ନୂଆଦିଲ୍ଲୀ,୧୭।୨(ପି.ଟି.):ଭାରତର ପ୍ରଧାନ ବିଚାରପତି (ସିଜେଆଇ) ଭାବେ ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ଼ ପ୍ରଥମ ୧୦୦ ଦିନ ପୂରଣ କରିଛନ୍ତି। ଏହି ସମୟ ମଧ୍ୟରେ ସୁପ୍ରିମକୋର୍ଟ ସଂସ୍କାରରେ ଅନେକ ଅଗ୍ରଗତି ହୋଇଛି। ବିଶେଷ କରି କୋର୍ଟଗୁଡ଼ିକ ଅଧିକ ଟେକ୍ନୋଲୋଜି ଫ୍ରେଣ୍ଡଲି ହୋଇଛି। ଜଷ୍ଟିସ୍ ଚନ୍ଦ୍ରଚୂଡ଼ଙ୍କ ସମୟରେ ସୁପ୍ରିମକୋର୍ଟରେ ୮ ଜଣ ନୂଆ ବିଚାରପତି ନିଯୁକ୍ତି ପାଇବା ସହ ବିଭିନ୍ନ ହାଇକୋର୍ଟରେ ଖାଲିସ୍ଥାନ ପୂରଣ ହୋଇଛି। ଏହି ସମୟରେ ଯେତିକି ମାମଲା ଦାଏର ହୋଇଛି, ତା’ଠାରୁ ଅଧିକ ମାମଲା ଫଇସଲା ହୋଇପାରିଛି। ଗତବର୍ଷ ନଭେମ୍ବର ୯ରେ ଜଷ୍ଟିସ୍ ଚନ୍ଦ୍ରଚୂଡ଼ ସିଜେଆଇ ଭାବେ ଶପଥ ନେଇଥିଲେ। ସେ ଏହି ପଦରେ ୨୦୨୪ ନଭେମ୍ବର ୧୦ ପର୍ଯ୍ୟନ୍ତ ରହିବେ। ସିଜେଆଇଙ୍କ ପ୍ରଥମ ୧୦୦ ଦିନରେ ରେକର୍ଡ ଡିଜିଟାଲାଇଜେଶନ ହେବା ସହ ଆଇନଜୀବୀମାନଙ୍କ ପାଇଁ ଅନ୍ଲାଇନ ହାଜର ସ୍ଲିପ୍, ଆର୍ଟିଆଇ ଅନ୍ଲାଇନ ପୋର୍ଟାଲ ଏବଂ ଡିଜିଟାଲ କୋର୍ଟ ଡେସ୍କଟପ୍ ଆପ୍ଲିକେଶନ ଶୁଭାରମ୍ଭ ହୋଇଛି।
