍ତି । ଯାହାକୁ ନେଇ ଏବେ ସମାଲୋଚନା ହେଉଛି । ହେଲେ ଦଳର ମହାସଚିବ ପ୍ରିୟଙ୍କା ଗାନ୍ଧୀ ପ୍ରତିଷ୍ଠା ଦିବସରେ ସାମିଲ ହୋଇଥିଲେ । ଅନ୍ୟପଟେ ଆଣ୍ଟୋନି ଆଜି ତାଙ୍କର ୮୧ ତମ ଜନ୍ମଦିନ ପାଳନ କରୁଛନ୍ତି । ପ୍ରତିଷ୍ଠା ଦିବସ ସମାରୋହରେ ଯୋଗ ନ ଦେଇ ସୋନିଆ ଏକ ଭିଡିଓ ବାର୍ତ୍ତା ଦେଇଛନ୍ତି । ଏଥିରେ ସେ ଦଳୀୟ କର୍ମୀଙ୍କୁ ଶୁଭେଚ୍ଛା ଜଣାଇବା ସହ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି କେନ୍ଦ୍ର ସରକାରଙ୍କ ଦ୍ୱାରା ଜନତାଙ୍କ ଅଧିକାରକୁ ମାରି ଦିଆଯାଉଛି । ସବୁଠି ଏକଛଦ୍ରବାଦ ଶାସନ ଚାଲିଛି । ବେରୋଜଗାରୀ ଚରମ ସୀମାରେ ପହଞ୍ଚିଲାଣି । ଜମି-ବାଡି ଉପରେ ନଜର ପକାଗଲାଣି । ଅନ୍ନଦାତାଙ୍କ ଉପରେ କଳା ଆଇନ ଲଦି ଦିଆଯାଉଛି । ଅନ୍ୟପଟେ ରାହୁଲ ବିଦେଶ ଗସ୍ତ କରିଥିବା କଥା ଗୋଟିଏ ଦିନ ପୂର୍ବରୁ କଂଗ୍ରେସ ପ୍ରବକ୍ତା ରଣଦୀପ ସୁରଜେୱାଲା ସୂଚନା ଦେଇଥିଲେ । ହେଲେ ସେ କେଉଁଠିକୁ ଯାଇଛନ୍ତି ତାହା ସେ ସ୍ପଷ୍ଟ କରି ନ ଥିବା ବେଳେ ରାହୁଲ ଇଟାଲୀ ମାମୁ ଘରକୁ ଯାଇଥିବା ଅନୁମାନ କରାଯାଉଛି । ଭାରତୀୟ ଜନତା ପାର୍ଟି(ଭଜପା) ରାହୁଲଙ୍କ ବିଦେଶ ଗସ୍ତକୁ ନେଇ କଟାକ୍ଷ କରିଥିବା ବେଳେ କଂଗ୍ରେସ ନେତା କେସି ଭେନୁଗୋପାଳ କହିଛନ୍ତି ଭାଜପା କେବଳ ଗୋଟିଏ ନେତାଙ୍କୁ ଟାର୍ଗେଟ କରୁଛି ଆଉ ସିଏ ହେଉଛନ୍ତି ରାହୁଲ ଗାନ୍ଧୀ ।
