ମଥୁରା,୯।୮: କେରଳର କୋଝିକୋଡରେ ହୋଇଥିବା ବିମାନ ଦୁର୍ଘଟଣାରେ ପ୍ରାଣ ହରାଇଥିବା ସହପାଇଲଟ ଅଖିଳେଶ କୁମାର ବର୍ମାଙ୍କ ପାର୍ଥିବ ଶରୀର ରବିବାର ସକାଳେ ମଥୁରାରେ ପହଞ୍ଚିଥିଲା। ସେଠାରୁ ମରଶରୀର ଘରେ ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। କାନ୍ଦି କାନ୍ଦି ଅଖିଳେଶଙ୍କ ମା’ ଏବଂ ଗର୍ଭବତୀ ସ୍ତ୍ରୀ ଚେତା ହରାଇଥିଲେ। ଏହାକୁ ନେଇ ସେଠାରେ ଉପସ୍ଥିତ ଲୋକଙ୍କ ଆଖି ଓଦା ହୋଇଥିଲା। ଖବର ଦିଆଯିବା ପରେ ସ୍ବାସ୍ଥ୍ୟ ଟିମ୍ ସ୍ତ୍ରୀଙ୍କ ଚିକିତ୍ସା କରିଥିଲେ।
ପ୍ରକାଶ ଯେ, ୩୨ ବର୍ଷୀୟ ଅଖିଳେଶ ଦୁଇ ବର୍ଷ ପୂର୍ବେ ବିବାହ କରିଥିଲେ। ତାଙ୍କ ସ୍ତ୍ରୀ ମେଘା(୨୯) ଏବେ ଗର୍ଭବତୀ ଅଛନ୍ତି। ଦୁଇ ସପ୍ତାହ ମଧ୍ୟରେ ସେ ମା’ ହୋଇପାରନ୍ତି। ନିକଟରେ ଲକ୍ଡାଉନ୍ ସମୟରେ ଅଖିଳେଶ ଘରକୁ ଆସିଥିଲେ। ଏବେ ହଠାତ୍ ଦୁର୍ଘଟଣାରେ ତାଙ୍କୁ ହରାଇବାକୁ ସହଜରେ ପରିବାରଲୋକେ ଗ୍ରହଣ କରିପାରୁନାହାନ୍ତି। ତାଙ୍କ ପରିବାରରେ ଏବେ ୨ ଭାଇ, ଜଣେ ଭଉଣୀ, ସ୍ତ୍ରୀଙ୍କ ସମେତ ବାପାମା’ ଅଛନ୍ତି। ତେବେ ତାଙ୍କୁ ଶହୀଦର ମର୍ଯ୍ୟାଦା ଦେବାକୁ ଦାବି ହେଉଛି।
