Posted inଜାତୀୟ

ସୀମାରେ ସଂଘର୍ଷ

ନୂଆଦିଲ୍ଲୀ,୩୦ା୧: ପୂର୍ବରୁ ସୀମା କହିଲେ କେବଳ ଜମ୍ମୁ-କଶ୍ମୀର ସଂଲଗ୍ନ ନିୟନ୍ତ୍ରଣରେଖା ଓ ଉତ୍ତର ପୂର୍ବକୁ ଲାଗି ରହିଥିବା ଚାଇନା ସୀମାକୁ ବୁଝାଉଥିଲା। ହେଲେ ଦୁଇମାସ ହେବ ଚର୍ଚ୍ଚାରେ ରହିଛି ଭିନ୍ନ ଏକ ସୀମା। ତାହା ହେଉଛି ଦେଶ ଭିତରର ବର୍ଡର। କେନ୍ଦ୍ର ସରକାରଙ୍କ ୩ କୃଷି ଆଇନ ବିରୋଧରେ କୃଷକ ସଙ୍ଗଠନଗୁଡ଼ିକ ପକ୍ଷରୁ ଚାଲିଥିବା ଆନ୍ଦୋଳନ ପରିପ୍ରେକ୍ଷୀରେ ଦିଲ୍ଲୀ ସଂଲଗ୍ନ ସିଙ୍ଘୁ, ଟିକ୍ରି ଓ ଗାଜିପୁର ସୀମା ପ୍ରତ୍ୟହ ଖବରର ଶିରୋନାମା ସାଉଁଟୁଛି। ବିଶେଷକରି ସାଧାରଣତନ୍ତ୍ର ଦିବସର ଟ୍ରାକ୍ଟର ରାଲି ହିଂସା ଓ ଉପଦ୍ରବ ଜାତୀୟ ରାଜଧାନୀର ସୀମାକୁ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ୩ ଦିନ ଧରି ଏଠାରେ ଛକାପଞ୍ଝା ସ୍ଥିତି ଲାଗିରହିଛି ।

