ସଫେଇ କାମକୁ ଅନେକେ ଛୋଟ କାମ ଭାବନ୍ତି। କିନ୍ତୁ ଅଷ୍ଟ୍ରେଲିଆରେ ସଫେଇ କର୍ମଚାରୀଙ୍କର ଏତେ ଚାହିଦା ଯେ, ସେମାନଙ୍କ ଦରମା ଭାରତୀୟ ଡାକ୍ତର, ଇଞ୍ଜିନିୟରଙ୍କଠାରୁ ବି ଅଧିକ। ଆଉ ଏହାର କାରଣ ହେଉଛି ଏଠାରେ ଥିବା ସଫେଇ କର୍ମଚାରୀଙ୍କର ଅଭାବ। ତେଣୁ କମ୍ପାନୀଗୁଡିକ ସେମାନଙ୍କ ଦରମା ଘଣ୍ଟା ହିସାବରେ ବଢାଉଛନ୍ତି। ଫଳରେ ସେମାନଙ୍କ ଦରମା ବାର୍ଷିକ ୧ କୋଟି ପର୍ଯ୍ୟନ୍ତ ବଢିଗଲାଣି। ଅର୍ଥାତ୍ ଦରମା ଭାବେ ମାସିକ ପ୍ରାୟ ୮ ଲକ୍ଷ ଟଙ୍କା ସଫେଇ କର୍ମଚାରୀଙ୍କୁ ମିଳୁଛି। ତେବେ ଆଶ୍ଚର୍ଯ୍ୟର କଥା ଏତେ ଦରମା ଦିଆଯାଉଥିବା ସତ୍ତ୍ୱେ ଏଠାରେ ସଫେଇକର୍ମଚାରୀଙ୍କ ଅଭାବ ରହିଛି। ଏଠାରେ ସଫେଇ କର୍ମଚାରୀଙ୍କୁ ବାର୍ଷିକ ଅତିକମ୍ରେ ୭୨-୮୦ ଲକ୍ଷରୁ ଆରମ୍ଭ କରି ୯୮ ଲକ୍ଷ ଟଙ୍କା ପର୍ଯ୍ୟନ୍ତ ଦରମା ଦିଆଯାଉଛି। ଡେଲି ଟେଲିଗ୍ରାଫରେ ପ୍ରକାଶିତ ଏକ ଖବରରେ ସିଡ୍ନୀର କ୍ଳିନିଂ କମ୍ପାନୀ ‘ଆବସୋଲ୍ୟୁଟ୍ ଡୋମେଷ୍ଟିକ୍’ର ମ୍ୟାନେଜିଂ ଡାଇରେକ୍ଟର ଜୋଏ ବେସ୍ କୁହନ୍ତି,‘ସଫେଇ କର୍ମଚାରୀଙ୍କ ବେତନ ବଢାଇ ଘଣ୍ଟା ପିଛା ୩୬୦୦ କରାଯାଇଛି। କିଛି କମ୍ପାନୀ ତ ବେତନ ବଢାଇ ଘଣ୍ଟାକୁ ୪୭୦୦ ଟଙ୍କାରୁ ବି ଉର୍ଦ୍ଧ୍ୱ କରାଇଛନ୍ତି। ଝରକା ଓ ନାଳ ସଫା କରିବା ପାଇଁ ବାର୍ଷିକ ୮୨ ଲକ୍ଷ ଟଙ୍କା ପର୍ଯ୍ୟନ୍ତ ଦରମା ଦିଆଯାଉଛି।’