ଗୁରୁବାର ମଧ୍ୟରାତ୍ରି ସୁଦ୍ଧା ସୀମା ଛାଡ଼ିବାକୁ ପୋଲିସ ପ୍ରଶାସନର ନିର୍ଦ୍ଦେଶ ପରେ ୩ ବର୍ଡର ଖାଁ ଖାଁ ଲାଗୁଥିଲା। ତେବେ ଶୁକ୍ରବାର ସକାଳେ ଆନ୍ଦୋଳନକାରୀ ନିଜ ନିଜ ଧାରଣାସ୍ଥଳକୁ ପୁଣି ଫେରିଥିଲେ। ଏହାକୁ ଦେଖି ସିଙ୍ଘୁବାସୀ ‘ଦିଲ୍ଲୀ ସେ ଆୟା ଅର୍ଡର, ଖାଲି କରୋ ବର୍ଡର’ ସ୍ଲୋଗାନ ଦେଇ ଆନ୍ଦୋଳନକାରୀଙ୍କୁ ଘଉଡ଼ାଇବାକୁ ଉଦ୍ୟମ କରିଛନ୍ତି। ଫଳରେ ସ୍ଥାନୀୟ ଲୋକ ଓ କୃଷକଙ୍କ ମଧ୍ୟରେ ସଂଘର୍ଷ ହୋଇଛି। ପୋଲିସ ଲୁହବୁହା ବାଷ୍ପ ଓ ବଳ ପ୍ରୟୋଗ କରିଛି। ଲାଠିମାଡ଼ରେ ଅନେକ ଚାଷୀ ଆହତ ହୋଇଛନ୍ତି। ଟିକ୍ରି ବର୍ଡରରେ ମଧ୍ୟ ଅନୁରୂପ ଉତ୍ତେଜନାପୂର୍ଣ୍ଣ ସ୍ଥିତି ଦେଖିବାକୁ ମିଳିଛି। ତୁରନ୍ତ ସ୍ଥାନ ଛାଡ଼ି ଚାଲିଯିବା ପାଇଁ ବ୍ୟାପକ ସୁରକ୍ଷା କର୍ମୀଙ୍କ ଉପସ୍ଥିତିରେ ଦାବି କରିଛନ୍ତି ସ୍ଥାନୀୟ ଲୋକେ। ସବୁଠୁ ଅଧିକ ଚର୍ଚ୍ଚାରେ ରହିଛି ଉତ୍ତରପ୍ରଦେଶର ଗାଜିପୁର ସୀମା, ଯେଉଁଠି ଟର୍ନିଂ ପଏଣ୍ଟ ସାବ୍ୟସ୍ତ ହୋଇଛି ଭାରତୀୟ କିଷାନ ୟୁନିୟନ୍‌ (ବିକେୟୁ) ମୁଖପାତ୍ର ରାକେଶ ଟିକାଏତ୍‌ଙ୍କ ଆଖିରୁ ଝରିଥିବା ଲୁହ। ଗାଜିଆବାଦ ଜିଲା ପ୍ରଶାସନ ପକ୍ଷରୁ ପାଣି, ବିଦ୍ୟୁତ୍‌ ଯୋଗାଣ ବନ୍ଦ କରାଯିବା ପରେ ରାତିରେ ଆନ୍ଦୋଳନକାରୀ ଘରମୁହଁା ହୋଇଥିଲେ। ହେଲେ ମରିଯିବି ପଛେ ପଛଘୁଞ୍ଚା ଦେବି ନାହିଁ ବୋଲି ଦମ୍ଭ ଦେଖାଇ ଗାଁରୁ ପାଣି ଆସିଲେ ପିଇବି କହି କୃଷକ ନେତା ଟିକାଏତ୍‌ କାନ୍ଦି କାନ୍ଦି ଇମୋଶନାଲ କାର୍ଡ ଖେଳିବା ପରେ ଅସ୍ବାଭାବିକ ଭାବେ ଭିଡ଼ ଦେଖିବାକୁ ମିଳିଛି। ଦିନ ତମାମ ନେତାଙ୍କ ଆଗମନ ଯୋଗୁ ଆନ୍ଦୋଳନର କେନ୍ଦ୍ରସ୍ଥଳ ସିଙ୍ଘୁ ସୀମାରୁ ଗାଜିପୁର ବର୍ଡରକୁ ସ୍ଥାନାନ୍ତର ହୋଇଛି। ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ୍‌ ସିସୋଡିଆ ମଧ୍ୟ ରାକେଶ ଟିକାଏତ୍‌ଙ୍କୁ ଭେଟିଥିଲେ। ଦିଲ୍ଲୀ ମୁଖ୍ୟମନ୍ତ୍ରୀ ରାକେଶଙ୍କ ସହ ଫୋନ୍‌ରେ କଥା ହୋଇଥିବା ସେ ସୂଚନା ଦେଇଥିଲେ। ପ୍ରଶାସନ ପକ୍ଷରୁ ଜଳ ଯୋଗାଣ ବନ୍ଦ କରାଯାଇଥିବାରୁ ଆମେ ପାଣି ବ୍ୟବସ୍ଥା କରିଛୁ ବୋଲି ସିସୋଡିଆ କହିଥିଲେ। ସେହିପରି ମୁଜାଫରନଗରରେ ରାଷ୍ଟ୍ରୀୟ ଲୋକ ଦଳ (ଆର୍‌ଏଲ୍‌ଡି) ମୁଖ୍ୟ ଅଜିତ୍‌ ସିଂ ବିକେୟୁକୁ ସମର୍ଥନ ଘୋଷଣା କରିଥିଲେ। ତାଙ୍କ ପୁଅ ଜୟନ୍ତ ଚୌଧରୀ ମଧ୍ୟ ମହାପଞ୍ଚାୟତରେ ସାମିଲ ହୋଇଥିଲେ। ଇତିମଧ୍ୟରେ ଟ୍ରାକ୍ଟର ରାଲି ହିଂସାକୁ ନେଇ ତନାଘନା କରୁଥିବା ଫୋରେନ୍‌ସିକ୍‌ ଟିମ୍‌ ଗାଜିପୁର ସୀମାରେ ପହଞ୍ଚତ୍ ପ୍ରମାଣ ସଂଗ୍ରହ କରୁଛି।

ଉତ୍ତେଜନାରୁ ଅଚଳାବସ୍ଥା

ଦିଲ୍ଲୀ ଓ ହରିୟାଣା ସଂଲଗ୍ନ ସିଙ୍ଘୁ ସୀମାରେ ପୋଲିସ ଉପସ୍ଥିତିରେ ସ୍ଥାନୀୟ ଲୋକ ଓ ଆନ୍ଦୋଳନକାରୀଙ୍କ ମଧ୍ୟରେ ସଂଘର୍ଷ ଦେଖିବାକୁ ମିଳିଛି। ସେହିପରି ଟିକ୍ରି ଓ ଗାଜିପୁର ବର୍ଡରରେ ମଧ୍ୟ ସୁରକ୍ଷା କର୍ମୀଙ୍କ ଉପସ୍ଥିତି ସତ୍ତ୍ୱେ ଉତ୍ତେଜନା ଲାଗିରହିଛି। ହରିୟାଣାର କର୍ନାଲରୁ ୯୬ କି.ମି ଦୂର ସିଙ୍ଘୁ ସୀମାରେ ଆନ୍ଦୋଳନକାରୀଙ୍କୁ ସ୍ଥାନ ଛାଡ଼ି ଚାଲିଯିବା ପାଇଁ ୨୪ ଘଣ୍ଟିଆ ମହଲତ ଦିଆଯାଇଥିଲା। ଆନ୍ଦୋଳନକାରୀଙ୍କ ଯୋଗୁ ସେମାନେ ନାନା ଅସୁବିଧାର ସମ୍ମୁଖୀନ ହେଉଥିବା କହି ସ୍ଥାନୀୟ ଲୋକେ ସେମାନଙ୍କୁ ଘଉଡ଼ାଇବାବେଳେ ସଂଘର୍ଷ ଘଟିଥିଲା। ସେହିପରି ଟିକ୍ରି ସୀମାରେ ଚାଷୀ ଆନ୍ଦୋଳନକୁ ବିରୋଧ କରି ଗୋଟିଏ ଗୋଷ୍ଠୀ ସ୍ଥାନ ଖାଲି କରିବା ପାଇଁ ସ୍ଲୋଗାନ ଦେଇଥିଲେ। ଜାତୀୟ ପତାକାକୁ ଅସମ୍ମାନ କରିବାକୁ ଦିଆଯିବ ନାହିଁ ବୋଲି ସ୍ଥାନୀୟ ଲୋକେ କହୁଥିବା ଶୁଣିବାକୁ ମିଳିଥିଲା। ପୂର୍ବ ଦିଲ୍ଲୀ ଗାଜିପୁର ସୀମାରେ ରାକେଶ ଟିକାଏତ୍‌ଙ୍କ ବିକେୟୁ ପକ୍ଷରୁ ‘ମହାପଞ୍ଚାୟତ’ ବସିଥିଲା। ଏଥିରେ ସାମିଲ ହେବା ପାଇଁ ମୁଜାଫରନଗର ସହରରେ ହଜାର ହଜାର ଚାଷୀ ଏକତ୍ରିତ ହୋଇଥିଲେ। ଏହାକୁ ଦୃଷ୍ଟିରେ ରଖି ପୋଲିସ ପକ୍ଷରୁ କଡ଼ା ସୁରକ୍ଷା ବନ୍ଦୋବସ୍ତ କରାଯାଇଥିଲା। ମହାବୀର ଚୌକ ନିକଟ ଜିଆଇସି ଗ୍ରାଉଣ୍ଡରେ ପ୍ରବଳ ଜନ ସମାଗମ ହୋଇଥିଲା। କୃଷକମାନେ ତ୍ରିରଙ୍ଗା ଓ ନିଜ ସଙ୍ଗଠନର ପତାକା ଲଗାଇ ଶତାଧିକ ଟ୍ରାକ୍ଟରରେ ଗାଜିପୁରର ୟୁପି ଗେଟ୍‌କୁ ଆସିଥିଲେ। ଫଳରେ ଗାଜିପୁର ସୀମା ନିକଟ ଦିଲ୍ଲୀର ଜାତୀୟ ରାଜପଥ ନମ୍ବର ୨୪ରେ ଟ୍ରାଫିକ୍‌ ଜାମ୍‌ ହୋଇ ଅଚଳାବସ୍ଥା ସୃଷ୍ଟି ହୋଇଥିଲା।

କୃଷକଙ୍କୁ ଆକ୍ରମଣ କରି ଭାରତକୁ ଦୁର୍ବଳ କରୁଛନ୍ତି ମୋଦି

୩ ବିବାଦୀୟ କୃଷି ଆଇନକୁ ନେଇ କେନ୍ଦ୍ର ସରକାରଙ୍କୁ ଶୁକ୍ରବାର ପୁଣି ଟାର୍ଗେଟ କରିଛି କଂଗ୍ରେସ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୃଷକମାନଙ୍କୁ ଆକ୍ରମଣ କରି ଭାରତକୁ ଦୁର୍ବଳ କରିଦେଉଛନ୍ତି ବୋଲି କଂଗ୍ରେସ ନେତା ରାହୁଲ ଗାନ୍ଧୀ ସମାଲୋଚନା କରିଛନ୍ତି। ରାହୁଲ ଟୁଇଟ୍‌ କରିଛନ୍ତି ଯେ, କୃଷକ ଓ ଶ୍ରମିକଙ୍କ ଉପରେ ପ୍ରଧାନମନ୍ତ୍ରୀଙ୍କ ଆକ୍ରମଣ ଦେଶକୁ ଦୁର୍ବଳ କରିଛି। ଏଥିରୁ କେବଳ ଦେଶବିରୋଧୀ ତତ୍ତ୍ୱ ଲାଭବାନ ହେବେ। କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରା କହିଛନ୍ତି, କୃଷକଙ୍କ ଆସ୍ଥା ହେଉଛି ଦେଶର ପୁଞ୍ଜି। ସେମାନଙ୍କ କଥା ନ ଶୁଣିବା ଏକ ପାପ। ସେମାନଙ୍କୁ ଧମକ ଦେବା ଓ ଟାର୍ଗେଟ କରିବା ଦେଶ ଉପରେ ଆକ୍ରମଣ। ପ୍ରଧାନମନ୍ତ୍ରୀ ଦେଶକୁ ଦୁର୍ବଳ କରନ୍ତୁ ନାହିଁ।

ବିରୋଧୀଙ୍କୁ ନିନ୍ଦା କଲେ କେନ୍ଦ୍ରମନ୍ତ୍ରୀ

ପାର୍ଲାମେଣ୍ଟର ମିଳିତ ଅଧିବେଶନରେ ରାଷ୍ଟ୍ରପତିଙ୍କ ଅଭିଭାଷଣକୁ କଂଗ୍ରେସ ନେତୃତ୍ୱରେ ବିରୋଧୀ ଦଳଗୁଡ଼ିକ ବର୍ଜନ କରିଥିବାରୁ କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ ଏହାର ନିନ୍ଦା କରିଛନ୍ତି। ବିରୋଧୀ ଦେଶ ଆଗରେ କି ପ୍ରକାର ଦୃଷ୍ଟାନ୍ତ ଓ ପରମ୍ପରା ସୃଷ୍ଟି କରୁଛନ୍ତି ବୋଲି ସେ ପ୍ରଶ୍ନ କରିଥିଲେ। ରାଷ୍ଟ୍ରପତି ରାଜନୈତିକ ମତପାର୍ଥକ୍ୟର ଊର୍ଦ୍ଧ୍ୱରେ। ସେ ସମସ୍ତଙ୍କ ସମ୍ମାନର ପାତ୍ର। ବିରୋଧୀ ଦଳ ତାଙ୍କ ଅଭିଭାଷଣ ବର୍ଜନ କରିବା ଅତ୍ୟନ୍ତ ଦୁଃଖଦାୟକ। ଦେଶକୁ ୫୦ ବର୍ଷ ଧରି ଶାସନ କରିଥିବା କଂଗ୍ରେସର ଦାୟିତ୍ୱଶୂନ୍ୟ ଭୂମିକାକୁ କେନ୍ଦ୍ରମନ୍ତ୍ରୀ ସମାଲୋଚନା କରିଥିଲେ। ଭାଜପା ଅନେକ ବର୍ଷ ବିରୋଧୀ ଆସନରେ ବସିଥିଲେ ହେଁ କେବେ ରାଷ୍ଟ୍ରପତିଙ୍କ ଅଭିଭାଷଣ ବର୍ଜନ କରି ନ ଥିଲା ବୋଲି ରବିଶଙ୍କର କହିଥିଲେ।


Enter your email to get our daily news in your inbox.

All Right Reserved By Dharitri.Com

ନିର୍ବାଚନ ପୂର୍ବରୁ ଫସିଗଲେ ଶଶି ଥରୁର

ଥରୁଭାନନ୍ତପୁରମ,୨୧।୪: କେନ୍ଦ୍ର ମନ୍ତ୍ରୀ ତଥା ପ୍ରତିଦ୍ୱନ୍ଦ୍ୱୀ ପ୍ରାର୍ଥୀ ରାଜୀବ ଚନ୍ଦ୍ରଶେଖରଙ୍କ ବିରୋଧରେ ପ୍ରଚାର ଅଭିଯୋଗରେ ଥିରୁଭାନନ୍ତପୁରମ ଲୋକ ସଭା ଆସନରୁ ଆସିଥିବା ବରିଷ୍ଠ କଂଗ୍ରେସ ନେତା...

ଇଣ୍ଡିଆ ମେଣ୍ଟ ରାଲିରେ ମାଡପିଟ, ଭିଡିଲେ ଆରଜେଡି-କଂଗ୍ରେସ କର୍ମୀ

ରାଞ୍ଚି,୨୧।୪: ଝାଡ଼ଖଣ୍ଡର ରାଜଧାନୀ ରାଞ୍ଚିରୁ ଏକ ବଡ ଖବର ଆସୁଛି, ଯେଉଁଠାରେ ଇଣ୍ଡିଆ ଆଲାଇନ୍ସର ରାଲିରେ ତୀବ୍ର ସଂଘର୍ଷ ହୋଇଥିଲା। ସୂଚନାଯୋଗ୍ୟ, ରାଞ୍ଚିର ପ୍ରଭାତ ତାରା...

ଜେଲରେ ବନ୍ଦ ଥିବା ଅରବିନ୍ଦ କେଜରିଓ୍ବାଲ, ହେମନ୍ତ ସୋରେନଙ୍କ ପାଇଁ ଷ୍ଟେଜରେ ଖାଲି ରହିଲା ଚୌକି

ରାଞ୍ଚି,୨୧।୪: ରାଞ୍ଚିରେ ଚାଲିଥିବା ‘ଇଣ୍ଡିଆ’ ମିଳିତ ସମାବେଶରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଏବଂ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପାଇଁ ଦୁଇଟି ଚେୟାର...

ଅଭିଷେକଙ୍କ ସହ ନିଜକୁ ହତ୍ୟା ଉଦ୍ୟମ କରାଯାଉଥିବ ଆଶଙ୍କା କଲେ ମମତା

କୋଳକାତା,୨୧।୪: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେ ଅଭିଷେକ ଏବଂ ମୋତେ ହତ୍ୟା କରାଯାଇପାରେ। ୨୦ ମିନିଟର ଭାଷଣ ପରେ ମମତା ବାନାର୍ଜୀ ଏକ...

ବରଯାତ୍ରୀ ନେଇ ଯାଉଥିବା କାର୍‌ର ଫାଟିଲା ଟାୟାର: ଚାଲିଗଲା ୫ ଜୀବନ, ୩ ଗୁରୁତର

ଲକ୍ଷ୍ନୌ,୨୧।୪: ଉତ୍ତରପ୍ରଦେଶର ଆଗ୍ରାସ୍ଥିତ କୁବେରପୁର କଟ ନିକଟରେ ଏକ୍ସପ୍ରେସୱେ ଉପରେ ଏକ ଦ୍ରୁତ ଗତିରେ ଆସୁଥିବା କାରର ଟାୟାର ଫାଟିଛି। ଏହି ଦୁର୍ଘଟଣାରେ ବରଙ୍କ ଭାଇଙ୍କ...

ମୋଦିଙ୍କୁ ପ୍ରଶଂସା କରି ରାହୁଲଙ୍କୁ ଜୁମଲା ବୋଲି କହିଲେ ରେସଲର ଦ ଗ୍ରେଟ ଖଲି

ନୂଆଦିଲ୍ଲୀ,୨୧।୪: ଡବ୍ଲ୍ୟୁଡବ୍ଲ୍ୟୁଇ ଷ୍ଟେଜରେ ବିଶ୍ୱର ବିଭିନ୍ନ ସ୍ଥାନରୁ ଆସିଥିବା କୁସ୍ତି ଯୋଦ୍ଧାମାନଙ୍କୁ ପରାସ୍ତ କରିଥିବା ଦି ଗ୍ରେଟ ଖଲି ଓରଫଦିଲୀପ ସିଂ ରାଣା ମଧ୍ୟ ଭାଜପା...

୫ ବର୍ଷରେ ଅମିତ ଶାହାଙ୍କର ଦୁଇଗୁଣା ହେଲା ସମ୍ପତ୍ତି

ନୁଆଦିଲ୍ଲୀ,୨୧।୪: କେନ୍ଦ୍ର ଗୃହମନ୍ତ୍ରୀ ତଥା ଭାରତୀୟ ଜନତା ପାର୍ଟି (ଭାଜପା)ର ବରିଷ୍ଠ ନେତା ଅମିତ ଶାହା ଏପ୍ରିଲ ୧୯ ରେ ଗାନ୍ଧିନଗର ଲୋକ ସଭା ର୍ନିବାଚନମଣ୍ଡଳୀ...

କେଜ୍‌ରିଓ୍ବାଲଙ୍କୁ ମାରିବାକୁ ଚାଲିଛି ଷଡଯନ୍ତ୍ର: ସୁନୀତା

ରାଞ୍ଚି,୨୧।୪: ବିରୋଧୀ ଦଳ ‘ଇଣ୍ଡିଆ’ ରବିବାର ଝାଡଖଣ୍ଡର ରାଜଧାନୀ ରାଞ୍ଚିରେ ଏକତା ପ୍ରଦର୍ଶନ କରିଛି। ଝାଡଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ନେତୃତ୍ୱରେ ଏକ ରାଲି ରାଞ୍ଚିର...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri